Wasiirka oo wareysi gaar ah siiyay Warbaahinta Qaranka ayaa sheegay in waxyaabaha ugu muhiimsan ee dalka looga eryay ay tahay in uu hareer maray hanaankii iyo asluubtii UN-ka, isla markaana uu meel uga dhacay Qaranimada Soomaaliya, dowladuna ay ka qaadatay go’aan ah in uu dalka isaga baxo.
Wasiir Axmed Ciise Cawad ayaa xusay in Danjire Nicholas Haysom uu sameeyay waxyaabo fara gelin ku ah Qaranimada Soomaaliya, isagoo ugu dambeyn soo saaray warqado uu u qoray qaar ka mid ah xafiisyada dowladda oo uu eedeymo u jeedinayay, taasi oo uu Wasiirku ku sheegay inay tahay mid meel looga dhacayo Qaranimada Soomaaliya.
“Go’aanka lagu eryay Nicholas Haysom laguma deg degin, ee waan la fiirsanay, waxaana siinay waqti innagoo u gudbinay talooyin, balse maalinkii uu dalka yimid wuxuu samaynayay hadalo meel ku dhac ku ah Qaranimada Soomaaliya” ayuu yiri Wasiirka Arrimaha Dibadda Soomaaliya Mudane Axmed Ciise Cawad.
