Kismaayo (SONNA) Tababarkan oo ku saabsanaa baarista danbiyada ayaa waxaa soo qabanqaabisay wasaaradda amniga dowlad goboleedka Jubbaland oo kaashaneeysa xafiiska Qaramada Midoobay u qaabilsan taakuleynta howlgalka nabad ilaalinta Midowga Afrika ee Soomaaliya UNSOM.
Tababarkan oo inta uu socdo ka qeybgalayaasha la siin doono casharro ku saabsan dambi baarista iyo siyaabaha kala duwan ee loo wajaho baaritaannada falal dambiyeedyada dhaca, waxaana ka faa’iideysanaya saraakiil dambi baaris oo ka socota dowlad goboleedyada dalka iyo gobolka Banaadir.
Cabdulaahi Kaahin oo ah isku xiraha barnaamijka dhaqancelinta maleeyshiyaadka Al-shabaab ee Jubbaland oo ka hadlay furitaanka tababarka ayaa sheegay in tababarkan uu yahay mid xoojinaaya aqoonta iyo habka dambi baarista .
Sidoo kale waxa uu ugu baaqay adkeynta isdhexgalka laamaha dambi baarista dowlad goboleedyada iyo kuwa gobolka Banaadir.
Tababarka waxaa daahfuray agaasimaha guud wasaaradda amniga Jubaland Aadan Yuusuf Saalax ayaa sheegay in tababarka uu muhiim u yahay laamaha dambi baarista dalka.
Tababarkaan ayaa waxaa ka qayb galay saraakiil kasocotay laamaha dambi baarista dowlad goboleedyada jubbaland,koonfur galbeed iyo maamulka gobolka Banaadir.
