Muqdisho(SNTV)–Soomaaliya iyo Shiinaha waxaa ka dhaxeeya xiriir soo jiray muddo dheer oo soo taxnaa boqolaal sano, waxaase diiwaangashay taariikh ahaan ama lagu xasuustaa in Soomaaliya ay ahayd waddankii ugu horreeyey ee Afrikaan ah oo Shiinaha xiriir toos ah la yeesha, taasi waxay micnaheedu tahay in uusan jirin dal Afrikaan ah oo ka horreeyay Somaaliya ee xiriir la lahaa dawaynaha Shiinaha
Dad badan oo aqoon u leh xiriirka Soomaaliya iyo Shiinaha ayaa sheegay in wafuud ka socota dalalka Africa oo ay Soomaaliya ka mid tahay ay soo bandhigeen waxa ay ka garanayaan xiriirka labada dalka iyo Shucuubtooda, waxayna xuseen in xiriirka Shiinaha iyo Soomaaliya uu soo bilowdey muddo hadda laga joogo Lix boqol iyo kotan sanno (650 sano), ka hor, balse Xiriirka Diplomacy ee Soomaaliya iyo Shiinaha ayaa soo billawday 14-kii Bishii December 1960-kii, waxaa labada Dawladood ay leeyihiin xiriir saaxiibtinimo dheer oo taariikhi ah, isagoo ku saleysan iskaashi siyaasadeed, dhaqaale, dhaqan, waxbarasho iyo dhinacyo kale oo muhiim u ah iskaashiga labada Dawladood.
Haddaba goormuu bilowday xiriirka labada Dal ee Soomaaliya iyo Shiinaha?
Badmaax u dhashay Shiinaha oo Muqdisho yimid Lix Boqol oo sanno ka hor ayuu ka bilowdey xiriirka labada dal, waxaa toos u hirgalay iskaashi ganacsi oo labada shacab ah, waxayna keentay in ay noqdaan dad si weyn isu dhexgala isla markaana horumar ka sameeya iskaashigaasi, dadweynaha labada dal ayaa safarro dhinaca badda ah ku kala bixiyey Soomaaliya iyo Shiinaha,iyagoo is dhaafsanayn xiriirro u badnaa dhinaca ganacsiga.
Waxaa kaloo jira in keydka taariikhda Shiinaha ay ku qoran tahay in Soomaaliya ay tahay dalkii ugu horreeyey ee Xiriir saaxiibnimo iyo diblomaasiyaddeed la sameystay Shiinaha, iyadoo Aqoonyahanno Shiinees ah ay sheegeen in Kheyraadka koowaad ee Soomaaliya uu yahay halka ay Juqraafi ahaan uga taallo dunida iyo kheyraadka kale ee gudaheeda dhex ceegaaga.
Prof. Wang Xiaohia oo ka mid ah Aqoonyahanada Shiinaha ayaa waxa uu xusay in barnaamijka horumarinta iyo iskaashiga Shiinaha Soomaaliya ay uga jirto safka hore sanadka 2021 ama qarniga 21-aad ee dunida, kaas oo lagu magacaabo Belt And Silk Road oo ka kooban afar qodob oo kala ah
- Nabadda iyo taageeradeeda
- Iskaashi iyo Furfurnaan
- Wadajir dadweyne ama labada shacuur
- Iskaashi Dhaqaale, dhismo mashaariic wata iyo diyaarinta istaraatiijiyad weyn oo dhinacyada tiknoolajiyadda iyo dib u dhiska Soomaaliya.
Dad badan aad uma garanayaan in Soomaaliya ay leedahay taariikhahaas fog ama dheer, waana midda bulshada caalamka ku abuurtay in Soomaalida ay u aqoonsadaan dad ka horreeya Afrikaanka kale.
Soomaaliya ayaa hadda u diyaarsan jawi ay dunida oo dhan mar kale ku tusto wax wada qabsi buuxa, kana turjumaya nabad, iskaashi, dhaqaale wadaag, ganacsi iyo dhismeyaal mahsaariic xambaarsan, taasoo dalkeenna u keeni doonta fursado waa weyn burburka u bedela dib u dhis ,nabad iyo barwaaqo.
Xirrirka qotada dheer ee u dhaxeeya Soomaaliya iyo Shiinaha waxaa ka marqaati kacaya dadaalkii Diblomaasiyadeed iyo kaalintii lama iloobaanka ahayd ee Soomaaliya ay ka cayaartay Fagaaraha Caalamka (Q/M) taasi oo ay marqaati u tahay hadalkii Raiisul-wasaarihii hore ee Soomaaliya ee Dowladdii Rayidka ahayd ee Kacaanka ka horaysay, Allaha u naxariistee Maxamed Xaaji Ibraahim Cigaal wuxuu khudbad dheer ka jeediyay Shirkii Qaramada midoobay bishii Oktoobar todobadeedii sanadkii 1969-kii taasi oo uu kaga hadlaayay arrimo ku saabsan qadiyadaha Dadyowga falastiiniyiinta iyo in Dalweynaha Shiinaha loo ogolaado Xaqa uu u leeyahay ka mid noqoshada Golaha guud ee Qaramada midoobay, iyadoo uu Shiinuhu waagaas uusan ka mid aheyn golaha loo dhan yahay ee Qaramada midoobay,waxaana xusid mudan in dalkaasi uu haatan ka mid yahay 5ta dowladood ee awoodda codka diidmada qayaxan (Vito).
Haddaba qormadaani iyo kuwa kaleba oo aan kaga hadleyno xiriirka qotada dheer ee u dhaxeeya Soomaaliya iyo Shiinaha ayaa waxa uu ku soo beegmaysaa xilli uu dhawaan Wafdi ballaaran uu hoggaaminayo Madaxweynaha Jamhuuriyadda Federaalka Soomaaliya Mudane Maxamed C/laahi Maxamed farmaajo uu booqasho rasmi ah ku tagayo dalka Shiinaha, si loo sii adkeeyo Xiriirka soo jirenka ah ee u dhaxeeya labada dal , waxaana madaxwaynaha Soomaaliya uu ka qeybgalayaa Shirwaynaha Shiinaha iyo Afrika dhanka kalena wuxuu kullammo rasmi ah oo gaar ah la yeelan doona madaxda Jamhuuriyadda dadka ee Shiinaha, waxaana dhihi karnaa Shiinuhu waa saaxiib aan hagar aqoon.
W.D: C/laahi Ruush
