R/wasaare Kheyre “Dowladda FS waxa ay xoogga saareysaa dib u habeynta Hay’adaha Dowliga ah”

0
6

R/Wasaaraha Soomaaliya mudane Xasan Cali Kheyre oo guddoomiyay Shirka Madasha Wadatashiga Soomaaliya & Beesha Caalamka oo maalintii 2-aad ka soconaya Muqdisho ayaa sheegay in dowladda Soomaaliya ay xoogga saarayso dib u habeynta hay’adaha dowliga isagoo wafuudda iyo madaxda caalamiga ah uga mahadceliyay kasoo qeybgalkooda shirka.

Illaa 50 wafuud oo isagu jirta madaxda ururada iyo wakiilo ka kala socda dalalka adduunweynaha iyo hay’adaha caalamiga ah ayaa ka qeybgalaya madasha shirkan oo markii ugu horeysay lagu qabtay dalka.

Dooda shirka maanta ayaa ku bilaabatay dib u habeynta hay’adaha dowliga ah, dhaqaalaha tallaabooyinka loo qaaday si loo horumariyo hanaanka maamulka maaliyadda ee dalka.

Wasiirka maaliyadda XFS Dr.C/raxmaan Ducaale Beyle oo ka hadlay shirka ayaa ka warbixiyay wixii ka qabsoomay dib u habeynta maamulka maaliyadda iyo halka uu marayo wadahadalka deyn cafinta isagoo muujiyay in ay jiraan rajooyin iyo guullo la taaban karo oo ku aadan in hanaanka deyn cafinta uu ugu dambeyntii ay kasoo baxdo natiijo lagu farxo.

Waxaa goob joog ah shirkaan qaar kamid ah madaxda dowladaha xubnaha ka ah dowladda Federaalka sida Madaxweynayaasha maamul gobolleedyada sida Koofur Galbeed, Hirshabeelle, Galmudug iyo Guddoomiyaha gobolka Banaadir ahna Duqa Muqdisho.