Asmara (SNTV);-Waxaa magaalada Asmara ee dalka Erereriya kusoo dhammaaday booqashadi  rasmi aheyd oo halkaas ay ku joogeen Madaxweynaha Jamhuuriyada federaalka ah ee soomaaliya Mudane Maxamed Cabdullaahi farmaajo iyo wafdi uu hogaaminayey.

Madaxweynaha iyo wafdigiisa waxay halkaas kulan kulasoo qaateen, madaxda dalkaas oo ay ka wada hadleen xoojinta xiriirka iyo iskaashiga labada dalka, iyo arimo kale oo labada dowladood muhiim u ah, waxaana kulankaas lagasoo saaray warmurtiyeed. u qornaa sidan;

Iyada oo maanka lagu hayo xiriirka iyo saaxiibtinimada qotoda dheer ee labada  shacab ee Ereteriya iyo Soomaaliya.

Iyada oo dib loo millicsanayo xaqiiqada ah in shucuubta Soomaaliya iyo Ereteriya ay si joogta ah isu garab istaageen, isuguna taageereen halgankii mid kasta ugu jirey  xornimada, madaxbannaanida iyo horumarka.

Iyada oo lagu salaynayo xiriirka walaaltinnimo ee taariikhiga ah iyo dedaalka ay labada dowladood ugu jiraan yagleelidda iskaashi labada dhinac ah, oo u faa’iidaynaya labada dal iyo guud ahaan gobolka;

Dowladaha Ereteriya iyo Soomaaliya waxay ku heshiiyeen qodobbada soo socda: –

1.Soomaaliya waxay ku taallaa goob istiraatiiji ah, waxayna  leedahay khayraad tiro badan oo isugu jira kuwo aadmi iyo kuwo dabiici ah.

Laakiin  ka faa’iideysiga khayraadkaas waxaa ka hor istaagey dhibaatooyinka gudaha ka jira iyo faragelin dibadeed. Sidaasi darteed, Ereteriya waxay si mug leh u taageereysaa madaxbannaanida, siyaasadeed, qarannimada iyo midnimada Soomaaliya si dalku uu u soo ceshado maqaamkii uu ku dhex lahaa dunida, loona xaqiijiyo himilooyinka shacabka Soomaaliyeed.

2.Soomaaliya iyo Ereteriya waxay dadaal gelinayaan sidii ay u sameysan  lahaayeen iskaashi taabanaya dhinacyada siyaasadda, dhaqaalaha, arrimaha bulshada, dhaqanka, difaaca iyo amniga.

3.Labada dal waxay yagleelayaan xiriir diblomaasiyadeed iyaga oo is dhaafsanayaan danjireyaal, sarena u qaadaya ganacsiga iyo maalgashiga dhexdooda ah, sidoo kalena isweydaarsanaya fursadaha la xiriira waxbarashada iyo dhaqanka.

4.Ereteriya iyo Soomaaliya waxay si wadajir ah uga hawlgelayaan sidii loo  horumarin lahaa nabadgelyada, xasilloonida iyo isdhexgalka dhaqaale ee gobolka.

Ra’isalwasaaraaha xukuumada federaalka ah  ee somalia mudana xasan cali Kheyre, oo ku sugan magaalada Garowe ee xarunta puntland ayaa Khudbad dhinacyo badan taabaneysa ka jeedinayey munaasabad soo dhaweyn ah oo ay usoo sameeyeen madaxda iyo dhalinyarada jaamacada bariga Africa  ee magalaadaas , waxanana uu ka  hadlay arimo  badan oo  ay kamidtahay  doorka dhalinyarada ee dib u dhiska  wadanka, midnimada iyo wadajirkka, waxyaabaha dowlada federaalka ay hiigsaneyso  mustaqbalka dhow iyo kan fogba, horumarinta dhaqaalaha, siyaasada, Amniga, cadaalada, iyo sidii  Soomaaliya ay wax ula qeybsan laheyd  caalamka.

Khudbada r’aisalwasaaraha oo aad u dheereyd soona jiidatay dadka goobta fadhiyey ayaa ugu horeyn ku ammaanay madaxda iyo shacabka reer puntland sida ay isu horumariyeen mudadii ay jireen oo gaareysa 20 sano, waxana uu sheegay in mudadaas ay gaareen horumar wanaagsan oo kudayasho mudan isagoo dhalinyarada reer puntland ku booriyey inay ka qeybqaataan Nabada iyo dowladnimada,

“waxaa muuqata in horumar wayn aad sameyseen, maskax iyo caqli ayaadna kudhisateen deegaankiina” ayuu yiri ra’isalwasaare Kheyrre.

Ra’iisul wasaaraha oo hadalkiisa u badnaa mid uu ku guubaabinayey dhallinyarada kuna tusayey Awooddooda, Aqoontooda iyo cuddadooda, ayaa sheegay in dadkii dalkan xornimada garsiiyey ay dhalinyaro ahaayeen, taasina ay ku keenneen isku duubni iyo wadajir, sidaas darteed uu ugu baaqayo dhalinyarada inay ka fakaraan sidii ay u midoobi lahaayeen  dalkoodana ay  dhibaatada uga saari lahaayeen, wuxuuna intaas kudaray in dhalinyaradu  ay looga baahanyahay inay noqdaan tabliiqa cusub ee nabada iyo dowlada.

Ra’isalwasaaraha ayaa sheegay in lo baahan yahay siyaasad hufan oo kala saarta awoodda dowladda Federaalka iyo dowlad goboleeyada.

Mar uu ka hadlayey dagaalka deegaanka Tukaraq waxa uu sheegay in dagaalkaas uu dhibaato kuyahay shacabka labada dhinac iyo guud ahaan soomaaliya sidaas darteed ay haboontahay in si deg deg ah lagu joojiyaa.

“waa in dagaalka tukaraq lagu baddelaa xasilooni iyo midnimo” ayuu yiri Mudane Kheyre.

Mudane Xasan Cali Kheyrre Ra’isul wasaaraha soomaaliya ayaa sheegay in ay muhiim tahay in la helaa nidaam cadaaladeed oo dhameystirin kaasoo buu yiri  dadka somaliyed oo dhan ay aqbalaayaan waa in dowladnimada laga horumarinayo  ayuu yiri danaha gaar ah,

Waxa uu sheegay in sanadka 2020 ay dowlada ay rajeyneyso in  dalka laga hirgaliyo  Dastuur dhab ah shacabka somaliyed ay leeyihiin, kaasoo ah sharci dadka kala hagaya.

Mar uu ka hadlayey hufnaanta Maaliyadda ee dalka waxa uu sheegay in  horumar fiican laga gaaray arintaas   wax badanna dowladu ay ka qabatay dhinaca maaliyada, taasoo aduunku uu ku ammaanay, isagoo rajeyey in laga cafin doonno somalia  deymaha lagu leeyhahay.

“waa inaan ka fogaanaa musuqmaasuqa oo aan la imaannaa nidaam hufan, Aduunkana wuxuu nagu Ammaanay inaan horumar fiican ka sameynay nidaamka maaliyadeenna” ayuu yiri.

Ugu dambeyntii Madaxda Jaamacada bariga Africa ee magaalada Garowe ayaa Ra’isul wasaare gudoonsiiyey shahaado sharaf ku saabsan sida uu ugu guuleystay xasilinta dalka, waxaana isla goobta lagusiiyey buug ka hadlayey sida loo noqdo hogaamiyo wanaagsan.

Muqdisho (SNTV);- Madaxweynaha Dowlad goboleedka  Puntland Dr. Cabdiweli Maxamed Cali Gaas ayaa xalay casho sharaf ugu sameeyay Hotelka AJJ PALACE ee Garowe Ra’iisul-wasaraha Dowladda Federaalka ah ee Soomaaliya Mudane. Xassan Cali Khayre iyo wafdigiisa oo shalay gaaray halkaasi.

Madaxweyne Gaas  ayaa casho sharftan uu u sameeyay Ra’iisul-wasaaraha Dowladda Federaalka Soomaaliya waxaa  ka soo qayb galay Madaxweyne kuxigeenka Puntland Eng. Cabdixakiin Cabdullaahi Xaaji Cumar Camay, Marwada koowaad ee Puntland Marwo Hodan Siciid, Guddoomiyaha Baarlamaanka Puntland iyo Kuxigeenadiisa, Golayaasha Dowlad goboleedka  Puntland, saraakiil ka tirsan Madaxtooyada Puntland iyo marti sharaf kale.

Sidoo kale Madaxweyne Dr. Cabdiweli Maxamed Cali Gaas iyo Ra’iisal Wasaare Khayre ayaa waxaa ay booqan doonaan xarumaha dhaqanka ee Puntlnad, iyagoo la wadaagi doona maamuus iyo casuumadaha kale ee ugaarka ah madaxda dhaqanka Puntlnad.

Ra’iisal Wasaare Khayre ayaa muddada uu joogo Puntlnad  Waxaa uu booqan doonaa xarumaha wasaaradaha iyo hay’adaha kale ee  maamulka  Puntland ee magaalada Garoowe.

waxaana  uu ka qeybgalidoona xuska sanadguuradii 20-aad ee ka soo wareegatay markii la aas aasey maamulka Puntland,taasi oo ku began 1da bisha August ee soo socota.

29, JULY, 2018, Muqdisho (SNTV) R/Wasaare kuxigeenka Xukuumadda Soomaaliya Mahdi Maxamed Guulleed ayaa maanta furay kulan wadatashi ah oo diiradda lagu saarayo hanaanka Doorashooyinka Qaranka iyo Xisbiyada.

R/Wasaare ku xigeenka Soomaaliya Mahdi Maxamed Guuleed oo hadal ka jeediyay ayaa sheegay in Xukuumada ay xoogga saareyso hirgalinta Doorasho qof iyo cod ah, sidoo kalena Xukuumadda ay dhiirigelinayso ax-saabta is -diiwaangeliyay.

Sidoo kale, Wasiirka Shaqada iyo Arrimaha bulshada Xukuumada Soomaaliya Saalax Axmed Jaamac oo ka qeyb galay shirka wadatashiga ayaa xusay in qabsoomidda Doorashada ee la rajaynayo sanadka 2020 ay ku xiran tahay in hab midnimo ah loo wajaho iyadoo ay iska kaashanayaan dhammaan dhinacyada ay khuseeyso.

Shirkan maanta furmay ayaa waxaa ka soo qayb galay Guddiga madaxa bannaan ee Doorashooyinka Qaranka ee ku aadan Manhajka wacyigelinta iyo Waxbaridda Codbixiyaha Doorashada, iyadoo intii uu wadatashigu socday mas’uuliyiinta Guddigu ay kulan la qaateen xisbiyada sida kumeel gaarka ah loo diiwaangeliyay iyo kuwa lagu wado in dhowaan loo sameeyo diiwaangelin.

Xuseen Cabdi Aadan oo katirsan Xubnaha Guddiga Madaxa bannaan ee Doorashooyinka Qaranka oo ka hadlay madasha kulankan ayaa sheegay in Xisbiyada looga baahanyahay in ay la yimaadaan Aragtiyo dhaxal-gal ah oo lagu biirin karo diyaarinta Manhajka Wacyigelinta Doorashada, isagoo sheegay in uu rajaynayo in weyn looga faa’iideeysan doono wadatashigan.

“konton sanno kahor ayaa noogu dambeeysay doorasho nidaam xisbiyo badan oo dalka ka dhacda, sidaa darteed waxaan u dooranay manhajkan si taasi loo hirgeliyo” Xuseen Cabdi ayaa sheegay.

Kulanka wadatashigan ayaa qaadan doona muddo labo cesho ah ayaa lagu wadaa in ay kasoo baxaan tallooyin dhaxal-gal u ah Manhajka Hanaanka Doorashada Qaranka iyo Xisbiyada.

Dowladda Federaalka Soomaaliya ayaa ku howlan qorshaha doorasho ee qof iyo cod  sanadka 2020.