Wafdi uu hoggaaminayo Wasiirka Gaashaandhigga XFS, ayaa Beledweyne kaga qeyb galay munaasabadda lagu xusay 49-guurada ka soo wareegtay maalintii Jamhuuriyadda Jabuuti ay xornimada ka qaadatay gumeysigii Faransiiska.
Wafdiga waxaa ka mid ahaa Safiirka Jamhuuriyadda Jabuuti u fadhiya Soomaaliya Cismaan Dubad, Wasiirka Wasaaradda Warfaafinta, Dhaqanka iyo Dalxiiska XFS Mudane Cabdifitaax Qaasim Maxamuud, Wasiiru-Dowlaha Wasaaradda Amniga Gudaha XFS, Mudane Maxamed Cali Xagaa, xildhibaanno ka tirsan Baarlamaanka Federaalka Soomaaliya, masuuliyiin ka socday Dowlad-goboleedka Hirshabeelle, Hobollada Qaranka ee Waaberi iyo masuuliyiin kale.
Munaasabadda oo ka dhacday xarunta Ciidamada Jabuuti ee qeybta ka ah Howlgalka Taageerada iyo Xasilinta Midowga Afrika ee Soomaaliya (AUSSOM) ee magaalada Beledweyne, ayaa lagu maamuusay 49-guurada xornimada Jamhuuriyadda Jabuuti. Sidoo kale, waxaa lagu xusay doorkii taariikhiga ahaa ee Soomaaliya ka qaadatay halgankii ay Jabuuti uga xoroobaysay gumeysigii Faransiiska iyo xiriirka walaaltinimo iyo iskaashiga soo jireenka ah ee ka dhexeeya labada dal.
