Wasiirka Wasaaradda Beeraha iyo Waraabka Xukuumadda Federaalka Soomaaliya Mudane Maxamed Cabdi Xayir Maareeye, oo kulan wadahadal ah la qaatay Madaxda Dowlad Goboleedka Koonfur Galbeed, ayaa sheegay in u jeedka socdaalkoodu la xiriiro fulinta qorsho howleedyo ku aadan sidii loo heli lahaa wada shaqeyn dhexmarta Beeraleyda Soomaaliyeed iyo Dowlad Goboleedyada.

Wasiirka Beeraha iyo Waraabka, ayaa sheegay in Dowladda ay ka shaqeyneyso sidii Beeraleyda ay u heli lahaayeen qalab iyo in laga saacido xagga maalgalinta iyo ka hortagga Cayayaanada ee saameynta ku yeesha nuucyada kala duwan ee dalagyada.

Socdaalkaan oo ah kii labaad ee madaxda Wasaaradda Beeraha ay ku tagaan Magaalada Baydhabo, ayaa loogu magacdaray socdaalka tacbashada Beeraha iyo la qabsiga is badalka cimilada,iyadoo horay loo soo maray deegaanka Galmudug.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo hambalyo iyo bagoodin u jeediyay,Wasaaradda Waxbarashada Xukuumadda Federaalka Soomaaliya,Sida ay iskugu howshay hormarinta waxbarshad.

” Sida ay deeganno cusub sanadkaan ugu hirshay inay ka qeybgalaan Imtixaanka,Ayaan kuwa harsan ee cadowga gacanta ku hayaan uga saaridoonaa, si ardayda Soomaaliyeed u wada helaan waxbarasho isku mid ah”.

Heer kasto oo aan maanta ku tillaabsanay dal iyo dibadba,Waxaa hormuud u ah amniga,In arday Soomaaliyeed oo 3,000kun kabad Imtixaanka galaan,Wasaarada Waxbarashada kaliya kama shaqeyn,Ee Hay’adda dowladda oo iskaashaday ku timid.

Dal waxa uu ku dhismaa sidiisaba iskaashi, waana waddada saxdaa oo ay dowladi ku hormari karto, ummad kalene kula tartami karto,Waana wadada saxdaa aan qaadnay hadda.Inta yar ee inooga harsan,Guulaha waxaan rajaynaynaa inaan sidaan iskula shaqayno.

Runtii Wasaaradda Waxbarashada Sanadba sanadka ka dambeeyo,waxa ay ku talaabsanaysaa hormin mug-iyo misaan leh ayay ku talaabsatay Waxbarashada waxaa loo yeelay tayo,Wadan inow hormaraayo waxaa lagu oggadaa akhoonyahanada usoo baxaayo dalkaas inaad eegto,Anage waa ay muuqataa,Inaan isbadal sameynay oo dhanka Tacliinta ah.Shacabka Soomaaliyeed waa inay ku kalsoonadaan, Dowladooda iyo madaxda ay u idmadeen dowladnimada, Inaan iskaashano ayaan guul ku gaari karnaa.

Mas’uuliyiin ka tirsan Dowladda Faderaalka iyo maamulka Jubbalanad oo maalmahaan ku sugnaa Degmada Luuq, ayaa soo saaray war-saxaafadeed ku saabsanaa xal u helidda colaadihii sokeeye ee dhexmaray bulshada ku dhaqan degmadaasi.

War saxaafadeedkaan, ayaa dhigaya in loo hoggaansamo xabad joojin shuruud la’aan ah iyo in la badbaadiyo hantida shacabkii barakacay,in laga wada qeybqaato nabadda , in dadku ay ku soo laabtaan guryahooda iyo in loo diyaargaroobo wadaxaajood ay ka qeybgalaan dhinacyadii ku dagaalamay halaasi

Wafdigii ka qeybgalay heshiisiinta bulshada ku sugan Degmada Luuq waxaa kamid ahaa Wasiir Dowlaha Wasaaradda Deegaanka iyo Isbedelka Cimilada Xukuumaadda Federaalka Mudane Axmed Cumar Maxamed iyo Madaxweyne Ku-xigeenka 1-aad ee Maamulka Jubbaland.

Heshiiska nabadeed ee la dhexdhigay dadka walaalaha ah ee ku dhaqan Degmada Luuq waxaa kaloo ka qeybgalay maamulka Degmada Luuq, Saraakiisha Ciidamada,Odayaal dhaqameedyo iyo wax garad kale.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa Guddoomiyay Shirka Guddiga Qaran La-dagaallanka Lacag-dhaqidda iyo Ka-hortagga Maalgelinta Argagaxisada oo ku qabsoomay Xafiiska Amniga Qaranka ee Xarunta Madaxtooyada.

Guddiga ayaa Madaxweynaha Jamhuuriyadda la wadaagay warbixinno ku saabsan guulaha laga gaaray xakamaynta ilaha dhaqaale ee Khawaarijta iyo qorsheyaasha cusub ee lagu wajahayo xeeladaha dhaqaale abuurka Argagixisada, iyaga oo soo bandhigay Shaqsiyaad ka tirsan Khawaarijta oo lagu soo rogayo cuna-qabatayn dhaqaale.

Madaxweyne Xasan Sheekh, ayaa dul istaagay muhiimadda dagaalka ka dhanka ah dhaqaalaha Argagixisadu u leeyahay ciribtirka Khawaarijta iyo nabad kusoo dabaalidda dalka, isaga oo faray mas’ulliyinta ku mideysan guddigan in la dar dar geliyo qorsheyaasha burburinta ilaha dhaqaale ee Khawaarijta iyo ciribtirka khataraha maaliyadeed ee dalka, gaar ahaan lacag dhaqidda.

Guddoomiye kuxigeenka koowaad ee Golaha Shacabka Baarlamaanka Jamhuuriyadda Federaalka Soomaaliya Sacdiya Yaasiin Xaaji Samatar oo gaartay Magaaladda Toronto ee Wadanka Canada, ayaa waxaa halkaasi si weyn ugu soo dhoweeyay jaaliyadda Soomaaliyeed ee ku nool Magaaladda Toronto.

Guddoomiye ku-xigeenka koowaad ee Golaha Shacabka Sacdiya Yaasiin Xaaji Samatar oo booqashadeeda maalmo qaadan doonta, ayaa mudada ay halkaasi joogto waxa ay kulamo la qaadan doontaa qeybaha kala duwan jaaliyadda Soomaaliyeed ee ku nool Magaaladda Toronto ee wadanka Canada.

Wasiirka Wasaaradda Dhalinyaradda Cayaaraha Galmudug Cabdiwahaab Sheekh Abuukar Nuur oo ay wehliyeen, Wasiir ku-xigeenka Wasaaradaasi Cabdiraxmaan Maxamed Axmed, Guddoomiyaha Xariirka kubadda Cagta Soomaaliyeed Cali Cabdi Maxamed (Cali shiine) Gudoomiyaha Xiriirka Kubadda Cagta Galmudug, Guddoomiye Ku-xigeenka Dagmada Gaalkacyo Maxamed Cabdi Cilmi iyo xubno ka mida bahda Isboortiga Gobalka mudug oo si wada jir ah u kormeeray Garoonka kubadda Cagta Cabdullaahi Ciise.

Mas’uuliyiinta Kormeerka ku tagay Garoonka, ayaa intii ay ku guda jireen kormeerka waxa warbixin guud ka siiyay xaalada garoonka iyo baahida loo qabo Guddoomiye ku-xigeenka dagmada Gaalkacyo injineer Maxamed Cabdi Cilmi, ” Ciyaaraha waa jimicsi,Marne waxa ay qeyb ka yihiin caafimaadka qofka,Garoonkaan waxa uu ka mid ahaan meelaha,Ay iskugu immaan jireen kummaan dhallinyaro ah,Halkaas waxaa ka dhallan jiray is dhaxgal bulsho”.

Guddoomiyaha kubadda Cagta Soomaaliyeed ayaa inta uu joogo Gaalkacyo,waxaa qorshahiisa ka mid ah inow dhiso Garoonka Kubadda Cagta Cabdullaahi Ciise.

Madaxweynaha Dowlada Koonfur Galbeed Mudane Cabdicasiis Xasan Maxamed Laftagareen, ayaa Guddoomiyey Shirka Toddobaadlaha ahaa ee Golaha Wasiirada oo lagu Ansaxiyey Hindise Sharciyeedka Xakamaynta Hubka Yar Yar iyo Hindise Sharciyeed Xuquuqda Naafada oo ay soo Diyaariyeen Wasaaradaha Amniga iyo Haweenka.

Wasiirada Wasaaradaha Beeraha, Waxbarashada, Dastuurka iyo Arimaha Gudaha, ayaa sido kale laga Dhagaystay Warbixino ku Saabsan Howlaha Shaqo ee Wasaaraddaha.

Labadaan sharci oo ay ansixiyeen Golaha Wasiirrada Maamul goboleedka Koonfur Galbeed Soomaaliya,Ayaa ah laba sharci oo aad muhiim ugu ahaa,Shacabka Koonfur Galbeed Soomaaliya oo ay sugayeeen.

Guddoomiyaha Gobolka Banaadir ahna Duqa Magaalada Muqdisho Mudane Yuusuf Xuseen Jimcaale (Madaale), ayaa dhagax dhigay waddo Laami ah oo laga hirgelinaayo Degmada Daarusalaam ee Magaalada Muqdisho.

Duqa Muqdisho ayaa boogaadiyay iskaashiga ka dhaxeeya Bulshada, Ganacsatada iyo Maamulka Degmada ee lagu horumarinaayo Kaabayaasha isku socodka waddooyinka, asigoona xusay in Barnaamijka dalkaaga ku dhiso hal doolar loogu gol leeyahay in Bulshada ay iyadu isku tashato isla markaana ay qeyb ka noqdaan horumarka dalka.

Munaasabadda dhagaxdhiga waxaa goobjoog ka ahaa Guddoomiyaha Degmada Daarusalaam Mudane Maxamed Cabdiraxmaan Maxamuud, Madax ka socotay Salaam Bank oo iyagu gacan ka geysanaya dhismaha wadadaan iyo qeybaha kala gedisan ee Bulshada Degmada Daarusalaam.

Wasiirka Wasaaradda Warfaafinta, Dhaqanka iyo Dalxiiska Dowladda Federaalka Soomaaliya, Mudane Daa’uud Aweys Jaamac iyo Wasiirka Wasaaradda Isgaarsiinta iyo Boostada ee Jamhuuriyadda Jabuuti.Mudane Ridwaan Cabdullaahi Bahdoon ayaa goobjoog ka ahaa munaasabadda saxiixa Iskaashiga, wadashaqeynta iyo mataaneynta Warbaahinnada Qaranka ee Soomaaliya iyo Jabuuti.

Munaasabadda oo lagu qabtay Xarunta Wasaaradda Warfaafinta iyo Isgaarsiinta Jabuuti waxaa khudbado ka jeediyey labada Wasiir ayadoo ugu horeyn Wasiirka Wasaaradda Warfaafinta, Dhaqanka iyo Dalxiiska Soomaaliya Mudane Daa’uud Aweys Jaamac uu tilmaamay in maanta ay tahay maalin taariikhi ah oo si rasmi ah loo mataaneeynayo Warbaahinta Qaranka labada Dowladood, isla markaana ay iskaashi wada shaqeyneed rasmi u yeelan doonaan .

Dhinaciisa Wasiirka Wasaaradda Warfaafinta, Boostada iyo Isgaarsiinta Jamhuuriyadda Jabuuti Mudane Ridwaan Cabdullaahi Bahdoon, ayaa soo dhaweyn kadib waxa uu tilmaamay in dhankooda ay diyaar u yihiin fulinta Iskaashigan iyo iney khibrad is dhaafsi iyo wadashaqeyn la yeeshaan walaalahooda Soomaaliyeed, isagoo Wasiirka Warfaafinta Soomaaliya uga mahadceliyay wada shaqeyntiisa.

Iskaashigan shaqo ee ay maanta ku kala saxiixdeen magaalada Jabuuti Warbaahinnada Qaranka labada dal, Waxaa dhanka Soomaaliya u saxiixay Agaasimaha Radio Muqdisho Cabdifataax Daahir Jayte, halka uu Jabuuti uu u Saxiixay Agaasimaha Guud ee Raadiyaha iyo Telefishinka Jabuuti Aadan Cabdi Jaamac.

Munaasabadda waxaa sidoo kale Goobjoog ka ahaa Danjiraha Soomaaliya u fadhiya Jabuuti, Mudane Salaad Cali Jeelle, iyo Danjiraha Jabuuti u fadhiya Soomaaliya Mudane Maxamed Rashiid.

Dhinaca kale Wasiirka Wasaaradda Warfaafinta, Dhaqanka iyo Dalxiiska Soomaaliya Mudane Daa’uud Aweys Jaamac iyo wafdigiisa oo booqasho rasmi ah ku jooga dalka Jabuuti, ayaa kormeeray Xarunta Raadiyaha iyo Telefishinka Jabuuti ee RTD halkaasi oo loogu sharaxay sida ay u shaqeeyaan.