Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, ayaa maalinkii shalay shir-guddoomiyay kulankii koowaad ee Guddiga Qaran ee Horumarinta Xirfadaha iyo Shaqo-abuurka, kaas oo diiradda lagu saaray dardargelinta hawlaha mudnaanta u leh guddiga iyo sidii loo gaari lahaa natiijooyin wax-ku-ool ah oo horseeda horumarinta xirfadaha iyo abuurista fursado shaqo oo waara oo ay ka faa’iidaystaan dhallinyarada Soomaaliyeed.
Hawl-wadeennada Xafiiska Ra’iisul Wasaaraha ee qaabilsan arrimaha shaqo abuurka ayaa kulanka ku soo bandhigay waajibaadka iyo muhiimadda guddiga, hannaanka qaran ee isku-dubbaridka horumarinta xirfadaha iyo shaqo-abuurka, iyo qorshaha hawlaha mudnaanta leh. Sidoo kale, Wasaaradda Shaqada iyo Arrimaha Bulshada ayaa soo bandhigtay Siyaasadda Barashada Farsamada iyo Tababarka Xirfadaha, oo muhiim u ah dhismaha xirfado la jaanqaadaya baahida suuqa shaqada iyo fursadaha dhaqaale ee dalka.
Ra’iisul Wasaare Xamse Cabdi Barre ayaa adkeeyay baahida loo qabo in horumarinta xirfadaha iyo shaqo-abuurka loo wajaho hannaan qaran oo mideysan, isaga oo tilmaamay muhiimadda ay leedahay in Dowladda Federaalka, Dowlad-goboleedyada, ganacsiga gaarka loo leeyahay iyo bahwadaagta horumarintu ay ku shaqeeyaan hal jiho oo isku xiraysa xirfadaha, baahida suuqa shaqada, maalgashiga iyo shaqo-abuurka.
Ujeeddadu waa in dadaallada iyo maalgashiyada kala duwan ee dalka ka socda loo beddelo natiijooyin la cabbiri karo oo horseeda xirfado tayo leh, shaqooyin waara iyo koboc dhaqaale oo loo dhan yahay.
