Wasiirka Maaliyadda Xukuumadda Federaalka Soomaaliya, Mudane Biixi Imaan Cige, ayaa soo xiray shir labo maalmood socday oo ay ka soo qayb galeen hey’adaha kala duwan ee dowladda iyo madaxda Bangiga Adduunka. Shirkan, oo lagu eegayay habsami u socodka mashaariicda horumarineed ee Bangiga Adduunka maalgaliyo, ayaa diiradda lagu saaray sidii loo horumarin lahaa mashaariicda dowladda Soomaaliya ka fuliso gudaha dalka.

Wasiirka Maaliyadda Xukumadda Federaalka Soomaaliya, Mudane Biixi, ayaa shirkan ku tilmaamay mid muhiim ah, isla markaana hoosta ka xariiqday fursado muhiim ah oo laga gaaray mashaariicda kala duwan ee Bangiga Adduunku maalgaliyo. Waxaa uu sidoo kale xusay in dib-u-eegistaasi ay muujisay horumar laga sameeyay fulinta mashaariicdaasi.

Wasiir Biixi Imaan Cige ayaa uga mahadceliyay Bangiga Adduunka taageerada joogtada ah ee a siiyaan Soomaaliya iyo wadashaqeyntooda buuxda, isagoo xusay in wada-shaqeyntaasi ay muhiim u tahay sii wadida horumarka dalka.

Madaxweynaha Jamhuuriyadda Tajikistan Mudane Emomali Rahmon, ayaa xafiiskiisa ku qaabilay Danjiraha cusub ee Jamhuuriyadda Federaalka Soomaaliya u fadhiya dalka Tajikistan, Mudane Fatxudin Cali Maxamed Ospito, waxaana uu ka guddoomay warqadaha aqoonsiga Danjirinimo.

Kulanka oo ahaa mid muhiim ah, ayaa labada dhinac waxay ka wada hadleen xoojinta xiriirka labada dal ee Soomaaliya iyo Tajikistan. Waxa la isla gartay sidii loo horumarin lahaa iskaashiga dhinacyada siyaasadda, dhaqaalaha, iyo dhaqanka, iyadoo la rajeynayo in labada dal ay sii xoojiyaan wada shaqeyntooda.

Sidoo kale, waxaa la isla gartay in muhiimad gaar ah la siiyo iskaashiga dhanka waxbarashada iyo ganacsiga, iyadoo Tajikistan ay diyaar u tahay inay Soomaaliya ka caawiso horumarinta mashaariicda kala duwan.

Wadanka Tajikistan ayaa ka mid ah wadamada Aasiya Dhexe ee hoos yimaada safaaradda Soomaaliya ee dalka Turkiya, taasoo fududeynaysa xiriirka labada dal iyo wada shaqeynta heerarka kala duwan.

Danjiraha Soomaaliya ee Tajikistan, Mudane Fatxudin Cali Maxamed Ospito, ayaa sheegay inuu ka go’an yahay in uu guddoonsiiyo Soomaaliya fursadaha ugu wanaagsan ee xoojinta xiriirka, isagoo ku adkeysanaya in xiriirka labada dal uu yahay mid qiimo leh oo ku saabsan danaha shacabka Soomaaliyeed.

Kulankan ayaa waxaa ka dhacay is dhexgal iyo fahamka labada dhinac ee ku saabsan horumarka iyo mustaqbalka xiriirka Soomaaliya iyo Tajikistan.

Wafdi ka socda Urur Goboleedka Iskaashiga Dhaqaalaha Bariga Afrika (EAC), oo ay hoggaamineyso Agaasimaha Furdooyinka Ururkan, Marwa Flavia Busingye, ayaa kormeer ku sameeyay Dekedda Muqdisho. Kulankan soo dhaweynta ah ayaa xarunta Furdooyinka Xamar waxaa loogu sameeyay Agaasimaha Furdooyinka Wasaaradda Maaliyadda XFS, Mudane Abukar Sh. Ahmed Mursal, iyo Maamulaha Furdooyinka Xamar, Mudane Osman Mohamud Adawe, oo ay weheliyaan saraakiisha Furdooyinka.

Kulanka ayaa diiradda lagu saaray xoojinta iyo dardar-gelinta geedi-socodka Soomaaliya ee EAC, iyo dhammeystirka howlaha muhiimka ah ee dalka uu u baahan yahay si waqtiga loogu qabto bilowga howlaha loo qorsheeyay.

Ugu dambeyntii, masuuliyiinta Urur Goboleedka Iskaashiga Dhaqaalaha Bariga Afrika ayaa ka mahadceliyay soo dhoweynta diirran ee loo sameeyay, waxayna ammaaneen horumarka ka socda Dekedda iyo casriyeenta Furdooyinka, kuwaas oo hadda maraya heer ay la jaanqaadi karaan dalalka caalamka.

Ra’iisul Wasaare Kuxigeenka Xukuumadda Federaalka Soomaaliya, Saalax Axmed Jaamac, ayaa xalay qabtay kulan furan oo uu kaga hadlay xaaladda guud ee dalka iyo guulaha ay ku tallaabsatay Xukuumadda Danqaran ee uu hoggaamiyo Madaxweyne Xasan Sheekh Maxamuud.

Kulanka oo ay goob-joog ka ahaayeen saxafiyiinta, ayaa Ra’iisul Wasaare Kuxigeenka wuxuu faahfaahiyay xaaladda dalka, gaar ahaan arrimaha amniga, dhaqaalaha, iyo hirgelinta doorashooyinka ku saleysan qof iyo cod.

Saalax Axmed Jaamac, ayaa sheegay in Xukuumaddu ay ku guuleysatay hirgelinta barnaamijyo badan oo la xiriira arrimaha bulshada iyo kuwa muhiimka u ah dowladnimada Soomaaliya, isagoo tilmaamay in guulahaasi ay la jaanqaadi karaan dalalka caalamka.

Wasiirku waxa uu sidoo kale qiray in dowladda Soomaaliya ay ka go’an tahay dhameystirka barnaamijyada muhiimka ah ee loogu talagalay shacabka, isagoo hoosta ka xariiqay in si dhow loo xaqiijin doono hirgelinta doorasho madax-bannaan oo qof iyo cod ah.

Guddoomiyaha Hay’adda Maareynta Musiibooyinka,Mudane Maxamuud Macallin Cabdulle, ayaa ka qayb-galay kulan casho sharaf iyo sagootin ah oo ay soo qaban-qaabiyeen Wasiir ku xigeenka Wasaaradda Ilaalinta Madaniga, Xaaladaha Deg-degga ah iyo Arrimaha La Tacaalidda Musiibooyinka ee dowladda Russia, Mudane Kurynin Roman Viktorovich, iyo Guddoomiyaha Gobolka Arkhangelsk, Mudane Alexey Alsufev.

Mudane Maxamuud Macallin, oo kulanka khudbad ka jeediyay, ayaa ka mahadceliyay soo dhawaynta diirran ee loo muujiyay, martigalinta heerkeedu sarreeyo, iyo sagootinta qiimaha leh. Wuxuu sidoo kale xusay muhiimadda wada-shaqeynta labada dal ee ku saabsan howlaha bini’aadannimada, taageerada farsamada iyo maareynta musiibooyinka.

Wasiir Kurynin Roman Viktorovich iyo Guddoomiyaha Alexey Alsufev ayaa muujiyay sida dowladda Russia uga go’an tahay taageerada shacabka Soomaaliyeed, iyagoo ballan-qaaday inay gacan ka geysan doonaan kaalmada bani’aadannimo, farsamo iyo agab, si loo taageero mashaariicda horumarineed ee Soomaaliya, gaar ahaan kuwa muhiimka ah ee dalka ka socda.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa warqadaha aqoonsiga ka guddoomay danjireyaal cusub oo ku soo biiray diblumaasiyiinta ka howlgala dalkeenna.

Danjireyaasha uu Madaxweynuhu ka guddoomay warqadaha aqoonsiga ayaa kala ah:

1. Amb. Abdirahman Khalil Ahmed – Danjiraha cusub ee Jamhuuriyadda Sudan

2. Amb. Rowaid Adil Mohamed – Danjiraha cusub ee Falastiin

3. Amb. Morakot Janemathukorn – Danjiraha cusub ee Thailand

4. Amb. Bernard Yohana Kibesse – Danjiraha cusub ee Tanzania

5. Amb. Ana Filomena da Costa Rocha – Danjiraha cusub ee Portugal

6. Amb. Martin K. NGOGA – Danjiraha cusub ee Rwanda

7. Amb. Mahi Boumediene – Danjiraha cusub ee Algeria

8. Amb. Matsuura Hiroshi – Danjiraha cusub ee Japan.

Madaxweyne Xasan Sheekh Maxamuud ayaa xusay muhiimadda ay leedahay xoojinta xiriirka laba-geesoodka ah ee Soomaaliya la leedahay dalalka ay danjireyaashani ka socdaan,

Soomaaliya Wasiirka Wasaaradda Waxbarashada, Hiddaha iyo Tacliinta Sare, Mudane Faarax Sheekh Cabdulqaadir, ayaa maanta xafiiskiisa ku qaabbilay Safiirka Dowladda Ingiriiska u joogo Soomaaliya, Danjire Mike Nithavrianakis iyo wafdi ka socday. Kulanka ayaa looga hadlay iskaashiga waxbarashada ee labada dowladood, iyadoo si gaar ah loo xoogi dayay horumarinta waxbarashada heerarkeeda kala duwan.

Danjire Mike Nithavrianakis, ayaa si gaar ah diiradda u saaray tayaynta iyo sare-u qaadista tacliinta sare, isagoo ka hadlay sidii ay labada dal iska kaashan lahaayeen sidii Soomaaliya loo gaarsiin lahaa heerarka ugu sarreeya ee waxbarashada iyo xirfadaha la xiriira. Wasiirka Waxbarashada ayaa ku sheegay kulanka in dowladda Soomaaliya ay diyaar u tahay inay sii xoojiso xiriirka waxbarashada ee la leh Ingiriiska, isla markaana ay ka go’an tahay in la hormariyo tacliinta sare ee dalka si loo daboolo baahida shaqo ee suuqyada.

Labada dhinac ayaa sidoo kale isla gartay in la abuuro barnaamijyo cusub oo loogu talagalay tayeynta manhajyada, tababarka macallimiinta, iyo sidii loo heli lahaa fursado dheeraad ah oo caawiya kor u qaadista tayada waxbarashada ee Soomaaliya. Wasiir Faarax Sheekh Cabdulqaadir ayaa sidoo kale soo bandhigay qorsheyaasha mustaqbalka ee Wasaaradda Waxbarashada, isagoo muujiyay inay ka go’an tahay hirgelinta mashaariicda waxbarashada ee muhiimka ah si loo helo mustaqbalka wanaagsan ee dhallinyarada Soomaaliyeed.

Kulanka ayaa ahaa mid muhiim u ah wada-shaqeynta labada dal ee ku aaddan horumarinta iyo tayaynta nidaamka waxbarashada Soomaaliya.

Golaha Wasiirrada Xukuumadda Jamhuuriyadda Federaalka Soomaaliya oo yeeshay kulankoodii caadiga ahaa, ayaa meel-mariyey Qaraarka maareynta Isticmaalka khaldan ee baraha bulshada.

Shirka oo uu guddoominayey Ra’iisul Wasaare ku-Xigeenka labaad ee Xukuumadda Jamhuuriyadda Federaalka Soomaaliya Mudane Cabdisalaan Cabdi Cali (Dhaay), ayaa lagu ansixiyey heshiisyo ku saabsan amniga internerka iyo heshiis is-afgarad wada shaqayn oo u dhexeeya guddiyada warbaahinta ee hey’addaha isgarsiinta dowladaha Soomaaliya iyo Malaysia.

Kulanka Golaha ayaa sidoo kale lagu soo bandhigay warbixinno ku saabsan amniga iyo howlgalladii ugu dambeeyay ee ciidamada qalabka sida ay ka sameeyeen qeybo kamid ah gobollada dalka.

Guddoomiyaha Gobolka Banaadir ahna Duqa Magaalada Muqdisho Mudane Maxamed Axmed Amiir, ayaa maanta aqalka dowladda hoose ee Xamar kulan kula qaatay madaxda hay’adda UNOPS, Hydra Nova, iyo madaxda xafiiska Bangiga Adduunka ee u qaabilsan Mashruuca Nagaad, kaas oo lagu horumarinayo kaabayaasha Muqdisho.

Kulankaas, hay’adda UNOPS, Hydra Nova, iyo Agaasimaha howlaha guud ayaa soo bandhigay warbixin dhameystiran oo ku saabsan sahminta iyo daraasadaha laga soo sameeyay sidii xal waara loogu heli lahaa biya-mareenada Muqdisho. Waxa kale oo la soo bandhigay qorsheyaasha dhameystirka naqshadda biya-mareennada (Masterplan for Trunk Drainages), oo lixdan cisho gudahooda lagu soo dhameystirayo, iyo qorshaha lagu dhisayo waddooyin cusub oo laami ah, heshiisyada dhismihiisana bartamaha bisha February la saxiixi doono.

Mudane Maxamed Axmed Amiir, Duqa Muqdisho, ayaa si xooggan ugu nuux-nuuxsaday muhiimada ay leedahay dar-dargelinta qorshaha lagu dhisayo biya-mareennada caasimadda, si xal waara looga helo dhibaatooyinka biyo-maalinta ee soo wajaha Muqdisho xilliga roobaadka. Waxa uu sidoo kale faray madaxda howlaha guud iyo hay’adaha ku lugta leh in si degdeg ah loo bilaabo dhisamaha biya-mareennada magaalada Muqdisho.

Duqa Muqdisho ayaa xusay in mashruucan uu muhiim u yahay sidii looga hortagi lahaa fatahaadaha biyaha ee caasimadda iyo sidii loo dhisi lahaa kaabayaasha lagama maarmaanka u ah horumarinta magaalada Muqdisho.

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe), ayaa ka qeyb galay gogosha tacsida ee Allaha ha u naxriistee Ugaas Cabdi-Daahir Ugaas Nuur, oo ku geeriyooday magaalada Muqdisho.Guddoomiyaha ayaa dhamaan ehelka, qaraabada, iyo guud ahaan ummadda Soomaaliyeed uga tacsiyadeeyay geerida marxuumka.

Mudane Sheekh Aadan Maxamed Nuur (Madoobe) ayaa si gaar ah uga tacsiyadeeyay geerida Ugaas Cabdi-Daahir Ugaas Nuur, oo ka mid ahaa hogaamiyeyaasha dhaqanka Soomaaliyeed ee muhiimka u ahaa nabadda iyo horumarka dalka. Guddoomiyaha Golaha Shacabka ayaa sheegay in geerida marxuumka ay tahay mid naxdin leh, isla markaana ay ummadda Soomaaliyeed ka maqantahay hoggaamiye dhaqameed mudan in la xuso, kaas oo ku suntanaa jacaylka dalkiisa iyo u-dadaalka dib-u-heshiisiinta iyo midnimada dadka Soomaaliyeed.

Guddoomiyaha ayaa sidoo kale saxiixay buugga tacsida ee Allaha ha u naxriistee Ugaas Cabdi-Daahir Ugaas Nuur, isagoo muujiyay tacsiyadiisa iyo salaamihiisa qoyska marxuumka iyo dhammaan bulshada Soomaaliyeed. Mudane Sheekh Aadan Maxamed Nuur (Madoobe) ayaa sheegay in geeridiisa ay ka dhigan tahay lumin weyn oo ku timaaday dhaqanka iyo nabadda bulshada Soomaaliyeed.

Guddoomiyaha ayaa ugu dambeyntii ducada u diray marxuumka, isaga oo Ilaah uga baryay in uu naxariistiisa Janno ka waraabiyo, ehelka iyo guud ahaan ummadda Soomaaliyeed-na samir iyo iimaan ka siiyo.