Qoysas raashin loogu qeybiyay degmada Doolow

0
402

Muqdisho (SONNA) Ku dhawaad 800 Qoys oo dan yar Islamarkana ku nool xerooyinka barakacayasha Degmada Doolow ee Gobalka Gedo ayaa ka faa’iidaystay Deeqdan raashinka oo ay Dowladda Soomaaliya ku wareejisay Dowlad Goboleedka Jubbaland, waxaana maanta laga qaybiyay qaar ka mid ah degmoyinka Gobalkaasi.

Qeybinta raashinka waxaa goob joog ka ahaa Wasiirka Arrimaha Gudaha ee Dowlad Gobaleedka Jubbaland Mudane Maxamed Faarax Warsame Darwiish, Guddoomiyaha Gobalka Gedo Mudane Maxamed Muxumed, Xildhibaano iyo mas’uuliyin ka tirsan Maamulka Degmada Doolow ee Gobalka Gedo.

Dadkii ka faa’iideystay deeqda raashinka ah ayaa ka mahadceliyay kaalmada la soo gaarsiiyay.

Guddoomiyaha Gobalka Gedo Maxamed Muxumed ayaa waxa uu sheegay in ay guddoomeen raashinkii loogu talagalay Gobalka Gedo, ayna maanta ka qeybiyeen degmada Doolow.

Wasiirka Arrimaha Gudaha ee Dowlad Gobaleedka Jubbaland Mudane Maxamed Faarax Warsame Darwiish ayaa uga mahadceliyay dowladda dowladda Federaalka ah ee Soomaaliya deeqda ay soo gaarsiisay dowlad goboleedka Jubbaland.