Howlgalka Midowga Afrika ee Soomaaliya (AMISOM) ayaa sheegay in ay ka go’an tahay xaqiijinta in Soomaaliya ay ka qabsoonto doorasho madax bannaan si nabad ah Sannadka 2020/2021.
Taliyaha Ciidanka Boliiska AMISOM Augustine Magnus Kailie, ayaa u sheegay Bulshada rayidka ah, wakiillada Xisbiyada siyaasadeed iyo guddiga madaxa-bannaan ee doorashooyinka Qaranka (NIEC), in AMISOM oo kaashaneysa daneeyayaasha Soomaaliya ay diyaar u tahay in ay gacan ka geysato sidii ay u dhici lahayd doorasho qof iyo cod ah si xor iyo xalaal ah.
Kailie, ayaa sheegay in hoggaanka Soomaaliya ay muujiyeen sida ay uga go’an tahay inay ka guuraan qaabkii hore ee awood qaybsiga qabiilka ee 4.5 si loo qabto doorasho qof iyo cod ah iyaguna ay door ka qaadan doonaan.
Dowladda federaalka Soomaaliya ayaa dadaal ugu jirta in ay dalka ka qabato doorasho qof iyo cod 2020/2021-ka, iyadoo dhinaca kale howl-gallo baaxad leh oo lagu xaqiijinayo ammaanka ka waddo gobollada dalka.
