Search
Subscribe
Home Blog Page 1274

Duqa Muqdisho oo xariga ka jaray waddada isku xirta Madaxtooyada & Dekadda.

SNTV
-
0
Duqa Muqdisho oo xariga ka jaray waddada isku xirta Madaxtooyada & Dekadda.

Muqdisho (SNTV)-Guddoomiyaha Gobolka Banaadir ahna Duqa Muqdisho Eng C/raxmaan Cumar Cusmaan Yariisow ayaa Maanta xariga ka jaray Wadada ka soo baxda Madaxtooyada Soomaaliya ee tagta Dekadda Muqdisho.

Guddoomiye Yariisow ayaa xarig ka jarista waxa ku wehliyay Guddoomiye ku xigeenka Amniga iyo Siyaasadda iyo Guddoomiye ku xigeenka Howlaha Guud iyo Maamulka degmada Xamar-Jajab.

Yariisow  oo la hadlay Warbaahinta ayaa u sheegay in waddadan ay muhiim u tahay bulshada gobolka Banaadir, waxa uu sidoo kale sheegay in waddadan ay isticmaali lahaayeen Madaxda Caalamka ee booqanaya Madaxtooyada.

Guddoomiye Eng Yariisow ayaa tilmaamay in Maamulkiisa uu ahmiyad siinayo dhismaha waddooyinka Muqdisho si loo fududeeyo isku socodka gaadiidka iyo dadweynaha.

Ugu dambeyn Guddoomiyaha Gobolka Banaadir Eng C/raxmaan Yariisow ayaa booqday Idaacadda Risaala oo ay ka socdaan  howlo dhismo iyo ballaarin maqalka ah, Waxa  uu ku Bogaadiyay idacadda Risaala in ay U shaqeeyaan Shacabka.

Wasiir Beyle”Waxaan u gudubnay Wajigii Sadexaad ee Deyn Cafinta oo aan fileyno inuu noqdo kii ugu dambeeyey”

SNTV
-
0
Wasiir Beyle”Waxaan u gudubnay Wajigii Sadexaad ee Deyn Cafinta oo aan fileyno inuu noqdo kii ugu dambeeyey”

Muqdisho (SNTV) Wasiirka Maaliyadda Soomaaliya Dr Cabdiraxmaan Ducaale Bayle oo shir jaraa’id ku qabtay Muqdisho waxa uu faahfaahiyay wixii u qabsoomay bishii tagtay wasaaradda Maaliyadda.

Wasiir Beyle waxa uu sheegay Bankiga dhexe iyo hay’adda  lacagta Aduunka inay ku qanceen hufnaanta nidaamka maaliyadda dalka, ayna ka gudbeen wajiga labaad ee habka deen cafinta Soomaaliya, isagoo sheegay in iminka  laguda galay wajigii ugu dambeeyay ee deen cafinta oo ay horyaalaan shuruudo hor leh.

“Laba Arrimood ayaa noo suura galay, waa tan koowaadee waxaan soo gaba gabeynay wajigii labaad oo warqadina ay kasoo baxday la leeyahay Soomaalidu wey kasoo baxeen, waxaa taasi noogu xigay in uu inoo bilowday wajigii sadexaad oo aan fileyno inuu yahay kii ugu dambeeyey oo hadii aan ka gudubno aan kamid noqoneyno aduunyada kale”ayuu yiri Wasiirka Maaliyadda Soomaaliya.

Wasiirka Maaliyadda Maaliyadda Soomaaiya Mudane C/raxmaan Ducaale Beyle ayaa tilmaamay in hagaajinta maamulka Maaliyadda Soomaaliya ay sababtay in Bankiga aduunka ay sanadkaan  ugu yaboohaan Soomaaliya  140-milyan oo doolar  halka midowga yurubna ay ku deeqeen 100M.

Wasiirka Maaliyadda waxa uu tilmaamay inay hubinayaan sida ay ku yimaadeen deymaha lagu leeyahay Soomaaliya ayna la xiriireen dalalka deymahaasi sheegtay.

Mideynta canshuur qaadista hey’adaha dowladda oo qeyb ka ahaa sharuudaha deyn cafinta ayaa ka mid ah waxyaabaha wasaaradda maaliyadu ay ku guuleysatay

“Shuruudaha ugu adag ee ugu waaweynaa waxa weeyaan inaan kordhino dakhliga wadankeena Gudihiisa kasoo xarooda”ayuu intaasi raaciyey wasiirka Maaliyadda Soomaaliya.

Wasiirku  waxa uu intaa ku daray in ciidanka iyo Howl-wadeenada safaaradaha inay hubinayaan inay akoono ku qaataan mushaaraadkooda si loo xaqiijiyo inaan lacago kaash ah gacanta lagu qaadan.

“Shantii kun ee ugu horeysay ee ciidankeena kamid ah ayaan Akoono u sameynay inta kalena wey ku xigeysaa, qof waliba oo ciidan ah iyo qof waliba oo shaqaale ah iyo cid waliba oo dowladda wax ka qaadataa waa iney farihiisa meel yaalaan Akoonkiisa wax lagu shubaa arin badan bey xalineysaa taasi”ayuu yiri wasiirka.

Mudane C/raxmaan Ducaale Beyle wasiirka Maaliyadda Soomaaliya ayaa sheegay in sidoo kale la ogaan doono safaaradaheena dibadda hadii ay jiraan lacago soo gala iyo halka lagu bixiyo, iyo tirada shaqaalaha ka howlgala safaaradaha Dibadda ee Soomaaliya.

Dibad baxyada Gaza: Wararkii ugu dambeeyay “Sawirro”

SNTV
-
0
Dibad baxyada Gaza: Wararkii ugu dambeeyay “Sawirro”

In ka badan labo bilood falastiiniyiinta Gaza ayaa dhigayay mudaharaadyo meel udhow deegaanada xeeyndaabka ay joogaan ciidamada Israa’iiliyiinta ah, kaasi oo ay ku dalbanayaan in lasiiyo  xaqa ay u leeyihiin in ay dib ugu laabtaan guryahooda iyo deegaanadii laga ceyriyay qoysas kooda muddo haatan laga joogo 70-sanadood. kahor.

Dibadbaxii ugu weynaa oo dhacay bishii March ayaa lasoo gabagabeeyey 15-kii bishii May ee lasoo dhaafay, si ay astaan ugu noqoto waxa ay dadka Falastiin ugu yeereen Nakba, ama masiibada–tixraac lagu qasbay in meesha laga saaro 750,000 oo falastiiniyiin ah, kuwaasi oo laga saaray guryihii iyo tuulooyinkii ay ku noolaayeen si meesha loogu diyaariyo deegaamaynta Israa’iiliyiinta.

Taniyo markii ay dibad baxayaasha bilaabeen 30-kii bishii March, ciidamada Israa’iil waxa ay toogasho ku dileen 124 falastiiniyiin ah deegaanka la hareereeyay ee xeebta islamarkaana waxaa ay dhaawacyo halkaasi kasoo gaareen in ka badan 13,000 qof.

Saraakiisha caafimaadka ee marinka Gaza ayaa sheegaya in askarta Israa’iil ay dilleen tiro falastiiniyiin ah xiligii dibadbaxyada meel udhow deyrka ay isra’el xoogga ku dhistay.

Yuusuf Al-Fasix oo ah 29-sano jir a ayaa lagu dilay isagoo ka qayb galayay dibad baxa Bariga jiidda Qaza.

Sida ay sheegtay wakaaladda Wararka Wafa ee Falastiin, Askarta Israa’iil ayaa dhaawacay In ka badan 600 qof oo Falastiiniyiin ah, kuwaasi oo uu ku jiro sawir qaade Muxamed Abed al-Baba, kaasi oo ka dhaawacmay lugta.

Al-Baba, ayaa u shaqeeyn jiray AFP waxaana uu u qaabilsanaa magaalada Jiida Qaza sanadkii  2000, askarta Israa’iiliyiinta kasoo toogteen meel 200 mitir u jirta xeyn-daabka Bariga magaalada Jabalia ee waqooyiga Qaza.

Lebanon oo shaqaalaha UNHCR ka joojisay rusqaddii shaqada

SNTV
-
0
Lebanon oo shaqaalaha UNHCR ka joojisay rusqaddii shaqada

Wasiirka Arimaha Dibadda Lubnaan ayaa ku eedeeyay Hay’adda Qaramada Midoobay in ay fidanayso cabsida islamarkaana ay niyad jebin ku hayso dadka qaxootiga ah ee kasoo cararay dagaalada Siiriya.

Lubnaan ayaa amartay in la joojiyo codsiyada deegaamaynta oo ay soo gudbinayaan shaqaalaha Hay’adda qaxootiga qaramada midoobay ee UNHCR, waxaana ay ku eedeeysay in ay taasi niyad jab ku tahay dadka qaxootiga ah ee ku laabanaya gurigooda hooyo.

Gebran Bassil oo ah wasiir katirsan xukuumadda Lubnaan ayaa sheegay in ay hay’addu hakad gelisay soo noqoshada qaxootiga iyadoo fidisay warar ku aadan cabsidaasi.

Mr. Bassil ayaa intaasi ku daray inuu qaadi doono talaabooyin dheeraad ah oo looga soo horjeedo hay’addaasi.

Bayaan ay soo saartay dowladda islamarkaana ay ku saxiixan tahay wasaaradda Arrimaha dibadda Lubnaan, ayaa lagu sheegay in shaqaalaha hay’adda Qaramada Midoobay ee qaxootiga u qaabilsan ay ka shaqeeynayaan sidii niyad jab loogu beeri lahaa qaxootiga Siiriya iyagoo waydiinaya su’aalo qeyexan kuwaasi oo cabsi gelinaya xaaladahooda dhinaca amniga ee gudaha dalkaasi Syria iyo sidii dib loogu celin lahaa iyadoo aysan jirin aragti guud oo caalami ah oo lagu eegay arrintani.

UNHCR waxa ay si qeyexan u sheegtay in ay ka shaqaynayso in aysan dadkaasi dib ugu laaban dalkooda, taasina ma ahan waajibaadka saaran iyaga,”

“Waajibaadka UNHCR ayaa ah in ay dadka u xaqiijiso waxa ay sameeynayaan”, laakiin waxa dhacaya ayaa ka baxsan Arimahani”,  sidaasi ayaa waxaa lagu qoray bayaanka Wasaaradda A/dibadda ee dalka Lubnaan.

 

S/guud Bashiir Maxamed Jaamac”Madaxda sare ee dalka way iga aqbaleen in Miisaaniyad loo helo caruurta agoonta iyo danyerta”

SNTV
-
0
S/guud Bashiir Maxamed Jaamac”Madaxda sare ee dalka way iga aqbaleen in Miisaaniyad loo helo caruurta agoonta iyo danyerta”

Muqdisho(SNTV) Sareeye Guud Bashiir Maxamed Jaamac Taliyaha ciidanka Asluubta Soomaaliyeed oo goob joog ka ahaa munaasabad kooban oo walaalaha Turkiga ay dhar ciid ugu qeybinayeen caruurta aqoonta iyo danyerta oo kujiro xarun lagu xanaaneeyo oo ku taala degmada C/casiis ayaa siweyn uga hadlay baahiyaha loo qabo in caruurtaasi Soomaaliyeed ay helaan daryeel dhab ah,iyo nolol intuba.

Waxaa sidoo kale ka qeyb galay Danjiraha Turkiga ee Soomaaliya,mas’uuliyiinta Hey’adda TikA ee Turkiga laga leeyahay iyo mamulka degmadaasi iyo xubno kale,waxaan dhamaan mas’uuliyiintii halkaasi ka hadlay ay si wada jir ah u amaaneen dowrka Turkigu uu ka qaadanayo isgarab taaga shacabka Soomaliyeed.

Taliyaha Ciidanka Asluubta Soomaaliyeed S/guud Bashiir Maxamed Jaamac ayaa balanqaaday in ay ku dadaali doonan sidii caruurtaasi agoonta iyo danyerta ay u heli lahaayeen daryeel dhab ah.

“Caruurtaan aad u jeedaan adinka ayaa nooga horeeyay oo garab istaagay,anagana hadda ayaan dhexda kaga soo dhacnay,waxaan doonaynaa in halkeeda aan ka sii wadno,waxaan idinkaga mahadcelinaynaa siada wanaagsan oo aad u garab isataagan tihiin,hadana waxaan idinka codsanaynaa in aad nagu taageertaan dadaalkiina hakan,anagana waxaan ku dadaalaynaa in ugu yeraan aan daboolno baahiyohooda aas aasiga ah,maxaayelay waa mustaqbalkii Dalka,ka dowlada ahaan waxaan xooga saaraynaa in caruurtan loo helo miisaaniyad,taasina waxaan kala hadlay madaxda sare ee dalka,wayna iga aqabaleen”Ayuu yiri S/Guud Bashiir Maxamed Jaamac.

Safiirka Turkiga ee Soomaaliya Olgan Baker ayaa sheegay in uu ku faraxsanyahay is garab taaga caruurtan Soomaaliyeed,wuxuuna si guud uu u muujiyay sida dowladda Turkigu ay uga go’antahay taageerada shacabka Soomaliyeed.

QM oo ka digtay xaalad nafaqa darro oo kusoo wajahan 1.25 Milyan oo Carruurta Soomaaliyeed ah

SNTV
-
0
QM oo ka digtay xaalad nafaqa darro oo kusoo wajahan 1.25 Milyan oo Carruurta Soomaaliyeed ah

Geneva-(SNTV)-Hay’adda Qaramada Midoobay u qaabbilsan dhallaanka ee UNICEF ayaa ka digtay in Carruur kor u dhaafaysa 1.25 Milyan oo Soomaali ah ay halis ugu jiraan nafaqo-darro ba’an Sannadkan, sababto la xiriira fatahaadahii ka dhacay Soomaaliya.

Afhayeen u hadlay Qaramada Midoobay oo lagu Magacaabo, Stephane Dujarric , oo Jimcihii Shalay saxaafadda siinayay warbixinta joogtada ah ee daadadka tan iyo Bishii April ee Sanadkan ayaa sheegay inay jirto halis nafaqa darro.

Waxa uu sidoo kale sheegay in hay’addu ay ogaatay in kala bar Caruurta ay da’doodu ka yar tahay Shan jir oo ah in ka badan 1,25 Milyan ay wajahayaan Sanadkan xaalad nafaqo darro, waxaana Dadkaasi ka mid ah, 232,000 Carruur ah oo ay hayso nafaqo-xumo ba’an, kuwaas oo u baahan daryeel gaar ah.

Goobihii ay ka dhaceen daadadka ayaa laga baqdin qabaa inay ka dillaacaan cudurrada halista ah sida Jadeecada, Shuban Biyoodka iyo Daacuunka , kuwaas oo meelaha qaarba laga helay kiisaskooda balse lala tacaalay.

Daadadka ka dhacay Soomaaliya ayaa waxyeeleeyay xarumahii fayadhowrka, 22 xarun oo lagu nafaqaynayay 6,000 oo Carruur barakacayaal ah, iyagoo sababay inay xirmaan goobo badan oo lagu nafaqaynayay dhallaanka.

Dowladda Soomaaliya ayaa hoggaaminaysa barnaamijka lagu gargaarayo Dadka ay waxyeellada kasoo gaadhay fatahaaddu, Waxanay Wasaaradda Caafimaadka geysay Dawo loogu tala galay in wax lagaga qabto Cudurrada ka dillaaca goobaha ay ka dhacaeen fatahaadda iyo daadadka.

In kabadan 60 saraakiil Soomaali ah oo Tababar ugu soo geba-geboobay Dalka Turkiga

SNTV
-
0
In kabadan 60 saraakiil Soomaali ah oo Tababar ugu soo geba-geboobay Dalka Turkiga

Turkey(SNTV)- Dowladda Turkiga ayaa wadankeeda tababar ugu soo geba gebeysay saraakiil iyo saraakiil xigeen oo Soomaali ah,kuwaasi oo in muddo ah dalkaasi Turkiga ku baranayaya casharo la xiriira heerarka iyo sharciyada kala duwan ee ciidamadu ay leeyihiin.

Tababarkani oo in muddo ah socday ayaa waxaa loo qabtay in kabadan 60 qof oo isugu jira saraakiil iyo saraakiil xigeeno oo Soomaali ah,waxaana ay tababarada la qaateen askar ka socotay Gaashaanbuurta NATO iyo kuwo kale oo ka kala socoda Afrika iyo Qaaradda Assia.

Gaashanle Maxamed Tahliil Maxamed oo kamid ah saraakiisha tababarka ku soo qaatay Dalkaasi Turkiga ayaa faah faahin ka bixiyay waxyaabihii ay barteen iyo sida ay ugu faraxsan yihiin.

“Waxaa nahay 63 oo saraakiil iyo saraakiil xigeeno ah,waxaan baranay Fakaltiyo kala duwan oo ciidanka Xooga Dalka ah,waxaan ku faraxsanahay in aan tababar la qaadanay ilaa 36 Dowladooda askartooda,kuwaasi oo ka kala socda NATO,Afrika iyo Assia intaba ka socda,aad ayaan ugu faraxsanahay in aan maanta qalinjebino,waxaan aad u soo dhaweynaynaa oo aan ku faraxsanahay in Jaaliyadda Soomaaliyeed ay halkani munaasabadda nagala soo qeybgalaan, mahad ballaaran ayaan u celinaynaa dowladda Turkiga oo walaalaha nahay sida ay inoo garab taagan tahay”. Ayuu yiri Gaashaanle Tahliil.

Dalka Turkiga ayaa kamid ah wadamada sida weyn u taageera Soomaaliya,gaar ahaan dhinacyada dib u dhiska iyo qalabaynta ciidamada,iyadoo askar badan tababarro ay ku soo qaateen dalkaasi.

Boosaaso oo loo diiwaan geliyay degmadii 2-aad ee ku hartay wareegga 3-aad ee tartanka

SNTV
-
0
Boosaaso oo loo diiwaan geliyay degmadii 2-aad ee ku hartay wareegga 3-aad ee tartanka

Muqdisho (SNTV)-Wareegga 4-aad qeybtiisa 2-aad waxaa ku wada ballansanaa in ay ku tartamaan degmooyinka Boosaaso iyo Hodan oo ka kala tirsan goballada Bari iyo Benaadir.

Tartameyaasha Degmada Boosaaso ee Gobolka Bari waxaa la weydiiyey 7- Su’aal, waxa ay ka jawaabeen Hal su’aal,  ma jirin wax ka faa’iideysi ah oo ay heleen,  wadarta guud ee dhibcaha tartameyaasha Degmada Boosaaso ay heleen waxa ay noqotay 2-dhibcood.

Tartamayaasha Degmada Hodan ee Gobolka Banaadir waxaa dhankooda la weydiiyay 7- su’aal, waxa ay ka jawaabeen 3-  su’aal,  waxa ay ka faa’iideysteen 2- su’aal oo soo hareer martay Boosaaso, wadarta guud ee dhibcaha ay heleen tartameyaasha Degmada Hodan waxay noqotay 10- dhibcood.

Tartamayaasha Degmada Hodan ee Gobolka Banaadir ayaa caawa u soo gudbay wareegga afaraad ee tartanka, halka tartamayaasha Degamda Boosaaso ay ku biirtay degmooyinka ku haray wareegga 3-aad.

Tartanka ay tabineyso warbaahinta Qaranka isla markaana uu taaba gelinayo maamulka gobalka Benaadir waxaa habeen dambe foodda is dari doono degmooyinka Warta Nabadda &  Jilib oo ka kala tirsan Gobollada Banaadir iyo Jubbada dhexe.

 

Ra’iisul Wasaare Khayre oo Booqday xarunta isgaarsiinta Jabuuti iyo Dekadda Dooraale.

SNTV
-
0
Ra’iisul Wasaare Khayre oo Booqday xarunta isgaarsiinta Jabuuti iyo Dekadda Dooraale.

Jabuuti, June 08, 2018— Ra’iisul Wasaaraha xukuumadda Federaalka Soomaaliya, Mudane Xasan Cali Khayre iyo wafdi uu hogaaminayo oo maalmahaan joogay Jabuuti ayaa booqday xarunta isgaarsiinta dalkaas iyo Dekadda Dooraale.

Wasiirka Warfaafinta iyo isgaarsiinta Jabuuti, Mudane Cabdi Youssouf Sougueh iyo masuuliyiin kale ayaa wafdiga Ra’iisul Wasaare Khayre geeyay xarunta Isgaarsiinta iyo Dekadda Dooraale waxa uuna Ra’iisul Wasaare Khayre ku bogaadiyay reer Jabuuti iskutashiga ballaaran ee ay sameeyeen, isaga oo ka codsaday in walaalahooda Soomaaliya ay kala shaqeeyaan arrimaha Dekaddaha iyo Isgaarsiinta.

Ra’iisul wasaare Khayre ayaa ammaanay horumarka ballaaran ee Dowladda Jabuuti ka samaysay dhinaca horumarinta adeegyada la xiriira xargaha Fiber optic-ga waxa uuna boosta ka xariiqay in Soomaaliya ay wax badan ka faa’iideysan doonto khibradda dawladda Jabuuti

Wasiirka arimaha Dibadda, Mudane Axmed Ciise Cawad, Wasiirka Boostadda iyo Isgaarsiinta, Eng. Cabdi Canshuur Xasan, Wasiir Dawlaha Wasaaradda Gaashaandhiga, Mudane Maxamed Cali Xagaa iyo mus’uuliyiin kale ayaa kamid ah wafdiga Ra’iisul wasaare Khayre ee maalmahaan ku sugnaa Jabuuti.

Ra’iisul wasaaraha Soomaaliya ayaa intii uu kusugnaa Jabuuti waxa uu la kulmay madaxweynaha iyo Ra’iisul wasaaraha dalkaasi oo ay ka wada hadleen arima badan oo khuseeyaa labada dal iyo guud ahaan gobalka.

Xildhibaan Mustaf Dhuxulow oo munaasabad Afurin iyo Ciidsiin ah u sameeyay Dadka Aragga la’

SNTV
-
0
Xildhibaan Mustaf Dhuxulow oo munaasabad Afurin iyo Ciidsiin ah u sameeyay Dadka Aragga la’

Muqdisho-(SNTV)-Xildhibaan Mustaf Sheekh Cali Dhuxulow oo ka mid ah xubnaha Golaha Shacabka ee Baarlamaanka Soomaaliya ayaa Munaasabad isugu jirta Afurin iyo Ciidsiin wuxuu u sameeyay maamulka, Howlwadeenada iyo Ardayda Aragga Naafada ka ah ee wax ka barta Dugsiga Albasiir ee ku yaala magaalada Muqdisho.

Ku dhowaad 50-Qof ayaa loo qaybiyay Dharkii ay ku ciidi lahaayeen oo dhamaystirsan iyo Lacag uu ugu talagalay Xildhibaan Mustaf Sheekh Cali markii la afuray kadib.

Ustaad Abiikar Xuseen Bashiir oo ku hadlayay Afka maamulka Dugsiga Albasiir ayaa sheegay in xildhibaanka Shantii sano ee la soo dhaafay uu si wayn u garab taagnaa Dadka Baahiyaha Gaarka ah Qaba ee ku jira dugsiga Albasiir, wuxuuna sheegay xildhibaanka inuu yahay masuulka kaliya ee aanan markasta ka daalin inuu caawiyo Ardayda Aragga La’a, isagoo ku baaqay in Madaxda kale ee dalka ay ku daydaan xildhibaanka.

Xildhibaan Mustaf Sheekh Cali Dhuxulow oo ka hadlay Munaasabadda ayaa sheegay inay waajib tahay in la caawiyo dadka baahiyaha gaarka ah qaba maadaama imtixaanka ay marayaan loogu talagalay in dadka kale Caafimaadka qaba ay ku waana qaataan.

“Marka aad xiriir la leedahay dadka Baahiyaha gaarka ah qaba waxaad ogaanaysaa imtixaanka Ilaahay iyo Alle Nimcadda uu nasiiyay, waxaan markasta Bulshada Soomaaliyeed ugu baaqaa in laga war qabo dadka Baahiyaha gaarka ah Qaba, si loogu helo waxa ay u baahanyihiin.” ayuu yiri xildhibaan Mustaf Sheekh Cali Dhuxulow.

Guddoomiyaha Gobalka Banaadir ahna Duqa Muqdisho Eng. C/rximaan Cumar Cismaan Yariisow oo gaba gabadii ka hadlay Munaasabadda ayaa xildhibaan Mustaf ku ammaanay dadaalka badan ee uu ugu jiro marka taageerada dadka Baahiyaha qaba, isagoo dhanka kale balan qaaday in maamulka Gobalka Banaadir uu ka shaqayn doono sidii Ardayda Aragga naafadda ka ah ee Dugsiga Albasiir loo heli lahaa dhul ku filan oo ay wax ku bartaan.

1...1,2731,2741,275...1,709Page 1,274 of 1,709

© 2023 Telefishinka Qaranka Soomaaliyeed