Ra’iisul Wasaaraha Xukuumadda Federaalka ah ee Soomaaliya Mudane Xasan Cali Khayre ayaa galabta kormeer shaqo ku tagey qaar kamid ah xarumaha ciidamada Dawladda ee magaalada Muqdisho.

Ra’iisul Wasaaraha ayaa marka hore tegay xaruntii hore xisbiga ee ka mid ah xarumaha ay deggan yihiin Ciidamada Xasilinta Caasimadda ayaa kulan la qaatay saraakiisha isla-markaana halkaasi kula hadlay ciidamadda.

Mudane Xasan Cali Khayre, ayaa uga mahad-celiyey Ciidamadda Xasilinta caasimadda horumarka dhanka amniga ah ee ay caasimadda ka sameeyeen mudada yar ee ay howl-gallada wadaan.

“Anaga iyo Shacabka Soomaaliyeed, waxaa idin kaga mahadcelinaynaa howlgallada aad fuliseen oo ay cadowga ee kaaga hortagteen falalka cadowgu damacsanaayeen. Dadalkiina dad Soomaaliyeed ayaa ku badbaaday waxana idinku ammaanayaa idinkooda ku shaqeeya duruufo adag sida sharafta leh ee dalkiina iyo qarankiina ugu adeegteen.

“Yeddediillo ayey na gelineysaa horumarka dhanka amniga ah ee aad ka sameeyseen caasimadda tan markii qorshaha xasilinta caasimada ay dejisay xukuumadda, waxaan dooneynaa inaad sii laba-laabtaan dedaaladiina ku aadan nabadeynta Muqdisho, dawladdana waxay kordhin doontaa wax walba oo awooddeeda ah si loo yareeyo daruufaha aad ku shaqeyneysaan”. Ayuuu yiri Ra’iisul Wasaare Khayre.

Ra’iisul Wasaaraha ayaa u sheegay ciidamadda xasilinta caasimadda ee uu maanta booqday in ay xoojiyaan xirriirka shacabka si ay ugu sahlanaato ka hortagga falalka guracan ee kooxaha nabad-diidka.

“Shacabka waa inaad u nug lahaataan ulana dhaqantaan si dabacsan oo ixtiraam leh xiliyada aad ku jirtaan howlgallada ka dhanka ah kooxaha nabad diidka ee ku dhumaaleysanaya bulshada dhaxdeeda si ay u sahlanaato wada shaqeynta aad la leedihiin Shacabka”ayuu yiri Mudane Xasan Cali Khayre.

Sidoo kale Ra’iisul Wasaaraha oo koormeerkiisa shaqo ee maanta ku tagey xarunta Villa Baydhabo ayaa indha-indheeyey qaar ka mid ah xafiisyada hoggaamada Ciidamada Xoogga Dalka.

Ra’iisul Wasaaraha ayaa kulan la qaatay Taliyaha Ciidamada Xoogga Dalka iyo qaar ka mid ah saraakiisha Ciidamada Xoogga ayaa kala hadlay sidii sare loogu qaadi lahaa xirfada, aqlaaqda iyo xuquuqda ay leeyihiin ciidamada

Ugh dambeeyntii, Ra’iisul Wasaaraha ayaa ku adkeeyey Saraakiisha Ciidamada Xoogga in qorshaha isla xisaabtanka xukuumadda ee lagula dagaallamayo musuqmuusaqa loo daadijiyo sarkaal ilaa askariga dablaha ah si loo hubiyo in askarta si hufnaan leh u helaan xuquuqdooda iyo garaam bileedka dawladda ay ku bixiso ciidamadda Xoogga Dalka. Waxana kormeerka R/Wasaaraha ku weheliyey Wasiirrro ka tirsan Xukuumadda.

DHAMMAAD

Kulankan  oo ay isugu yimaadeen  Culimada Soomaaliyeed  ayaa lagu qabtay magaalada  Muqdisho,waxaana lagu Cambaareeyay  dhibaatooyinka   iyo gabood falada kale oo Israel ay ku hayso shacabka reer Falastiin, ayadoo sidoo kale, lagu xadgudbay masjidka barakaysan ee Al- Aqsa laguna dhibaateeyo shacabka aan waxba galabsan ee Falastiin.

Waxaa culimada diiradda ku saareen dowrka kaga aadan  qeyla dhaanta laga muujinayo xad gudubyada ciidamada Yuhuudda ay ku hayaan shacabka reer Falastiin.

Qaar ka mid ah  culimadii ka hadashay  kulanka  ayaa si wadajir ah  u cambaareeyay dhibaatooyinkaasi ayagoo ku baaqay in Israel ay joojiso gabood falkaasi.

Guddoomiyaha  ha’yadda culimada Soomaaliyeed  Sheekh Bashiir Axmed Salaad  ayaa  akhriyay bayaanka ay ka soo saareen  hay’adda culimada Soomaaliyeed  dhibaatooyinka Yahuudda ay ku hayaan  muslimiinta reer Falastiin  iyo masjidka  barakeysan ee Al-Aqso, Waxay culimaddan ugu baaqeen maamulka Israel in uu joojiyo xad gudubyada ka dhanka ah xuquuqda aadanaha oo ay sameynayaan ciidamadooda.

Wasaaradda Arrimaha Dastuurka ee Xukuumadda Federaalka Soomaaliya ayaa kulan wadatashi ah oo ku saabsanaa hannaanka dib-u-eegista Dastuurka la yeelatay Ururada Bulshada Rayidka ee Jubbaland. Kulanka ayaa waxaa ka soo qaybgalay Gudoomiyaha Baarlamaanka Jubbaland Mudane Sheekh Cabdi Maxamed Cabdiraxmaan, culumada, haweenka, dhaqanka, iyo dhalinyarada Jubbaland.

Wasiir Cabdiraxmaan Xoosh Jibriil oo kulanka ka hadlay ayaa ku tilmaamay kulanka wadatashiga ee Kismaayo ka dhacay in uu ahaa tallaabo horey loogu qaaday xoojinta wada shaqaynta Wasaaradda iyo Jubbaland.

“Runtii farxad wayn bay noo tahay in aan maanta kulan wadatashi ah ku qabano Kismaayo, waxa aan u nimid in aan ra’yigiina dhageeysano; Waa tallaabo kale oo ay Wasaardda horey u qaaday si aan wadashaqayn joogta ah u la yeelanno dawlad goboleedka Jubbaland” ayuu yiri Wasiirka.

Sidoo kale AVV Cabdi Xoosh isago oo ka hadlayay Geedi-socodka dib-u-eegista Dastuurka ayuu yiri “Micanaha Dastuurka waa heshiis bulsho, sidaa awgeed waxa aan donaynaa in aan bulshada rabitaankooda ku hogaaminno Geedi-socodka taariikhiga ah ee dib-u-eegista Dastuurka ee sanadkan ka bilaabmi doona dalka”.

Dadkii ka soo qaybgalay kulanka ayaa talooyinkooda ku saabsanaa Qorshaha Guud ee hannaanka dib-u-eegista Dastuuka la wadaagay Wasaaradda.

Ugu dambeyn, Wasiir Xoosh ayaa ballanqaaday in kulamada wadatashiga ay gaarsiin doonaan dhamaan deegaanada dawlad goboleedyada.

—–DHAMAAD—–

Wafidi uu hogaaminayo Wasiirka Wasaaradda Arrimaha Dastuurka ee Xukuumadda Federaalka Soomaaliya Mudane Cabdiraxmaan Xoosh Jibriil ayaa waxa ay la kulmeen Madaxweynaha Dawlad Goboleedka Jubbaland Mudane Axmed Maxamed Islmaam (Axmed Madoobe).

Wasiir Cabdi Xoosh ayaa Madaxweyne Axmed Madoobe uga warbixiyay ujeedka safarka wafdiga uu hogaaminayo ay ku soo gaareen Kismaayo.

“Mudane Madaxweyne marka ugu horeeysa waan kaaga mahadcelinayaa kulankan aad nala yeelatay, marka xigta waxa aan u inimid in madaxda iyo shacabka ku nool deegaanada Jubbaland aan ka tala gelino Qorshaha Guud ee hannaanka dib-u-eegista Dastuurka, waxa aan doneynaa in aan bilaawno Geedi-socodka dib loogu eegayo Dastuurka oo aan ka shaqeyneyno in ka qaybgalkiisu uu noqdo mid loo dhanyahay”.

Sidoo kale Madaxweyne Axmed Madoobe ayaa ku ammaanay Wasiirka iyo wafdigiisa sida ay u go’antahay in arin walba oo ku saabsan Dastuurka laga talageliyo dawlad goboleedyada iyo dadka Soomaaliyeed.

Dhanka kale, Wafdiga Wasiir Xoosh ayaa la kulmay Gudoomiyaha, Gudoomiye ku-xigeennada, iyo Guddiga Arrimaha Dastuurka ee Baarlamaanka Jubbaland, iyaga oo kawada hadlay sidii Geedi-socodka dib-u-eegista Dastuurka uu u noqon lahaa mid lagu galo qorsho diyaarintiisa loo dhanyahay.

Gebagabadii, AVV Cabdiraxmaan Xoosh Jibriil ayaa Baarlamaanka Jubbalanad ka codsaday in ay Wasaaradda kala shaqeeyaan Geedi-socodka taariikhiga ah ee dib-u-eegista Dastuurka.

—–DHAMAAD—–

Shirwaynahan afraad ee ka talinta aayaha dhallinyarada Soomaaliyeed waxaa daahfurtay wasiirka Dhallinyarada iyo Ciyaaraha Dowladda federalka ah ee Soomaliya waxaana ka soo qaybgalay oo Goob joog ahaa Madaxda wasaaradaha dhallinyarada iyo ciyaaraha ee Maamul Gobaleedyada dalka kuwaasi oo la talin ka samayn doona siyaasadii lagu hagi lahaa dhallinyarada Soomaaliyeed.

Sihayaha wasiirka shaqada shaqaalaha dhallinyarada iyo ciyaaraha Puntland C/rixmaan Shiikh Axmed oo shirwaynahan dhallinyarada ka hadlay waxa uu sheegay in kulankaani muhiim u yahay wada shaqaynta taaba galinta iyo Horumarinta dhallinyarada Soomaaliyed.

Wasiirka Dallinyarada iyo ciyaaraha ee Konfurgalbeed,wasiir ku xigeenada Hirshabeele iyo jabbaland iyo Agasimaha Guud ee dhallinyarada iyo ciyaaraha ee Galmudug waxay isla raaceen Muhiimada ay leedahay Midaynta dhallinyarada Soomaliyed iyo hagisteeda.

Khadiijo Maxamed Diiriye wasiirka dhallinyarada iyo ciyaaraha Dowladda federalka ah ee Soomaaliya waxay dardaaran dheer oo dhinacyo badna taabanaya u jediysay mas’uuliyiintan ka socotay bahda dhallinyarada iyo ciyaaraha ee Maamul Gobaleedyada dalka kuna Booriysay in la soo saaro siyaasad midaynaysa dhallinta Soomaaliyeed ayan uga baxaan halisa dhinacyada tahriibka ,adeegsiga falalka aan haboonayn iyo maadooriyaha kuwasi oo daashaday dhallinyarada Soomaaliyed.

Gabagabada shirkan ayaa lagu wadaa in lag soo saaro qorshe cad oo lagu horumariyo dhallinyarada Soomaaliyed iyo kor loo sii qaado wada shaqaynta joogatada ah ee ka dhaxaysa wasarada dhallinyarada iyo ciyaaraha somaliya iyo Kuwa maamul Gobaleedyada.