Muqdisho (SNTV):- Ciidamada amniga ayaa bur buriyay saldhig maleeshiyada Al-Shabaab ku lahaayeen Gobolka Shabeelaha hoose,halkaasi oo ay ka soo abaabuli jireen falal guracan oo ay ku dhibaateynayaan Shacabka Soomaaliyeed.
Howlgal qorshaysan oo Ciidamada amnigu fuliyeen habeenimadii 29-ka Bisha Maarso ayaa lagu burburiyay Saldhiga argagixisada Al-Shabaab ku lahaayeen Deegaanka Bariire ee Gobolkaasi.
Sidoo kale, Howlgalka ayaa lagu soo xiray dhagar-qabe ka tirsan maleeshiyada Al-Shabaab,waxaana inta ay ciidamada howlgalka ku guda jireen gacanta ku dhigeen qalab dagaal oo ay lahaayeen Al-Shabaab,kuwaasi oo ay u isticmaali jireen iney ku waxyeeleeyaan Shacabka Soomaaliyeed.
Ugu dambeyn, ma jirto waxyeelo soo gaartay Ciidanka amniga iyo Shacabka Soomaaliyeed ee deegaanka howlgalka laga fuliyay ku sugnaa.
