Hey’adda Maareynta Musiibooyinka Qaranka ee SODMA iyo Hay,adda Gift of the givers ayaa gargaarkaan gaarsiiyey kaamamka barakacayaasha ee Ramaas, Damalay iyo Baryo-samo ee degmada Deyniile. Qoysaskaan oo ah kuwo mar dhow ka soo barakacay deegaanadoodii ayaa gaaraya 600 oo qoys, gaar ahaan gobollada Shabeelooyinka ayaa la sheegay in tirada ugu badan ee qoysaskaan ay ka soo barakaceen.
Ra’iisul Wasaare Ku-Xigeenka XFS oo Qaabilay Safiirka dowladda Denmark u fadhiya Soomaaliya
Ra’iisul Wasaare Ku-Xigeenka Xukuumadda Federaalka Soomaaliya Mudane Salax Axmed Jaamac ayaa maanta xafiiskiisa ku qaabilay safiirka dowladda Denmark u fadhiya Soomaaliya Steen Sonne Andersen, iyagoo ka wada hadlay xoojinta xiriirka labada waddan iyo arrimaha horumarka iyo xasilinta deegaannada laga xoreeyey khawaarijta.
Galmudug oo Bogaadisay qabashada ciidamada Qaranka ee Maanta Deegaanka Ceelhuur ee Gobolka Mudug
Bayaan ka soo baxay Madaxtooyada dowlad goboleedka Galmudug ayaa lagu bogaadiyey howlgal ciidamada xoogga dalka, daraawiishta Galmudug iyo ciidanka kacdoonka ee dib u xoreynta ay maanta Khawaarijta uga xoreeyeen deegaanka Ceelhuur ee gobolka Mudug.
Ciidamada Isra’iil oo toogasho ku dilay dhalinyaro falastiiniyiin ah
Ciidamada Isra’iil ayaa subaxnimadii hore ee maanta, labo dhalinyaro Falastiini ah ku dilay magaalada Jeniin ee waqooyiga daanta galbeed.
Wariyasha ka howlgala daanta galbeed ayaa sheegaya in labada wiil oo dhalinyarada ah oo lagu kala magacaabi jiray Ciza-Diin Xamaamra oo 24 sano jir ahaa iyo Amjad Khaliili oo isagana 23 sano jir ahaa, la dilay ka dib markii Gaari ay wateen ay Rasaas ku fureen Ciidamada Isra’iil, xilli ay marayeen tuulada Jaba, ee koonfurta Jenin.
Dilka dhalinyaradan ayaa qey ka ah dilal isdaba jog ah oo Ciidamada Isra’iil ay beryahii danbe u geeysanayeen muwaadiniinta reer Falastiin.
Dhanka kale, Dhaqdhaqaaqa wax iska caabinta Xamas, ayaa Jimcihii shalay Marinka Qaza, ka abaabulay howlgallo lagu taageerayo kooxaha wax iska caabinta si loo difaaco Masjidka Al-Aqsa.
Ciidamada Xoogga dalka oo la wareegay deegaanka Ceelhuur ee gobolka Mudug
Ciidanka Xoogga dalka oo kaashanaya xooggaga kacdoonka dadweynaha ayaa la wareegay gacan ku haynta degaanka Ceelhuur oo hoos taga degmada Xarardheere ee koonfurta gobolka Mudug.
Ciidamada gacanta ku dhigay degaanka Ceelhuur ayaa ka soo ruqaansaday degmada Hobyo, waxayna hadda ku daba jiraan firxadka Khawaarijta ka carartay deegaankaas.
Ciidamada xoogga dalka iyo dadka deegaanka ayaa guullo wax ku ool ah ka gaaray dagaalka ka dhanka ah Khawaarijtu, shacabka deegaannada la xorreeyay ayaa hadda ku nool nabad iyo horumar, iyadoo dowladdana ay dadaal xooggan gelisay sidii dadkaas ku heli lahaayeen adeegyada asaasiga ah ee ay u baahan yihiin.
Soomaaliya iyo Midowga Yurub oo xoojinaya iskaashiga ka dhaxeeya.
Soomaaliya iyo Midowga Yurub oo xoojinaya iskaashiga ka dhaxeeya.
Muqdisho, 14-01-2023 : – Wafdi uu hogaaminayo Wasiirka Arrimaha Dibedda iyo Iskaashiga Caalamiga ah ee xukuumadda Federaalka Soomaaliya Mudane Abshir Cumar Jaamac (Huruuse) oo maalmihii la soo dhaafay ku sugnaa magaalada Brussels ee xarunta Midowga Yurub ayaa kulamo natiijo wanaagsan ka soo baxeen la yeeshay madax sar sare oo ka tirsan Midowga Yurub.
Masuuliyiinta ay Wasiir Abshir Cumar Huruuse iyo wafdigii La socday la kulmeen waxaa ka mid ahaa Wakiilka sare ee arrimaha dibedda, siyaasadda iyo amniga u qaabilsan Midowga Yurub mudane Josep Borrell iyo 27 danjire ee wadamada Yurub u jooga xarunta Brussels, waxayna kala hadleen qorshayaasha hor-tebinta u leh dowladda Federaalka Soomaaliya iyo siday muhiimka u tahay garab istaagga Midowga Yurub.
Wasiirka oo ay weheliyaan saraakiil sar sare oo ka kala socday xafiisyada Madaxweynaha, Raisul Wasaaraha iyo Wasaaradda Arrimaha Dibedda iyo Iskaashiga Caalamiga ayaa madaxda Midowga Yurub kala hadlay taageerada xagga laamaha ammaanka , dib u heshiisiinta , kor u qaadidda horumarinta dhaqaalaha iyo dowlad wanaagga.
Kulamada dhex-maray wafdiga dowladda Federaalka Soomaaliya iyo Midowga Yurub ayaa lagu soo qaaday sidii kuwa guulaysta ay u noqon lahaayeen mashaariicda ay Midowga Yurub ka wadaan Soomaaliya iyagoo la waafajinayo qorshaha horumarinta qaranka ee Xukuumadda Federaalka Soomaaliya.
Wafdiga Wasiir Abshir Cumar Jaamac ( Huruuse) ku weheliyay shirarkan muhiimka ah waxaa ka mid ahaa Aways Xaaji oo ah madaxa la-taliyayaasha Madaxweynaha, Xuseen Macalin la-taliyaha amniga qaranka, Axmed-Nuur Maxamed oo ah la-taliye sare xafiiska Raisul Wasaaraha, Jibriil Aw Maxamed la-taliyaha siyaasadda dibadda ee wasiirka Arrimaha Dibadda iyo Iskaashiga Caalamiga iyo Danjire Yoonis Xaashi oo ah safiirkeenna Brussels.
Digniin dhanka Hawada ah oo looga dhawaaqay koonfurta Ukraine
Digniin dhanka hawada ah ayaa looga dhawaaqay gobollada kala ah Kherson, Zaporizhia, Mykolaiv iyo Odessa ee dhaca koonfurta dalkaasi Ukraine.
Wararka la xariira digniintan ayaa soo baxay goor dhaw, kadib markii sida la sheegay la helay warar xaqiijinaya in duqeyma xooggan ay ka dhacayaan gobollada Kherson, Zaporizhia, Mykolaiv iyo Odessa oo dhamaantood dhaca koonfurta Ukraine.
Maamulka Kharkiv ee Ukraine ayaa ku dhawaaqay duqeeymo loo adeegsanayo Gantaalaha S-300 ay ka dhacayaan aagga warshadaha ee koonfurta Ukraine.
Iiraan oo dil toogasho ah ku Xukuntay Wasiir ku xigeenkii hore ee Gaashaandhiga
Garsoorka Iiraan, ayaa Maanta oo Sabti ah, ku dhawaaqay fulinta xukunka dilka ah oo lagu riday Wasiir ku xigeenkii hore ee Gaashaandhigga Iiraan, Cali Reza Akbari, kaasoo lagu helay inuu la shaqeynayay basaasiin u dhashay Britain.
Maxkamadda sare ee Iiraan ayaa horey Garsoorka ugu taageertay xukunkii dilka ahaa ee lagu riday Akbari, kadib markii lagu helay dambi ah inuu Gacan saar la lahaa sirdoonka Britain.
Cali Reza Akbari, ayaa la xiray intii u dhaxeysay sanadahii 2019-2020, waxaana la sheegay in uu heystay dhalashada Britain.
Cali Reza Akbari, waxa uu xilka Wasaaradda Difaaca qabtay intii u dhaxeysay 1999-2005, xilligaasi oo uu dalka xukumayay Madaxweyne Maxamed Khatami.
Mareegta Mizan Online, ayaa Arbacadii hore sheegtay, in Akbari, lagu xukumay dil toogasha ah, ka dib markii lagu soo eedeeyay inuu waxyeello u geeystay amniga gudaha iyo dibadda ee dalka, isaga oo sidokale u gudbiyay macluumaadka sirta ah Boqortooyada Ingiriiska.
Shirka Banbaxa Maamulka Gobolka Banaadir oo maanta lasoo gabagabeeynayo
Shirka Banbaxa Maamulka Gobolka Banaadir iyo Dowladda Hoose ee Xamar ayaa maanta qorshuhu yahay in la soo gaba-gabeeyo, Shirka ayaa looga hadlay qodobo saldhig u ah howlaha hortabinta u leh shanta sano ee soo socota.
Shirkaan ayaa lagu wadaa in war murtiyeed laga soo saari doono
Ciidamada Booliska oo fuliyay howlgallo ay dad ku soo qab-qabteen
Ciidanka Booliiska Soomaaliyeed, gaar ahaan kuwooda ka howlgalo Saldhigga degmada Howlwadaag ee gobolka Banaadir, ayaa gacanta ku soo dhigay labo Nin oo hubaysan oo loo heysto inay dhac u geysteen dadka deggan xaafadaha kala duwan ee degmada Howlwadaag, Ciidanka ayaa labadaan Nin ka qabtay gudaha suuqa weyn ee Bakaaraha.
Dhanka kale, Ciidanka Booliiska Saldhigga degaanka Ceelasha Biyaha ee duuleedka magaalada Muqdisho ayaa xalay soo qabtay labo ka mid ah koox ka Ganacsata waxyaabaha maanka-dooriya, kuwaas oo xilliga la soo qabtay ku iibinayay goob ay ku lahaayeen degaanka Ceelasha Biyaha.
