Ciidanka Daraawiishta Puntland ayaa saakay fashiliyay weerar ay khawaarijta naf lacaariga ah ee Daacish ku soo qaadeen fariisimaha ciidamadu ku leeyihiin buuraha Calmiskaad ee gobolka Bari.

Khawaarijta Daacish oo jab xooggan lagu gaarsiiyay deegaannada Haraaryo iyo Togga-Jaceel ayaa meydad badan kaga cararay halkaasi, sida ay sheegeen saraakiisha hoggaaminaysa howlgalka ciribtirka Khawaarijta Daacish ee ka socda buuraha.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa dhawaan sii xoojiyay baaqa Golaha Xukuumadda Federaalka Soomaaliya ee ku aaddan howlgalka ka dhanka ah argagixisada Daacish ee ku dhuumaaleysanaysa buuraha Calmiskaad ee gobolka Bari, isagoo bogaadiyay guulaha taariikhiga ah ee ay soo hooyeen ciidanka iyo shacabka dowlad goboleedka Puntland.

Howlgallada ka socda buuraha Calmiskaad ee gobolka Bari ayaa khawaarijta Daacish lagu gaarsiiyay khasaare xooggan, waxaana lagu dilay horjoogayaal ajaaniib ah iyo malleeshiyaad tiro beel ah.

Xubnao ka mid ah Guddiga Madaxa-bannaan ee Doorashooyinka Qaranka iyo Soohdimaha ayaa maanta kormeeray qeybo ka mid ah Seejooyinka loo asteeyey doorashooyinka degmooyinka Gobolka Banaadir.

Kormeerka Guddiga ayaa daarranaa u kuur-galka diyaarinta goobaha loo asteeyay diiwaan-gelinta cod-bixiyeyaasha degmooyinka Gobolka Banadir.

Xubnaha ka socday Guddiga intii ay ku guda jireen kormeerka waxay kulamo la qaateen mas’uuliyiinta iyo dadweynaha ku nool degmooyinka Kaaraan, Yaaqshiid, Heliwaa,iyo Gubadlay.

Mas’uuliyiinta degmooyinka la kormeeray ayaa caddeeyey in ay diyaar u yihiin doorashooyinka Golaha Deegaanka in ay dadweynuhu soo doortaan.

Ugu dambeyn Xubnaha Guddiga ayaa u sharaxay dadweynaha muhimmada ay leedahay in shacabka Soomaaliyeed ay doortaan madaxdooda, ayna haystaan maanta fursad ay ku xaqiijin karaan himiladooda ah in dalka ay ka hirgasho doorasho qof iyo cod ah, oo laga gudbo nidaamkii doorashooyinka dadban

Madaxweynaha dowlad goboleedka koonfur galbeed Mudane Cabdicasiis Xasan Maxamed (Laftagareen) ayaa xafiiskiisa magaalada Baydhabo ku qaabbilay wafdi uu hoggaaminayay kaaliyaha agaasimaha guud hay’adda FAO ee Afrika Dr. Abebe Haile-Gabriel oo uu wehliyo wakiilka FAO Soomaaliya, Etienne Peterschmitt.

kulanka oo ay ka qayb galeen xubno ka tirsan golaha wasiirrada koonfur galbeed ayaa looga hadlay mashaariicda hay’adda FAO ka waddo guud ahaan koonfur galbeed iyo sidii loo hirgelin lahaa mashaariic hor leh oo loogu adeegayo bulshada ku nool guud ahaan koonfur galbeed.

Madaxweynaha Jamhuuriyadda Federaalka Soomaaliya, Mudane Dr. Xasan Sheekh Maxamuud, ayaa maanta khadka telefoonka kula hadlay Amiirka Dowladda Qatar, Mudane Sheekh Tamim Bin Hamad Al Thani.

Labada hoggaamiye ayaa si qoto dheer uga wada hadlay xoojinta xiriirka walaaltinimo ee ka dhexeeya labada dal, iyagoo muujiyay sida ay uga go’an tahay horumarinta iskaashiga dhinacyada kala duwan si looga mira dhaliyo danaha labada shacab

Sidoo kale, waxay hoosta ka xariiqeen muhiimadda ay leedahay kor u qaadidda wada shaqaynta labada dal si loo xoojiyo xiriirka adag ee ka dhexeeya Soomaaliya iyo Qatar.

Madaxweynaha dalka Kenya William Samoei Ruto ayaa xarunta Madaxtooyada dalka Kenya ku qabtay kulan gaara uu kula kulmayay dublomaasiyiinta dalalka shisheeye ee jooga dalka Kenya, danjiraha Soomaaliya u fadhiya Nairobi Jabriil Ibraahim Cabdulle ayaana Soomaaliya kulankaas ku matalayey.

“Waxaa la igu casuumay ka qeybgalka kulanka xogwareysiga ah ee uu Madaxweynaha Kenya William Samoei Ruto la qaatay dibloomsiyiinta fadhigoodu yahay magaalada Nairobi, kaasi oo ka qabsoomay Aqalka Madaxtooyada. Kulanka ayaa Dowlada Kenya ku soo bandhigtay kuna muujisay aragtida istaraatiijiyadeed ee Kenya ee ku aaddan dhanka horumarinta xiriirka caalamiga ah iyo in dib loo xaqiijiyo sida ay Kenya uga go’antahay sare u qaadida cilaaqaadka diblomaasiyadda iyo iskaashiga nabadda ee Gobalka”. Ayuu yiri Danjire Jabril.

Soomaaliya iyo Kenya waa labo dal oo daris ah kuwaas oo xiriirkoodu uu xiligaan maraayo heerkii ugu sareeysay. Madaxweyne Ruto ayaa soo hadalqaaday xiriirka labada dal iyo doowrka Dalka kenya ee ciidanka nabad ilaalinta ee Midowga Afrika oo ku sugan dalka Kenya. Waxa uuna sheegay in uu si buuxda u garab taagan tahay dalka Soomaaliya.

Wasiirka Wasaaradda Maaliyadda Xukumadda Federalka Soomaaliya Mudane Biixi Imaan Cige ayaa ka qeyb galay furitaanka shirka sanadlaha ah ee Hey’adaha Maaliyadda dalalka Carabta, Qeybta Horumarinta Dhaqaalaha meertadiisii 9-aad oo lagu qabanayo magaalada Dubai ee dalka Imaaraadka Carabta, iyada oo uu barbar soconayo kulanka Sanadlaha ah ee Kulanka Dowladaha Adduunka. 𝐖𝐨𝐫𝐥𝐝 𝐆𝐨𝐯𝐞𝐫𝐧𝐦𝐞𝐧𝐭𝐬 𝐒𝐮𝐛𝐦𝐢𝐭.

Wasiirka Maaliyadda Soomaaliya Mudane Biixi Imaan Cige oo furitaankii shirka ka khudbad kooban ka jeediyay ayaa waxa uu diiradda ku saaray arrimaha horumarinta Dhaqaalaha Soomaaliya iyo qorshayaasha maalgalineed ee mudnaanta gaarka ah ay siinayso Xukumadda Dan Qaran. Mudane Wasiir Biixi ayaa sidoo kale xusay sida ay Dowladda Soomaaliya uga go’an tahay hannaanka dib-u-habeynta Maaliyadda iyo casriyeynta ilaha dakhliga gudaha oo horseed unoqonaya horumar maaliyadeed.

Shirkaan ayaa waxaa sidoo kale qudbad ka jeedisay Kristalina Georgieva oo ah Madaxa Guud ee Hey’adda Lacagta Adduunka IMF, waxa ay dalalka carbeed ugu baaqday in ay abuuraan fursado dhaqaale oo lagu xoojinayo hannaanka ka soo kabashada aafooyinka, iyada oo fursado looga dhigayo bulshooyinka soo koraya.

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa ka qeyb galay furitaanka mashruuca Gole-Kaab oo isku xiri doona Golaha Shacabka iyo bulshada rayidka.

Guddoomiyaha Golaha Shacabka ee Baarlamaanka dalka oo si rasmi ah u daahfuray mashruucan ayaa marka hore bogaadiyay ururada bulshada rayidka oo soo qaban qaabiyay iyo dhinacyada ka taageeraya ayaa sheegay in Golaha Shacabka uu diyaar u yahay in ururada bulshada rayidka laga qeyb geliyo kulamada Golaha Shacabka si ay goobjoog ugu ahaadaan shuruucda uu Golaha ka doodayo maadaama Golaha Shacabka uu matalo shacabka Soomaaliyeed.

Furitaanka Mashruuca Gole-Kaab waxaa sidoo kale ka qeyb galay Xildhibaano ka tirsan Golaha Shacabka, Guddoomiyaha ururada bulshada rayidka iyo safiir kuxigeenka Midowga Yurub ee Soomaaliya.

Wasiirka Warfaafinta, Dhaqanka iyo Dalxiiska ee Jamhuuriyadda Federaalka Soomaaliya, Mudane Daa’uud Aweys Jaamac ayaa guddoomiyay shirka Guddiga Heer ee Wasiir ee Ka Hortagga Isticmaal Xumada Baraha Bulshada.

Shirkan ayaa daba jooga sidii loo fulin lahaa qaraarkii ka soo baxay Golaha Wasiirrada bishii hore ee la xiriiray maareynta isticmaalka khaldan ee baraha bulshada oo dadka qaar ay u adeegsadaan kicinta, hurinta colaadaha iyo arrimo kale oo anshaxa ka baxsan.

Wasiirka ayaa sheegay in Dowladda Federaalka Soomaaliya oo kaashaneysa hay’adaha kala duwan ee garsoorka ay ka go’an tahay in iyadoo la dhowrayo xoriyadda fikirka, haddana bulshada laga ilaaliyo wax kasta oo khatar gelinaya amniga, wadajirka, anshaxa wanaagsan iyo dhaqanka ay ummadda leedahay.

Shirkan ayaa lagu go’aamiyay in si degdeg ah loo guda galo fulinta qodobadii ku xusnaa qaraarka Golaha Wasiirrada ee maareynta isticmaalka khaldan ee baraha bulshada.

Ra’iisul Wasaare ku xigeenka Jamhuuriyadda faderaalka Soomaaliya Mudane Saalax Axmed Jaamac,ayaa maanta daah furay Mashruuca Ugbaad oo ah barnaamij lagu horumarinayo beeraha si ay ugu adkeystaan isbeddelka cimilada ee Soomaaliya iyadoo la ansixiyay 24-kii Oktoobar 2024 intii lagu jiray kulankii 40-aad ee Guddiga Sanduuqa Caalamiga ah ee Cimilada (GCF) oo ka dhacay Songdo, Koonfur Kuuriya.

Mashruucan waxa uu ujeedkiisu yahay xoojinta adkeysiga bulshooyinka iyo nidaamyada beeraha si ay ula qabsadaan isbeddelka cimilada, iyadoo la kaashanaayo dadaalada dib u habaynta dhulka si loo yareeyo saameynta taban ee cimilada. waxaana ka faa’iideysan doono ku dhawaad 2 milyan oo qof, wuxuuna taageeri doonaa dib u soo celinta iyo maareynta waarta ee dhul wax soosaar leh.

Munaasabadda waxaa goob joog ka ah Wasiirro ka tirsan xukuumadda , safiirro iyo masuuliyiin kale.

Wasiirka Wasaaradda Xanaanada Xoolaha Dhirta & Daaqa XFS Mudane Xasan Xuseen Maxamed ayaa kulan la qaatay kaaliyaha Agaasimaha Guud ee FAO ahna wakiilka Afrika

Dr. Abebe Haile-Gabriel, oo uu wehliyo wakiilka FAO ee Soomaaliya, Etienne Peterschmitt.

Labada masuul waxay ka wada hadleen muhiimadda xoolaha ay u leeyihiin dhaqaalaha iyo wax soo saarka dalka, horumarinta sharciyada iyo siyaasadaha dhirta iyo daaqa iyo sidii loo maareyn lahaa saameynta isbeddelka cimilada.

Ugu dambeyn Wasiirka Xanaanada Xoolaha Dhirta & Daaqa XFS Mudane Xasan Xuseen wuxuu adkeeyey sida ay dawladda Soomaaliya uga go’an tahay in horumar muuqda la gaarsiiyo bulshada xoolo dhaqatada iyo reer-guuraaga iyo sidoo kale ka gungaarida hindisaha dib-u-dhireynta iyo soo noolaynta dhul-daaqsimaadkii burburay.