Muqdisho, 23 April 2017 – Wasiirka Warfaafinta ee Soomaaliya, Mudane Cabdiraxmaan Cumar Cismaan (Eng. Yarisow) ayaa shalay kulan dheer la qaatay Safiirka UK ee Soomaaliya David Concar oo ay ka wada hadleen arrimo ay ka mid yihiin horumarinta warbaahinta dalka, Shirka London ee 11ka May iyo arrimo kale.

Wasiir Eng. Yarisow ayaa Safiirka UK uga mahadceliyey doorka hoggaamineed ee UK ay ugu ololeyneyso caalamka sidii Soomaaliya wax loogu qaban lahaa si dalka loo nabadeeyo oo dowlad wanaag loo hirgeliyo. Eng. Yarisow ayaa yiri “UK waxey door hoggaamineed ka qaadatay inay Soomaaliya uga ololeyso caalamka si indhaha caalamku ay ugu soo jeestaan arrimaha Soomaaliya. Sidoo kale UK waxey si aad ah uga ololeysaa Golaha Ammaanka ee Qaramada Midoobey oo sanooyinkii la soo dhaafay ay soo saareen qaraarro fara badan oo Soomaaliya looga taageerayo arrimo fara badan.”

Safiirka UK David Concar ayaa hoosta ka xariiqay muhiimada warbaahinta ay ka qaadan karto sidii Soomaaliya ay u noqon laheyd dal horumaray oo nabad ah. Safiirka UK ayaa ballanqaaday in dowladda UK ay garab taagantahay sidii Dowlada Federaalka iyo shacabka loo garab-istaagi lahaa waqtigan xasaasiga ah, gaar ahaan sidii loo horumarin lahaa warbaahinta dalka.

Eng. Yarisow ayaa ugu danbeyntii la wadaagay safiirka qorshaha iyo siyaasada Wasaarada Warfaafinta ay ku dooneyso inay ku horumariso warbaahinta dalka iyo sdii suxufiyinta Soomaaliyeed loo garab istaagi lahaa si ay waajibaadkooda ugu gudan lahaayeen si xirfadi ku jirto oo shacabka loogu gudbinayo horumarka dalka ka jira.

DHAMAAD

Ardayda wax ka barata Jaamacadaha dalka Pakistan ayaa kulan soo dhaweyn ah u sameeyay Guddoomiyaha ururka Midnimo oo ah guddoomiye cusub oo ay dhawaan iska doorteen, kaasi oo ka shaqeynaya horumarinta waxbarashada ardayda Soomaaliyeed.

Munaasabad si heer sara ah  loo soo agaasimay  ayaa waxaa ka soo qeyb galay qaybaha kala duwan ee bulshada ku dhaqan Dalka Pakistan sida  Diblomaasiyiin safaaradda Soomaaliya ee Pakistan, Aqoonyahano, , Arday iyo dhammaan Qeybaha Bulshada ee ku nool Dalka Pakistan.

Ka qeyb galayaashii munaasabadda ka hadlay ayaa sheegay inay diyaar u yihiin la shaqeynta guddoomiyaha cusub ee ay ardayda doorteen, waxaana ay kula dar daarmeen in uu si cadaalad ah ugu adeego ardayda wax ka barata dalka Pakistan, iyagoo u mahadceliyay guddoomiyihii hore Maxamed Cabdi Guuleed (Baafow)

Guddoomiyaha cusub ee dhawan loo doortay Ururka Midnimo Axmed Maxamed Xasan (Shuutaaye) ayaa sheegay in uu u istaagi doono sidii ardayda ay u heli lahaayeen agabyada waxbarashadooda, uuna ka shaqeyn doono isu keenidda ardayda Soomaaliyeed ee wax ka barata dalka Pakistan.

Xafladda ayaa waxaa lagu soo bandhigay suugaan iyo ruwaayado ka turjumaya dhaqanka Soomaaliyeed

Taliyaha cusub ee Taliska Ciidamada Nabad gelyadda Waddooyinka Jeneraal Cali Xirsi Barre “Cali Gaab” oo maanta shir jaraa’id ku qabtay xarunta taraafikada sheegay in ciidamada Nabad gelyada Waddooyinka ay hayaan shaqo adag, isagoo intaa ku daray inay dar dargelinayaan howlaha loo xilsaaray.

Taliyaha ciidamada Nabad gelyada Waddooyinka ayaa ugu baaqay shacabka Soomaaliyeed inay la shaqeeyaan ciidamada oo aysan u arkin kuwa xaquuqdooda ku xadgudbaya.

Taliska ciidamada Nabadgelyada Wadooyinka ayaa looga fadhiyaa hirgelinta sharciyada waddooyinka.

Dowladda Soomaaliya ayaa sheegtay xiliga uu dhacayo Imtixaanka shahadiga ee Dugsi Sarre ee Dalka iyo tirada ardayda u fariisaneysa sanadkan oo ka badan kuwii sanadkii hore u fadhiista Imtixaanka mideysan ee dowladda.

Wasiirka Wasaaradda Waxbarashada iyo Tacliinta sare ee dalka Mudane Cabdiraxmaan Daahir Cismaan ayaa sheegay in dhawaan la bilaabi doono qaadista imtixaanka shahaadiga ee dugsiyada sare ee dalka, isagoo ardayda u rajeeyay inay ku guuleystaan imtixaanka.

“Waxaan rabnaa inaan shaacino in Imtixaankii dugsiga sare ee Shahaadiga la qaadi doono 20-ka bisha May ee sanadkan, waana sanadkii sadexaad ee ay qabaneyso Wasaaradda Waxbarashada, waxaana ka qeyb galaya 23,000 (saddex iyo labaatan kun) oo arday, waxaana uu ka bilaabanayaa ilaa iyo afar dowlad goboleed oo kala ah, Jubaland, Koonfurgalbeed, Hirshabeelle iyo Galmudug, waxaana ardayda u rajeyneynayaa in ay ku guuleystaan imtixaanka” ayuu yiri Wasiirka.

Wasiirka Wasaaradda Waxbarashada iyo Tacliinta sare ee dalka Mudane Cabdiraxmaan Daahir Cismaan ayaa xusay inay tahay wax lagu farxo in tiro ka badan kuwii sanadkii hore ay sanadkan imtixaanka u fadhiisanayan.

Taliyaha ciidanka Asluubta Sareeyo Gaas Xuseen Xasan Cismaan iyo saraakiil uu hogaaminayo ayaa maanta kormeeray dhul ku yaala degmada Karaan oo ay leeyihiin ciidanka Asluubta, kaasi oo ujeedkiisu ahayd u kuurgelidda dhulka oo kaabiga ku haya Isbitaalka Keysaney.

Taliyaha ayaa ku soo wareegay qeybaha uu ka koobanyahay dhulka, waxaana halkaasi ka socotay howlo dhismo ah.

Sareeyo Gaas Xuseen Xasan Cismaan oo kormeerka kaddib la hadlay Warbaahinta Qaranka ayaa digniin u jeediyay dadka sida sharci darrada ah u dhisanaya xarumaha danta guud, waxaana uu intaa ku daray in ciddii lagu hela iyada oo dhisaneyso xarumaha ciidanka Asluubta laga qaadi doono tallabo sharciga waafaqsan.

“Waxaan u sheegeynaa shacabka iyo ganacsatada ku howlan dhismaha xarumaha ciidanka Asluubta inay joojiyaan dhismooyinka sharci darrada ah, cid Alaalle iyo ciddii dhisatana waan ka bur burineynaa dhismooyinka” ayuu yiri Taliyaha Ciidanka Asluubta.

Taliyaha ciidanka Asluubta Sareeyo Gaas Xuseen Xasan Cismaan ayaa tan iyo markii uu xilka la wareegay waxa uu bilaabay kormeeridda xarumihii ciidanka Asluubta, waxaana taasi ay qeyb ka tahay dadaallada uu kaga hortagayo in la boobi dhulkii ay lahaayeen ciidanka Asluubta.

Muqdisho, 23 April 2017 – Safiirka dalka Isutaga Imaaraadka Carabta (UAE) ee Soomaaliya Mudane Mohamed Al-Othman oo booqasho ku yimid xafiiska Wasiirka Warfaafinta ee Soomaaliya ayaa la kulmay Wasiir Cabdiraxmaan Cumar Cismaan (Eng. Yarisow) oo ay ka wada hadleen arrimo fara badan.

Wasiir Eng. Yarisow ayaa ugu horeyntii uga mahadceliyey safiirka booqashadiisa Wasaarada Warfaafinta, isagoo lagu soo wareejiyey xarunta SNTV iyo Keydka Raadiyo Muqdisho. Sidoo kale Eng. Yarisow ayaa safiirka uga mahadceliyey dadaalka dalka Imaaraadka ee ku aadan u gurmadka abaaraha oo Bisha Cas ee Imaaraadka ay maalmahan dalka gudihiisa ku qeybinayeen raashin gar-gaar ah oo la gaarsiiyey dadka abaarahu ay saameeyeen.

Eng. Yarisow “Waxaan si gaar ah uga mahadceliyey shacabka iyo Dowlada Imaaraadka yaboohii ay Telefishinada dalka Imaaraadka ka sameeyeen maalintii Jimcaha 21kii April oo ay muddo lix saax ah ku ururiyeen lacag dhan 167 milyan UAE Dirham oo u dhiganta 45 milyan dollar. Tani waxey na tuseysaa in Imaaraadku ay yihiin wallaalo u naxay shacabka Soomaaliyeed oo si hagar la’aan ah u doonaya inay u garab istaagaan. SNTV waxuu ku guuleystay inuu si toos (live) ah yaboohaas ugu soo tabiyey shacabka Soomaaliyeed. “

Wasiir Eng. Yarisow iyo Safiir Mohamed Al-Othman ayaa sidoo kale ka wada hadlay horumarinta warbaahinta dalka, gaar ahaan sidii suxufiyiinta Soomaaliyeed loo kordhin lahaa aqoontooda, xirfadooda iyo waayo-aragnimadooda. https://www.youtube.com/watch?v=N-H_g7rH5pQ

Halkan ka daawo barnaamij gaar ah oo SNTV ay ka sameeyeen barnaamijkii yabooha Jimcaha https://www.youtube.com/watch?v=rG4CG-SzaPM

DHAMAAD

Madaxweynaha Jamhuuriyada Federaalka Soomaaliya Maxamed Cabdulaahi Maxamed Farmaajo iyo wafdi uu hogaaminaayo ayaa maanta lagu wadaa in uu gaaro magaalada Baydhabo ee xarunta KMG ee Maamulka Koonfur Galbeed Soomaaliya.

Amaanka magaalada Baydhabo ayaa saakay si weyn loo adkeeyay, waxaana wadooyinka magaaladaasi gala lagu arkayay dadweyne aad u farabadan kuwaasi oo isku diyaarinaya soo dhaweynta Madaxweynaha Soomaaliya Maxamed Cabdulaahi Farmaajo.
Madaxweynaha waxaa socdaalkiisa ku wehliyo wasiirka gargaarka iyo arimaha bini’aadanimada Marwo Maryan Qaasim waxayna kulamo la qaadan doonaan Madaxda maamulka Koonfur Galbeed Soomaaliya iyo qeybha kala duwan ee bulshada ku dhaqan magaaladaasi, waxaana socdaalka Madaxweynaha la xariirtaa u kuur galida xaalada amaan iyo mida bini’aadanimo ee ka jirto Koonfur Galbeed.

Wasiirka Warfaafinta Soomaaliya Eng, Cabdiraxmaan Cumar Cismaan Yariisow ayaa kulan la-qaatay Safiirka Dowladda Britain u fadhiya Soomaaliya, waxaana ay ka wada hadleen arrimaha saxaafadda Soomaaliya iyo shir looga hadlayo arrimaha Soomaaliya oo dhawaan ka dhacaya Britain.

Wasiirka Warfaafinta  iyo safiirka dowladda Britain ayaa kulankooda waxa uu ka dhacay xarunta safaaradda UK ay ku leedahay magaalada Muqdisho.

Labada mas’uul waxay wada qaateen kulan ay kaga hadlayeen horumarka saxaafada Soomaaliya iyo shirka London arrimaha Soomaaliya looga hadlayo.

Safiirka Britain u fadhiya Soomaaliya Devid Concar ayaa sheegay in Wasiirka ay ka wada hadleen sidii loo horumarin lahaa Saxaafadda gaarka loo leeyahay iyo tan Dowladda Soomaaliya, wuxuuna dhinaca kale ka hadlay shirka bisha May ka dhici doona London ee arimaha Soomaaliya looga hadlayo.

Wasiirka Warfaafinta iyo Hanuuninta dadweynaha ee Xukuumadda Soomaaliya Eng, Craxmaan Cumar Cismaan Yariisoow ayaa sheegay in UK ay kow  ka tahay Wadamada ka shaqeeya Horumarka  Saxaafada iyo arrimaha waxbarashada, isla markaana.

Kulanka uu Wasiirka Warfaafinta la qaatay Safiirka UK ee Soomaaliya ayaa ah dadaalo uu beryahan waday Wasiirka oo uu ku xoojinayo xiriirka dowladaha saaxiibka la ah Soomaaliya si taageero loogu helo qorsheyaasha Wasaaradda Warfaafinta oo uu Wasiirku damacsanyahay inuu dib u habeyn weyn ku sameeyo Wasaaradda iyo howlaheeda si loo hirgeliyo maamul wanaag kalsooni gelin kara shacabka Soomaaliyeed.

Munaasabad lagu xusayay Maalinta todobaadka Dhirta Soomaaliyeed kaasi oo looga hadlayay dhibaatada ay u leedahay  xaalufinta dhirta deegaanka oo ay soo qaban qaabiyeen  ardayda kuliyadda beeraha ee Jaamacadda  SIU  ayaa lagu qabtay magaalada Muqdisho

Munaasabadda ayaa waxaa ka soo qeyb galay macalimiinta wax ka dhigta Jaamacadda SIU ardayda wax ka barata Jaamacadda  aqoonyahanno, Waalidiin,  Xildibaanno iyo marti sharaf kale.

Inta ay munaasabada socotay ayaa ardayda kuliyadda beeraha ee Jaamacadda SIU  waxa ay goobta  ku soo bandhigeen dhibaatada  ay leedahay xaalufinta  dhirta iyo sidii loo joojin lahaa.

Fowsiya Aadan Maxamed oo ka mid ah ardayda wax ka barata Jaamacadda  SIU gaar ahaan kuliyadda beeraha ayaa tilmaamtay in xaalufinta dhirta ay keeni karto nabaad guur.

Madaxa Maammulka iyo maaliyada ee Jaamacada SIU Suheyb Cilmi Dhuxulow oo ka hadlay goobta ayaa sheegay in maalinta xaalufinta dhirta Soomaliyeed ay u leedahay bulshada Soomaaliyeed  qiima weyn isla markaana looga baahanyahay bulshadu in ay ka qeyb qaataan joojinta xaalufinta dhirta.

Xildhibaan Sakariye Xaaji Cabdi ayaa kula dardaarmay bulshada Soomaaliyeed in ay  meel ugu soo wada jeestaan sidii loo joojin lahaa xaalufinta  dhirta.

Wasiirkii hore ee beeraha Ahna Gudiga  Abaaraha  Qaranka Maxamed  Cabdi Baafe ayaa  ka hadlay  dhoorka ay ka qaadan karto dhirta horumarinta deegaanka,  wuxuuna  ku booriyay  bulshada Soomaaliyeed in ay door  muuqda ka qaataan  joojinta xaalufinta dhirta.