Muqdisho (SNTV):- Agaasimaha guud ee Wasaaradda Waxbarashada Hiddaha iyo tacliinta sare ee Xukuumadda Soomaaliya Xasan Maxamed cali ayaa maanta kormeer ku tagay 24- Dugsi waxbarasho oo ay dhawaan lasoo wareegtay Wasaaradda Waxbarashada Xukuumadda Federalka Soomaaliya .
Kormeerka agaasimaha guud ee Wasaaradda Waxbarashada ayaa qeyb ka ahaa kormeer guud oo ay shaqaalaha Wasaaradda Waxbarashada ay maanta ka sameyeen dhammaan Dugsiyada Waxbarasho Dowladu maamusho.
72-ka tirsan shaqaalaha Wasaaradda Waxbarashada ayaa tagay Dugsiyada si ay u soo ogadaan habka uu u shaqeeyo manhajka Waxbarashada oo ay dhawaan diyaarisay Wasaaradda Waxbarshada inta macallim ee soo xaadirtay casharada la siiyo ardayda iyo sida loo isticmaalay buugaagta .
Agaasimaha guud ee Wasaaradda Waxbarashada Soomaaliya Xasan Maxamed Cali ayaa sheegay in kormeerkii maanta ay ku sameyeen Dugsiyada uu ahaa mid ku soo dhammaaday sidii loogu talagalay, islamarkaan kormeerayaasha laga sugayo macluumaadkii ay ka soo aruuriyeen Dugsiyada Waxbarasho.
Wasaaradda waxbarashada waxa ay diyaarisay wax yaabahii looga baahnaa in lagu sameeyo kormeer iyo agabkii lagu qaban lahaa kormeerka u jeedada ugu weyna waxa ay aheyd in loo kuurgalo Dugsiyada Wasaaradda Waxbarashada ay lasoo wareegtay tirada macalimiinta soo xaadirta in lasoo hubiyo iyo in la ogaado manhajka waxbarashada buugaagtii Wasaarada ay bixisay in ardaydu isticmaalaan kormeerka saakay waxa uu ahaa mid dhammeystiran sidaasi waxaa yiri agaasimaha guud ee Wasaaradda Waxbarashada Soomaaliya Xasan Maxamed Cali.
Wasaaradda Waxbarshadda Xukuumadda Soomaliya ayaa dadaal ugu jirto horumarinta Waxbarashada dalka iyo la xisaabtanka macalimiinta iyo maamulayaasha Dugsiyada dowladda ay maamusho.
