Muqdisho(SNTV);- Kooxda argagixisada Al-Shabaab ayaa maanta mar kale weerar ismiidaamin naftii halignimo ah ka geystay xarunta degmada Hodan ee Gobolka Banaadir,halkaasi oo ay ku bur buriyeen Masaajid ku dhow xarunta degmada.
Guddoomiyaha Gobolka Banaadir ahna Duqa Muqdisho Mudane C/raxmaan Cumar Cusmaan (Injineer Yariisow) ayaa faah faahin ka bixiyay khasaaraha ka dhashay Qaraxa,wuxuuna sheegay in Qof naftii halige ah xoog uu ku jiiray Ciidamada,wuxuuna u mahad celiyay Ciidamadii geesiyaasha ee hor istaagay xabadahana ku furay,isagoona sheegay in naftii haligihii uu is qarxiyay markii uu soo gaaray goobtii Cibaadada (Masjidka).
Guddoomiye Yariisow ayaa tacsi u diray Ehalada dadkii ku shahiiday weerarka bahalnimada ah ee Kooxda argagixisada ka fulisay xarunta degmada Howlwadaag kuna bur burisay Masjidka Alle,isagoona Alle uga baryay inuu janada ka waraabiyo.
Duqa Muqdisho ahna Guddoomiyaha Gobolka Banaadir C/raxmaan Cumar Cusmaan (Injineer Yariisow) ayaa u mahad celiyay Shacabka soo gurmaday islamarkiiba naftoodana u huray haddii xitaa Qarax kale dhici lahaa,wuxuuna sheegay in shacabka markaan soo jeesteen oo ay diidan yihiin argagixisada iney dhibaato u geystaan.
Ugu danbeyntii,Guddoomiyaha Gobolka Banaadir ayaa sheegay in warbixin rasmi ah oo ku saabsan khasaaraha ka dhashay Qarax dib ka soo sheegi doonaan,maadama hadda Wali Hay’adaha amniga wadaan baaritaan ku aadan weerarka wuxuushnimada ah,isagoona dhanka kale tilmaamay in dad dhaawac la geeyay Cisbitaalada kuna booqanayaan halkaasi si gurmad loogu sameeyo.
Kooxda Nabad diidka Al-Shabaab ayaa 2-dii bishan September weerar naftii halignimo ah ku qaaday xarunta degmada Howlwadaag,halkaasi oo ay ku bur buriyeen Masjid iyo Dugsi Qur’aan oo carruur Soomaaliyeed Qur’aanka Kariimka ah lagu barayay.
