Si ay sharci u fududeeya howshooda u helaan xisbiyadda siyaasadeed ee dalka ayaa Guddiga Madaxa banaan ee Doorashooyinka Qaranka wuxuu ku guuleystay in la furo diiwan gelinta KMG ah ee Xisbiyada siyaasadda dalka, waxaana guddigu soo bandhigay foomamka diiwaan gelinta KMG ah, iyadoo ay goob joog ahaayeen qaar kamid ah Guddoomiyeyaasha xisbiyada siyaasadeed ee dalka iyo Mas’uuliyiinta Guddiga Madaxa banaan ee Doorashooyinka Qaranka.
Xaliimo Sheekh Ismaaciil Xaliimo Yarey Guddoomiyaha Guddiga Madaxa Banaan ee Doorashooyinka Qaranka ayaa muujisay in diiwaan galinta KMG ah ee maanta la daah furay ay fursad badan siineyso xisbiyada siyaasadeed ee dalka.
Xafiiska Diiwaan gelinta ee Guddiga ayaa u sharaxay xisbiyada goobta joogay habka iyo hanaanka ay isku diiwaan galinayaan, waxaana jiray su’aalo iyo talooyin xisbiyadu ay Guddiga u jeediyeen, hase ahaatee masuuliyiinta guddiga madaxa banaan ee doorashooyinka ayaa u sheegay xisbiyada in wax waliba uu Dastuurka faahfaahinayo, iyaguna ay hirgelin doonaan.
Guddoonka xisbiyada qaar ayaa Warbaahinta Qaranka u sheegay in Guddigu uu qaaday talaabo muhiim ah oo muujineysa in looga gudbi karo nidaamka hab qeybsiga ee hadda lagu shaqeeyo.
Guddiga Madaxa banaan ee Doorashooyinka Qaranka ayaa ku howlan hirgelinta hanaanka doorashooyinka Qof iyo cod ah oo dalka ka qabsooma.
