Ciidammada Xoogga Dalka Soomaaliyeed iyo kuwa Deegaanka ayaa xalay howlgallo qorsheysan ka fuliyay koonfurta Gobolka Mudug, gaar ahaan deegaanka Ceel-saacid oo ay khawaarijtu saldhigyo ku lahaayeen. Howlgalladaas ayaa si gaar ah loogu beegsaday saldhigyo iyo Gaadiid dagaal oo ay kooxaha khawaarijta isticmaalayeen.
Saraakiisha Ciidammada ayaa xaqiijiyay in howlgallada lagu beegsaday Gaadiid dagaal, kuwaas oo gaaraya saddex, sidoo kalena saldhigga khawaarijta ay ku lahaayeen halkaas la burburiyay. Wararka laga helayo ayaa tilmaamaya in howlgalladaasi ay sababeen qasaare xooggan oo gaaray kooxda khawaarijta ah, islamarkaana ay xoojinayaan dadaallada dowladdu ugu jirto ka hortagga iyo ciribtirka kooxahan argagixisada ah ee ku sugan qeybo ka mid ah dalka.
Saraakiishu waxa ay sidoo kale sheegeen in howlgalladan ay qayb ka yihiin qorshayaasha amni ee ka socda gobolka Mudug, kuwaas oo lagu xoojinayo amniga iyo xasiloonida deegaannada ay khawaarijtu ka joogaan. Ciidammada Xoogga iyo kuwa Deegaanka ayaa u muuqda inay si wadajir ah uga shaqeynayaan hawlgallada lagu ciribtirayo khawaarijta, iyada oo ujeedadu tahay in la xaqiijiyo amniga shacabka iyo dhismaha dowladnimada.
