Munaabasad si heer sare loo soo agaasimey oo lagu soo dhaweynayey Guddoomiyaha cusub ee gobolka Benaadir ahna duqa magaalada Muqdisho Mudane Cabdiraxmaan Cumar Cismaan (Eng. Yarisow) ayaa xalay lagu qabtay Beerta Nabadda, waxana ka soo qeyb galay, Wasiirro, Xildhibaano, Saraakiil, siyaasiyiin caan ah iyo qeybaha bulshada.

Munaasabadda ayaa waxaa heeso wadani ah ka qaaday fanaaniinta qaranka, Abwaano ka tiriyey gabayo iyo geeraaro kala duwan, iyo majaajilaystayaal ku cabirayey suugaantooda marxalada uu dalku marayo iyo sida ay lagama maarmaanka u tahay in ummadda Soomaaliyeed ay gacmaha is qabsadaan, gaar ahaan dadka  Muqdisho.

Furitaanka Munaasabadda waxaa hadal isugu jiray guubaabo iyo soo dhaweyn ka jeediyey Guddoomiyihii hore ee gobolka Benaadir Mudane Maxamuud Axmednuur Tarsan, waxuuna ka codsaday shacabka ku dhaqan Caasimadda in lala shaqeeyo maamulka cusub, isagoo ku dheeraaday ahmiyadda ay leedahay Muqdisho iyo horumarinta adeegyada danta guud, sida dhismaha jidadka, jardiimooyinka iyo gaarsiinta maamul hufan degmooyinka gobolka Benaadir.

Ugu danbayntii Guddoomiyaha gobolka Benaadir ahna duqa magaalada Muqdisho  oo soo xiray munaasabadda ayaa ka mahadceliyey soodhaweynta loo sameeyay. Waxuna ku baaqay midnimo iyo wadajir lagu gaarayo danta guud iyo in magaalada Muqdisho oo ah astaanta midnimada qaranka Soomaaliyeed loo baahan yahay in tartan ay la gasho caasimadaha kale ee caalamka, taasina ay tahay waxa kaliyee lagu gaari karo in dadka degan ay la shaqeeyaan maamulkooda, isla markaana ay bixiyaan canshuurta oo qeybta ugu weyn ka qaadan karta dhismaha iyo bilic-soo celinta, maamulkiisuna si dhow uga shaqeynayo baahida gobolka Benaadir.

Eng. Yarisow ayaa soo hadal qaaday dhulalka danta guud, waxuuna hoosta ka xariiqay in wax walba oo dan guud ah aan loo adeegsan doonin dano gaar ah, isla markaana arrimaha dhulalka loo magacaabi doono guddi si gaar ah  uga shaqeeya. Guddoomiyaha ayaa sidoo kale ka hadlay barakacayaasha ku nool magaalada sidii xal loogu heli lahaa, tani oo qeyb ka ah qorshaha waqtiga dhow ee maamulka cusub.

Dhanka kale,Guddoomiye Yariisow ayaa ka Mahad celiyay Xaflad soo dhoweyn ah oo loogu sameeyay magaalada London ee dalka Ingiriiska,kaasoo oo ay soo qaban qaabiyeen Jaaliaydda Soomaaliyeed ee magaalada London.

Guddoomiyaha cusub ee Gobolka Banaadir ahna Duqa Muqdisho ayaa sidoo kale u Mahad celiyay Fanaaniinta qeybta weyn ka qaatay Xaflada gaar ahaan Fanaanada Ikraan Caraale oo si weyn Xaflada kaga muuqatay.

Wasiirka Wasaaradda Arrimaha Dastuurka ee Xukuumadda Federaalka Soomaaliya Mudane Cabdiraxmaan Xoosh Jibriil iyo Guddoomiyaha Guddiga La-socodka Dib-ueegista Dastuurka ee Baarlaamaanka Federaalka Senator Cabdiqaybdiid iyo Kusimaha Guddoomiyaha Guddiga Madaxabaanaan ee Dib-u-eegista iyo Hirgelinta Dastuurka Mudane Avv Maxamed Cabadalla ayaa waxay kulan wadatashi ah la leeyihiin qeybaha kala duwan ee bulshada magaalada Jowhar.

Kulankan ayaa waxaa looga hadlayaa sidii loo dardar galin lahaa Geedi-socodka dib-u-eegista Dastuurka dalka, iyadoo shacabka ay dhiibanayaan aragtidooda ku aadan sida loo heli karo dastuur ay guud ahaan isku waafaqsan yihiin ummadda Soomaaliyeed.

Wasiirka Dastuurka xukuumadda Soomaaliya iyo xubno ka kala socday Guddiga La-socodka Dib-ueegista Dastuurka ee Baarlaamaanka Federaalka iyo Guddiga Madaxabaanaan ee Dib-u-eegista iyo Hirgelinta Dastuurka ayaa shalay gaaray magaalada Jowhar, iyagoona xalay kulamo la qaatay Ku-simaha Madaxweynaha Hirshabeelle Mudane Guudlaawe iyo Xildhibaanada Baarlamaanka Dowlad Gobaleedka Hirshabeelle.

Wasiir Cabdi Xoosh ayaa sheegay in safaradani wadajirka ah ee wadatashiga ah ay sii socon doonaan lana gaarsiin doono dhammaan gobolada dalka, iyagoo horey u soo maray qaar ka mid ah Gobolada Dalka.

Ra’iisul Wasaaraha Xukuumadda Federaalka Soomaaliya Mudane Xasan Cali Khayre ayaa sheegay in suura gal aysan aheyn dalkeena oo leh kheyraad aad u badan ay dad badan u dhintaan Macluul, isagoo sheegay in arintaasi looga bixi karo hadii la hormariyo waxsoosaarka dalka.

“Suurtagal noqon mayso in dalkeena uu leeyahay khayraad farabadan shacabkeenuna ay macluul iyo gaajo u dhintaan, Balse waa in aan horumarinaa wax soo saarka dalka si ay u yaraato gaajada iyo macaluusha shacabka Soomaaliyeed.” Ayuu yiri Ra’iisul Wasaare Khayre.

Sidoo kale Ra’iisul Wasaare Khayre ayaa qeexay doorka qurba joogta Soomaaliyeed ay ku lahaayeen wax ka Qabashada abaarihii ku dhuftay dalka, waxuuna tilmamay in ay iska soo aruuriyeen lacag gaaraysa Shan Milyan oo Dollar.

“Soomaaliya waxaa u bilaamay baal cusub oo horumarineed, waxayna diyaarisay qorshayaashii ay ku sugan lahayd Amnigeeda kuna horumarin lahayd dalka oo dhan. Sidoo kal waxay diyaarisay qaabki looga hortigi lahaa khatarta abaaraha, anagoo kaa shanayna hay’adaha caawiya Soomaaliya.

Ra’iisul wasaare Kheyre ayaa hadalkan ka jeediyay shir looga hadlayay dood ku saabsan ka hortaga iyo jawaab ka bixinta Abaaraha soo noq-noqda ee Soomaaliya oo shalay uu kaga qeyb galay magaalada Muqdisho, Waxaana shirkaasi sidoo kale goobjoog ahaa Wasiirka Maaliyadda, Wasiirka Qorshaynta, Wasiirka Howlaha Guud, Wasiirka Beeraha iyo Waraabka, Wasiirka Shaqada iyo Shaqaalaha, Wasiir ku xigeenka Abaaraha, iyo Wasiir Dawlaha Arimaha Dibadda, qaar kamid ah Hayadaha Qaramada midoobay, madax ka socotay maamul goboleedyada iyo Safiirada dalalka taageera Soomaaliya.

Ra’iisul Wasaaraha Soomaaliya ayaa ka mahad celiyay wufuuda ka soo qayb gashay shirka oo ka kala yimid meelo fog-fog waxuuna ka sheekeeyay jawaabtii ay ka bixisay xukuumadiisa abaartii Soomaaliya mudadii yarayd ee ay jirtay, isagoona sheegay in markii la magacaabay ay dadaal dheer u galayn sidii ummadda Soomaaliyeed looga badbaadin lahaa abaaraha.

Shirka ayaa lagu falanqeeyay sidii looga gaashaaman lahaa looguna diyaar garoobi lahaa abaaro kale oo Soomaaliya soo wajaha iyo habka ugu haboon ee loo hubin karo in gargaarka la gaarsiiyo dadka loogu talagalay, taas oo ay ugu deeqeen dawladooda iyo hay’adaha caalamka.

Shir madaxeedka wadamada Midowga Afrika ayaa ka furmaya maalinta berrita ah magaalada Addis-Ababa ee xarunta Dalka Itoobiya,kaasi oo ay ka qeybgalayaan hoggaamiyaasha Dowladaha Afrika.

Madaxweynaha Jamhuuriyadda Federaalak Soomaaliya Mudane Maxmed C/llaahi Farmaajo iyo wafdi ballaaran oo uu hoggaaminayo ayaa ka qeybgalaya shirkaasi,iyadoo lafilayo in madaxweyne Farmaajo uu maanta u ambaxo Dalkaasi Itoobiya.

Shirka oo socon doona muddo labo maalmood ah ayaa looga arrin sanayaa xoojinta Nabadageliyada,ladagaalanka Musuqa iyo Arggagixisada ee Qaaradda Afrika.

Madaxweynaha Soomaaliya ayaa inta uu ku sugan yahay madasha shirkaasi waxaa la filayaa in uu kulamo la yeesho madaxda hoggaamiyaasha dalalka Afrika.

Shirkaasi ayaa lagu casuumay madaxweynaha Falastiin Maxamuud Cabaas Abuumaasin oo halkaasi ka jeedin doona khudbad la xiriirta arrimaha Falastiin,isagoo sidoo kale soo bandhigi doona aragtidiisa ku aadan go’aankii madaxweyne Trump ee Qudus.