Djibouti (SNTV), Taliyaha Ciidanka Booliska Soomaaliyeed Sarreeye guuto Bashiir Cabdi Maxamed Ameeriko oo ay wehliyaan Taliyaha hoggaanka baarista Dambiyada ee C.I.D S/guuto Saciid Axmed Kediye, Taliyaha hoggaanka Canshuuraha Ciidanka Booliska S/guuto Cabdullaahi Xasan Bariise iyo saraakiil kale, ayaa la kulmay Taliyaha guud ee Ciidamada qalabka sida ee Jamhuuriyadda Djibouti S/guud Zakariye Shiikh Ibraahim iyo Madax sare oo ka tirsan Dawladdaasi.
Madaxdaasi, ayaa isla soo qaaday qodobo badan oo ku quseeya labada dhinac, waxaana si gaar ah looga hadlay Xoojinta xiriirka ka dhaxeeya labada Talis iyo siddii looga wada shaqeyn lahaa Ammaanka guud ee labada dal.
Taliyaha Ciidanka Booliska Soomaaliyeed Sarreeye guuto Bashiir Cabdi Maxamed Ameeriko, ayaa warbixin ku saabsan Xaaladda amni ee Soomaaliya siiyey Taliyaha guud ee Ciidamada qalabka sida ee Jamhuuriyadda Djibouti, isaggoo xusay in isabadal weyn lagu sameeyey howlaha Nabad gelyo ee dalka, waxaana Dawladda Djibouti uu uga mahad celiyey sida mar walbo ay u garab taagan tahay Soomaaliya.
S/guud Zakariye Shiikh Ibraahim, Taliyaha guud ee Ciidamada qalabka sida ee Jamhuuriyadda Djibouti, ayaa Taliska Ciidanka Booliska Soomaaliyeed ku ammaanay shaqada adag ee ay hayaan, isaggoo tilmaamay in Dawladda aan Walaalaha nahay ee Djibouti mar walbo ay diyaar u tahay garab istaaga iyo Caawinta Jamhuuriyadda Soomaaliya.
