Shirkii Khamiis laha ahaa ee Golaha Wasiirada Xukuumadda Federaalka Soomaaliya ayaa haatan ka soconaya magaalada Muqdisho.

Waxaa shir guddoominaya ra’iisul Wasaaraha Xukuumadda Federaalka Soomaaliya Mudane Xasan Cali Khayre,iyadoo looga hadlayo howlaha horyaala Golaha WasiiradaXukuumadda Soomaaliya.

Waxaa lagu waday in maanta uu ka furmo magaalada Baydhabo,balse waxaa dib u dhac uu ku yimid in shirka uu ka dhoco Baydhabo,maadaam halkaasi ay ka socoto qaban qaabo ku aadan qabsoomidda munaasabdda lagu xusayo sanad guuradii 3aad ee ka soo wareegatay markii la dhisay maamulka koonfur Galbeed oo uu hoggaamiyo madaxweyne Shariif Xasan Sheekh Aadan.

Waxaa lafilayaa in uu ka qeybgalo munaasabadaasi ra’iisul Wasaaraha Xukuumadda Federaalka Soomaaliya.

Ammaanka magaalada Baydhabo ayaa siweyn loo adkeeyey waxaana soconaysa qaban qaabo ku aadan qabsoomidda munaasabadaasi.

Wasiirka Waxbarashada Xukuumadda Federaalak Soomaaliya Mudane C/raxmaan Daahir Cusmaan ayaa heshiis kula saxiixday magaalada Muqdisho mas’uuliyiinta hay’adda Gar gaarka deg dega ah ee ka howlgala magaalada Muqdisho.

Heshiiskani ayaa waxaa uu dhigayaa in tababaro la siiyo bahda waxbarashada si ay isku bad baadiyaan hadii ay dhibaato timaado,maadaama inta badan bulshada ay yihiin bahda waxbarashada,sidoo kale waxaa uu dhigayaa in hadii uu shil dhoco hay’adda gar gaar ee Amiin Ambulance ay ahmiyad gaar ah siisobahda waxbarashada oo la aaminsanyahay in ay yihiin dadka ugu badan ee bulshada oo dhibaatooyinka soo gaara.

“Waxaan aad ugu faraxsanahay maanta la kulanka mas’uuliyiinta Hay’adda gar gaarka deg dega ah,iyo in aan heshiikan kala saxiixanyo,waxaan rabnaa in tabaabaro la siiyo bahda waxbarashada si ay isku badbaadiyaan hadii uu shil dhoco,marka waxaan rajaynayaa in heshiiskani uu waxbadan soo kordhin doono”. Ayuu yir Wasiirka waxbarashada.

Dhanka kale madaxda hay’adda gaadiidka gurmadka deg dega ah ee Amiin Ambulance ayaa soo dhaweyey hadalka wasiirka waxbarashada,iyagoo ka mahadceliyay la kulanka wasiir C/raxmaan Daahir Cusmaan,iaygoona sheegay in ay fulin doonaan heshiiskaasi.

Muqdisho(SONNA) Wasiirka Wasaaradda Warfaafinta,Dhaqanka iyo Dalxiiska Eng, Cabdiraxmaan Cumar Cusmaan Yariisow ayaa shaaca ka qaaday iney dhalinyarada Soomaaliyeed door muhiim ah ay ka qaateen Horumarka dalka gaar ahaan u gurmashada dadkii wax ku noqday Qaraxii 14-kii October ka dhacay magaalada Muqdisho.

Sidoo kale,Wasiir Yariisow ayaa carabka ku dhuftay iney jiraan qaswadayaal diidan iney nabad ka dhalato Soomaaliya,kuwaasoo mar waliba heegan u ah iney damiyaan iftiinka kasto oo dhanka wanaaga uga bidhaama Shacabka Soomaaliyeed.

“Waxaa jirta qaswadayaal diidan in wadankan uu horumar gaaro, runtiina kuwaasi waa argagixisada Al-Shabaab, marka waxaa la idinka rabaa inaad doorkiina ka qaadataan sidii dalka oo dhan looga xoreyn lahaa argagixisada Al-Shabaab”ayuu yiri Wasiirka Warfaafinta.

Wasiirka Warfaafinta ayaa xusay in Xukuumadda ay xoogga saareyso sidii dalka looga hirgelin lahaa nidaamka axsaabta, isla markaana dib  u eegis lagu sameynayo qabyo qoraalka Dastuurka dalka, si dalka loo gaarsiiyo hal qof iyo hal cod.

Hadalkaan ayuu Wasiirka Wasaaradda Warfaafinta,Dhaqanka iyo Dalxiiska Eng: C/raxmaan Cumar Cusmaan Yariisow ka jeediyay munaasabad xalay ka dhacday Muqdisho oo shahaadooyin lagu guddoonsiinayay 765-dhalinyaro oo nasiib u yeeshay iney ka qeyb galaan tababar ay Hormuud ka ahayd Wasaaradda Dhalinyarada iyo Ciyaaraha Xukuumadda Soomaaliya.

Iyadoo lasugayo natiijada dorashadii ka dhacday Soomaaliland ayaa waxaa uu war culsu ka soo baxaya giddiga doorashooyinkaasi,Saciid Cali Muuse oo ah Afhayeenka Guddiga doorashada Somaliland ayaa sheegay inay wali socoto tirinta cododka doorashadii dhowaan dhacday,wuxuuna afhayeenku  ka digay in laga hordhaco natiijada doorashada oo aan wali soo bandhigin Guddiga.

Saciid Cali Muuse ayaa sheegay inay maqleen warar isa soo taraya oo sheegaya in xisbi walba uu dabaal degayo, isla markaana sheeganayo inuu guul gaaray, taasoo uu ku tilmaamay in aanay waxba ka jirin.

Sidoo kale waxaa uu ku baaqay in la joojiyo dabaal degyada beenta ah, isla markaana ay keeni karto dhibaato sida uu hadalka u dhigay.

Waxaa laga sugayaa Guddiga doorashada Somaliland in ay ku dhawaaqaan natiijada doorashada taasi oo ah mid siweyn loo sugaya.

Ilo wareedyo ayaa sheegaya in laga yaabo in natiijada doorashada lagu dhawaaqo maalinta berri oo jimco ah,inkastoo ay suuro galtahay in dib u dhac uu yimaado.

Tunis(SONNA) Waxaa lagu wadaa in Dalka Tuniisiya uu maanta ka furmo tartanka ciyaaraha Xeegada ee Caruurta ka yar da’da 15-ka sano ee wadamada ku bohoobay Jaamacadda Carabta.

Tartankaasi oo la qabto sanadkasta ayaa waxaa sidoo kale ka qeybgalaya wadamo ay kamid tahay Soomaaliya Waxaana halkaas Soomaaliya umatalayo saddex caruur ah kuwaasi oo lafilayo in ay la baratamaan caruur kale oo ka socota wadamada qeybta ka ah Jaamacadad Carabta.

Caruurta Soomaaliya u matalidoonta tartankaasi ayaa waxaa ay kala yihiin, Siham Cabdirashiid oo10 jir ah, Salma Cabdirashiid 11, iyo Maxmed Cabdirashiid oo 13 jir ah kuwaasi oo ah sedax caruur ah oo wada dhalatay.

Tababaraha caruurtaasi oo Soomaaliya u matalaysaa tartankaasi ayaa ah  Cabdirashiid Ibraahim Xuseen ah aabaha dhalay ilmahaasi kuwaasi oo degan dalka Mareykanka.

Cadaado (SONNA), Madaxweynaha Dowlad goboleedka Galmudug, Mudane Axmed Ducalle Xaaf, ayaa maanta kulan la qaatay qaar kamid ah odayaasha dhaqanka iyo waxgaradka kasoo jeeda Galmudug, isagoo kala hadlay arrimo badan oo ay kamid yihiin Xoreynta deegaanada Nabad diidka Alshabaab ay ku dhuumanayaan.

Madaxweynaha, ayaa sheegay in maamulka Galmudug ay ka go’an tahay in xor ay noqdaan deegaanada hadda gacanta ugu jiro argagixisada, waxaana bulshada Soomaaliyeed oo ugu baaqay inay qeyb ka noqdaan dagaalka Nabad diidka lagula jiro.

Nabad diidka Alshabaab, ayaa hadda ku dhuumanaya deegaano tiro yar oo ay kamid yihiin inta u dhaxeysa  Galcad, Xarardheer iyo Ceel dheer oo kawada katirsan  Galgaduud iyo Mudug ee bartamaha Soomaaliya, kuwaasi oo dhowaan la qorsheynayo inay soo galaan gacanta Ciidanka geesiyaasha ah ee Xoogga dalka Soomaaliyeed.

Baraawe(SONNA), 15 November 2017 –Ra’iisul Wasaaraha Xukuumadda Federaalka Soomaaliya Mudane Xasan Cali Khayre iyo wafti uu hogaaminayo oo ay ka mid ahaayeen Ku-simaha Wasiirka Gaashaandhiga Mudane Maxamed Cali Xagaa, Xilidhibaano iyo Siyaasiyiin ayaa maanta booqasho ku tagay degmada Baraawe ee gobolka Shabellaha Hoose, iyadoona loo sameeyey soo dhaweyn aad u ballaaran. Safarka Ra’iisul Wasaaraha ayaa qayb ka ahaa safarradii uu ugu kuur galayey xaaladaha ka jira Maamullada dalka, si u ogaado nolasha dadka ee dhanka nolosha iyo amniga.

Ra’iisul Wasaaraha iyo waftigiisa ayaa kulan xog waraysi ah la yeeshay Madaxweynaha Maamulka Koonfur Galbeed Mudane Shariif Xasan Sheekh Aadan iyo shacabka ku dhaqan degmada Baraawe oo aad uga waramay dhibaatooyinka ka jira gobolka.

Ra’iisul Wasaare Xasan Cali Khayre ayaa qudbad dheer u jeediyey shacab aad u tiro badan oo ka qayb qaadanayey soo dhaweynta waftiga ayaa uga mahadceliyey sida sharafta leh oo ay u soo dhaweeyeen.

“Waxaan aad ugu farax sanahay sida wanaagsan oo aad noo soo dhaweyseen, Waxaana halkaan iiga muuqda sida reer Baraawe diyaar ugu yihiin dawladnimada, waxaana naga go’an inaad heshaan nabad, cadaalad iyo sinaan taas oo ah siyaasadda dawladda lagu dhisay,”ayuu yiri R/W Khayre.

“Baraawe waxay ahayd magaaladii aan ka dhoofay 1989kii, markii aan dalka ka baxayay waad ku mahadsantihiin martigelintiina xiligaas iyo xiligan, Magaaladani waxay qeyb ka qaadatay fidinta diinta islaamka, dadkeeduna waxay caan ku yihiin sharaf, karti, halgan iyo wax soo saar”ayuu yiri Ra’iisul Wasaaraha oo la hadlayay shacabka magaalada Baraawe, kana codsaday madaxda Koonfur-galbeed in si deg-deg ay ugu soo guuraan magaallo madaxda maamulka oo ah degmada Baraawe.

Ra’iisul Wasaaraha ayaa ugu danbeyn tilmaamay in degmada ay sii joogi doonaan qeybaha kala duwan ee Ciidamadda, isla markaana looga baahan yahay shacabku iney ka qeyb qaadaan dagaalka lagu xoreynayo deegaanada ay weli ku sugan yihiin kooxaha argagixsada ah,

Gaalkacyo (SONNA), Shir muddo labo maalmood ah kasocday magaaladda Gaalkacyo ee xarunta Gobolka Mudug oo uu soo qaban qaabiyay urur Goboleedka IGAD xafiiskiisa Soomaaliya, ayaa maanta lasoo gaba gabeeyay, iyaddoo shirkaasi diiradda lagu saarayay ,fulinta heshiisyadii dhinaca nabadda ee ay dhowaan wada gaareen dhinacyada Puntiland iyo Galmudug ,adkeynta xabad joojinta iyo dhismaha nabadda.

Kulanka, ayaa waxaa ka qeybgalay Guddoomiyeyaasha Gobolka Mudug iyo degmada Gaalkacyo ee Puntiland iyo Galmudug ,xubno kasocday Wasaaradda Arrimaha Gudaha Soomaaliya iyo xubnaha guddi isku dhaf ah oo hore loo magacaabay si ay uga shaqeeyaan nabadda Gaalakacyo iyo Mas’uuliyiinta IGAD oo iyaggu kulanka soo qaban qaabiyay.

Aragtiyo kala duwan iyo talooyin dhaxalgal ah oo ku saabsan ilaalinta iyo wadajirka buslahada Gaalkacyo,  ayaa kulanka leysuku dhaafsaday, iyaddoo dhinacyada ay wada qireen sida loogu baahan yahay wada daganaashaha dadka deegaanka.

Masuuliyintii kasoday dhanka dowladda federaalka ah,maamulada Galmudug iyo Puntiland, ayaa isku afgartay in si dhow ay uga wada shaqeeyaan si wax looga qabto baahiyaha dhanka bani’aadannimada ah iyo dhanka dhaqaalaha ee kajira degaanka.

Urur goboleedka IGAD, ayaa ugu dambeyn ugu baaqay dhinacyada Puntiland iyo Galmudug inay awood dheeraad ah siiyaan Guddiga isku dhafka ah ee hore loo magacabay, si ay si ay xal kama dambeys ah ugu helaan muranka Gaalkacyo,  iyaddoo IGAD uga mahadcelisay beesha caalamka sida ay uga qeyb qaateen dajinta xiisadihii kajiray magaaladda Gaalkacyo iyo sida ay uga go’an tahay xal u ehlista murankaasi oo noqoday mid soo laa laabtay.