Ra’iisul Wasaare ku-xigeenka Soomaaliya Mudane Mahdi Maxamed Guuleed oo ay wehliso Wasiirka Wasaaradda Gargaarka iyo Maareynta Musiibooyinka ee Xukuumadda Soomaaliya Drs Maryan Qaasim Axmed ayaa maanta si wada jir ah u daah furtay xarunta Qaranka iskudabaridka Arrimaha gargaarka, kaasi oo ujeedkiisuyahay nidaamka lagu hagaajinayo xiriirka iyo isu-duwida hay’adaha gargaarka iyo dowladda.

Kulanka waxaa sidoo kale ka qeybgalay Wasiirada Warfaafinta, Caafimaadka, Xildhibaanno, safiiro iyo mas’uuliyiin ka socday hay’adaha samafalka.

Qaar ka mid ah Wakiilada Hay’adaha Samafalka ayaa sheegay inay diyaar u yihiin la shaqeynta xafiiskan cusub, si loo maareeyo deeqaha loogu talagalay shacabka Soomaaliyeed.

Safiirada Turkiga iyo Masar ee Soomaaliya u jooga ayaa si isku mid ah u soo dhaweeyay xafiiska cusub, waxaana ay balan qaadeen inay dhankooda gacan ka geysan doonaan sidii deeqaha loo marsiin lahaa xafiiskaasi.

Wasiirka Wasaaradda Gargaarka iyo Maareynta Musiibooyinka ee Xukuumadda Soomaaliya Drs Maryan Qaasim Axmed sheegtay in xafiiskan uu yahay mid lagu maareynayo deeqaha loogu talagalay shacabka Soomaaliyeed, si aysan u dhicin is bar baryaac

Wasiirka Caafimaadka iyo Daryeelka bulshada ee Xukuumadda Soomaaliya Drs Fawziya Abiikar Nuur ayaa tilmaamtay in ka Wasaarad ahaan ay isgarab taagi doonaan xafiiskan cusub, ayna diyaar u yihiin inay howlwadeenno caafimaad u diraan meelaha dadka ku soo barkacay si loogu sameeyo adeegyo caafimaad.

Wasiirka Warfaafinta iyo Hanuuninta dadweynaha ee Xukuumadda Soomaaliya Eng, Cumar Cabdiraxmaan Yariisow ayaa soo dhaweeyay hirgelinta xafiiskan, isla markaana looga fadhiyo inuu maareeyo deeqaha loogu talagalay shacabka.

Ra’iisul Wasaare ku-xigeenka Soomaaliya Mudane Mahdi Maxamed Guuleed ayaa sheegay in sababta loo dhisay Wasaaraddu ay tahay inay odo-rasto abaaraha iyo waxyaabaha sababay musiibooyinka, iyadoo looga fadhiyo in Wasaaraddu ay keento qorshe looga hortagi karo abaaraha ragaadiyay dalka, isagoo xusay in xafiiska cusub uu wax badan ku soo kordhin doono arrimaha maareynta gargaarka.

Guddoomiyaha golaha shacabka Soomaaliya mudane Maxamed Sheekh Cismaan oo shir guddoominayay kulanka Xildhibaananda ay ku yeesheen xarunta Golaha Shacabka ayaa ugu horeyn Mudanayaasha u faahfaahiyay qaraar ka hadlaya buuxinta kuraasta ka banaan Golaha, kaasi oo ku saabsan in guddiga Madaxa banaan ee doorashooyinka loo wakiisho labada kursi ee Baarlamaanka ka dhiman, kuwaasi oo kala ah kursiga Xildhibaan Cabdullaahi Sanbaloolshe oo noqday Taliyaha Hay’ada Nabad sugidda iyo Sirdoonka Qaranka iyo hal Xildhibaan oo geeriyooday.

Guddoonka ayaa codgeliyay qaraarka oo ku saabsanaa qaabka loo maamulayo kuraasta ka maqan Baarlamaanka ee dhanka guddiga Madaxa Banaan ee doorashooyinka, waxana 128 mudane ay ogalaadeen in guddiga loo dhiibo arrinta ku aadan soo dhameystirka kurasta Baarlamaanka, halka ay diideen 16 mudane, waxaana ka aamustay lix mudane.

Guddoomiye Maxamed Sheekh Cismaan Jawaari ayaa sheegay in hadda kadib kursiga Xildhibaankasta ee Banaanaada uu  ku imaan doono sida markii hore lagu soo doortay, isago intaa ku daray in wixii qilaaf ah ee ka dhasha arrintaas loo gudbin doono Maxkamadda sare ee dalka.

Dhanka kale Xildhibaan Cabdullaahi Sheekh Cismaan oo ka mid ahaa Xildhibaannadii keenay mooshinka ku aadan heshiiska dekadda Berbara ee lala galay dalka Isutaga Imaaraadka ayaa codsaday in ajandaha maanta lagu soo daro, si ay Xildhibaannada uga doodaan, waxaana guddoomiyaha Baarlamaanka uu talo ahaan soo jeediyay, maadaama faah faahin dheeri ah laga heynin heshiiskaasi in laga warsugo dhanka Xukuumada, taasi oo ay ku raaceen Xildhibaanada.

Intaas kadib Shir guddoonka golaha shacabka ayaa waxa ay go’aamiyeen in mooshinka ku saabsan heshiiskii dekadda Berbara loo gudbiyo Xukuumadda Soomaaliya si xog dheeraad ah looga helo heshiiskaas.

Dajnirihii hore ee safaaradda Soomaaliya u fadhiyay Wadanka Kenya, haatanna ah Wasiirka Qosheynta, Maalgashigga iyo Horrumarinta dhaqaalaha  Mudane Jamaal Maxamed Xasan ayaa maanta xilka safiirnimo si KMG ah ugu wareejiyay qunsulka safaaradda mudane Cali Maxamed Sheekh Cali Bagadi, kaddib munaasabad lagu qabtay xarrunta safaaradda.

Munaasabadda ayaa waxaa ka soo qeybgalay Xasan Abshir Faarax, safiirka dowladda Soomaaliya u fadhiya wadanka Indonesia, Xildhibaanno ka tirsan Baarlamaanka Soomaaliya, diblomumaasiyiin iyo shaqaalaha Safaaradda.

Jamaal Maxamed Xasan ayaa galka safaaradda ku wareejiyay Mudane Cali Maxamed Sheekh Cali Bagadi oo ah ku simaha safiirka ahna qunsulka safaaradda, waxaana warbaahinta si wadajir ah ula hadlay safiirkii hore ahna Wasiirka Qosheynta, Maalgashiga iyo Horrumarinta dhaqaalaha   Mudane Jamaal iyo C/raxmaan Kampala oo ah safiir ku xigeenka ahna qunsulka koowaad ee magacaaban.

ku simaha safiirka ahna qunsulka safaaradda Mudane Cali Maxamed Sheekh Cali Bagadi oo isna goobta ka hadlay ayaa u mahadceliyay Danjire Jamaal, isagoo ku ammaanay wax qabad mudadii uu xilka safariinimo hayay.

Ugu dambeyn ku simaha safiirka ahna qunsulka safaaradda Mudane Cali Maxamed Sheekh Cali Bagadi  ayaa shahaado sharad goobta ku guddoonsiiyay safiirkii hore ee safaaradda Soomaaliya ee wadanka Kenya, taas oo ku saabsaneyd wax qabadka dajirihii hore ee Wadanka Kenya.

Muqdishi-(SONNA)- Guddoomiyaha Degmada Beledweyne Maxamed Axmed Food Cadde ayaa sheegay in kaamam dadka abaarta saameysay lagu quudiyo ay ka hirgeliyeen magaalada Beladwayne ee xarunta gobolka Hiiraan, kadib markii uu tilmaamay inay jireen dad u dhintay abaarta darteed.

Guddoomiyaha oo la hadlay Radio Muqdisho ayaa sheegay in qoysas badan oo abaartu saamaysay ay soo gaareen Baladwayne, waxaana uu intaa ku daray in magaalada ay ka hirgaliyeen xarumo dadka soo barakacay lagu quudiyo oo ay ku siiyaan cunto bisil, maadaama ay xaalado adag oo xagga nolosha ah ay ku suganyihiin qoysaska barakacayaasha ah.

Guddoomiyaha Degmada Beledweyne Maxamed Axmed Food Cadde ayaa tilmaamay in maleeshiyaad ka tirsan Al-Shabaab ay xalay degmada ku dileen Nabadoon caan ah, isagoo intaa ku daray inay ku raad joogaan sidii ay gacanta ugu soo dhigi lahaayeen kooxihii ka dambeeyay dilka Nabadoon Mustaf Maxamed Dhicisow.

Muqdisho-(SONNA)- Guddoomiyaha ururka Haweenka Gobolka Banaadir Jawaahir Baarqab ayaa sheegtay inay soo dhaweynayaan go’aannada dowladda ee ku aadan ciribtirka Al-Shabaab, la dagaallanka musuq maasuqa iyo faqriga, ayna diyaar u yihiin inay doorkooda ka qaataan kaalinta uga aadan arrintaan

Guddoomiyaha ururka Haweenka Gobolka Banaadir Jawaahir Baarqab oo la hadashay Radio Muqdisho ayaa sheegtay in haweenku ay diyaar u yihiin inay ka qayb qaataan kaalinta uga aadan sidii dalka oo dhan looga cirib tiri lahaa maleeshiyaadka Al-Shabaab.

Marwo Jawaahir waxay xustay inay soo dhaweynayaan kormeerka Ra’iisul Wasaaraha Soomaaliya Mudane Xasan Cali Kheyre uu ku tegayo xarumaha hay’adaha dowladda, si uu ugu kuurgalo hanaanka shaqo ee hay’adaha dowladda, waxayna ay ku tilmaamtay inay tahay tallaabo ku dayasho mudan.

Guddoomiyaha ururka Haweenka Gobolka Banaadir ayaa haweenka Soomaaliyeed ka codsatay inay la shaqeeyaan laamaha amniga ee dowladda, si looga hortago dhagarta ay maleegayaan argagixisada Al-Shabaab.

Muqdisho, 19, April 2017——Shir uu soo qaban qaabiyey Xafiiska Ra’iisul Wasaaraha qaybtiisa Tayeeynta Hay’adaha Dowladda ayaa lagu qabtay magaalada muqdisho, waxaana shirka ka soo qayb galay dhamaan wasiirada iyo wakiilo ka kala socday Hay’adaha ka fa’iidaysanaya Mashruuca Tayeeynta Hay’adaha dowlada (Capacity Injection Program CIP) oo uu maalgaliyo Bangiga Aduunka.

Ugu horayntii Isku duwaha Mashruuca Maxmed Farax ayaa ka warbixiyey heerarka kala duwan ee uu soo maray iyo sida looga fa’iisaydatay mudadii uu jiray iyo mustaqbalka sida looga fa’iidaysan karo.

“Waxaa kulankaan u jeedkiisu yahay inaan la wadaagno Hay’adaha ka fa’idaysta mashruuca warbixina kasiino halka uu ka soo bilowday, hadafka laga leeyhaya iyo doorka ay ku leeyihiin dhinacyada ka soo qayb galay. Waxyaalaha Mashruucaan qabanayo waxaa ka mid ah tayeenta shaqaalaha iyo awood dhisida hay’daha dowladda ee lafdhabarka u ah shaqoyinka maalinlaha ah, xoojinta iyo tageerida dhinacyada asaasiga u ah ka shaqeynsiitna nidaamka dowlaiga si loogu istaajiyo qaab wax qabad leh oo la wada dhan yahay, lehna isla xisaabtan qeybaha dowladda ee heer federal” ayuu yiri Maxamed Faarah.

Wasiiru dowlaha xafiiska Ra’iisul Wasaaraha XFS mudane Cabdullahi Xaamud ayaa la hadlay saxaafada shirka kadib isagooona sheegy in madaama ay dhalatay xukuumad cusub ay lagama maarmaan tahay in xog laga siiyo wasiiradda halka u marayo iyo qaybaha ay ku leeyihiin mashruucaan.

“Waxaan u mahadcelinayaa hay’adaha dowaldda ee ka soo qaybgalay kulanka xog siinta hay’adaha uu khuseeyo mashruucaan, waxaana dowaldda kala shaqeeya Bangiga Aduunka, waxaana mashruuca qaybtiisa hore laga hirgaliyey qaar ka mid ah maamul goboleedyada dalka, Waxaan u qabanay shirkaan inaan ogaano meesha u baahan tayaynta” ayuu yiri Wasiir Xaamud.

Mashruucaan ayaa waxaa ka fa’iidaysata Xafiiska Madaxweynaha, Xafiisaka Ra’iisul Wasaaraha, Wasaaradda Maaliyadda, Wasaaradda Macdanta iyo Biyaha, Wasaaradda Howlaha Guud, Wasaaradda Shaqada iyo Shaqaalaha, Wasaaradda Beeraha, Wasaaradda Qorsheeynta Qaranka, Gudiga Shaqaalaha Rayidka iyo Bangiga Dhexe, waxa kale oo mashruucaan ka fa’iidaysta qaar ka mid ah Maamul goboleedyada dalka.

Mashruucaan ayaa wuxuu salka ku hayaa isbadalkii dhacay Augst 2012 oo Soomaaliya ay ka gudubtay marxaladii KMG ahayd, waxaana shirkii Brusseles ee 2013-kii la isla qaatay in la hirgaliyo mashaariic ay dowladda Soomaaliya garwadeen ka tahay, waxaana barnaamijkaan laga taakuleyaa sanduuqa loo yaqaan Somali Multi Partner Fund (SMPF) iyadoo deeqdaasna la soo marsiiyo Bangiga Aduunka.

—-DHAMMAAD—-

Guddoomiyaha ururka Haweenka Gobolka Banaadir Jawaahir Baarqab ayaa sheegtay inay soo dhaweynayaan go’aannada dowladda ee ku aadan ciribtirka Al-Shabaab, la dagaallanka musuq maasuqa iyo faqriga, ayna diyaar u yihiin inay doorkooda ka qaataan kaalinta uga aadan arrintan.

Guddoomiyaha ururka Haweenka Gobolka Banaadir Jawaahir Baarqab oo la hadashay Radio Muqdisho ayaa sheegtay in haweenku ay diyaar u yihiin inay ka qayb qaataan kaalinta uga aadan sidii dalka oo dhan looga cirib tiri lahaa maleeshiyaadka Al-Shabaab.

Jawaahir Baarqab ayaa xustay inay soo dhaweynayaan kormeerka Ra’iisul Wasaaraha Soomaaliya Mudane Xasan Cali Kheyre uu ku tegayo xarumaha hay’adaha dowladda, si uu ugu kuurgalo hanaanka shaqo ee halkaasi ka socda, waxaana ay ku tilmaamtay inay tahay tallaabo ku dayasho mudan.

Guddoomiyaha ururka Haweenka Gobolka Banaadir ayaa haweenka Soomaaliyeed ka codsatay inay la shaqeeyaan laamaha amniga ee dowladda, si looga hortago dhagarta ay maleegayaan argagixisada Al-Shabaab.

Mogadishu (SONNA) – Wasiirka Warfaafinta ee Dowlada Federaalka Soomaaliya Mudane Cabdiraxmaan Cumar Cismaan (Eng. Yarisow) oo kulan la qaatay mas’uuliyiinta Hay’ada TEDxMogadishu ayaa soo dhoweeyey isla markaasna dhiirigeliyey Bandhiga TEDxMogadishu oo maalinta Khamiista 20ka April 2017 laguna qaban doono Muqdisho, Soomaaliya.

Wasiir Eng. Yarisow ayaa yiri “TEDxMogadishu waxey ku ammaananyihiin doorkooda ay bulshada ku gaarsiinayaan horumarka dalka ka jira oo ay marwalba ku soo bandhigaan sawiro, barnaamijyo, farshaxan, sawir gacmeed iyo sida ay marwalba uga shaqeeyaan isdhexgalka bulshada Soomaaliyeed. Dowladda Federaalku waxey aad u soo dhoweyneysaa Bandhiga TEDxMogadishu ee sanadkan oo ay mowduuc uga dhigeen Iskaa Wax U Qabso si bulshada loogu dhiirigeliyo inay dalkooda dhistaan.”

Caasimadda Muqdisho ayaa ah mid dib u soo bilicday oo bulshada Soomaaliyeed ay ku muujiyeen sida ay wax u qabsan karaan, oo dhalinyarada, ganacsatada iyo qeybaha kale ee bulshadu ay maalin walba door ka qaataan quruxda iyo bilicda Muqdisho iyo gobollada kale.

Wasiir Eng. Yarisow ayaa yiri “Soomaalidu waa dad ku fiican ganacsiga, is-dhexgalka, is-kaalmeynta iyo gancsi-wadaaga oo keentay in shacabku ay dalkooda dib u dhistaan. Waxaana farxad ah in TEDxMogadishu ay sanadkan 2017 mowduuca ay xusheen uu noqday Iskaa Wax U Qabso oo Soomaalida taariikh weyn ku leh, ahaana mashruucii dalka lagu soo dhisay oo ay bulshadu si hagar la’aan ah uga wada qeybqaateen. Maantana waxaa la joogaa waqtigii dib loo soo nooleyn lahaa barnaamijkaas Iskaa Wax U Qabso.”

Telefishinka Qaranka ee SNTV ayaa si toos (live) ah u soo tabin doona bandhiga TEDxMogadishu, Khamiista 20ka April 2017, iyadoo qof walbana laga codsanayo inuu kaalin ka qaato sidii quruxda iyo horumarka dalka ka jira loo gaarsiin lahaa caalamka si fikirka laga qabo Soomaaliya loo saxo. Soomaaliya Soomaali baa iska leh, sidaas daraadeed qof kale kuuma qabanayo howshaada oo ah soo celinta sharafta iyo karaamada ummada Soomaaliyeed.

DHAMAAD

Wasaarada Warfaafinta & Hannuuninta Dadweynaha
media@moi.gov.so ama sidiqfaarax@gmail.com