Guddoomiyaha Aqalka Sare ee Baarlamaanka Federaalka Soomaaliya, Mudane Cabdi Xaashi Cabdullaahi, ayaa maanta shir-guddoomiyay kulanka labaad ee Kalfadhiga 8-aad ee Guddiga Joogtada Aqalka Sare.
Kulanka ayaa diiradda lagu saaray dardargelinta ajandayaasha mudnaanta u leh fadhiyada Golaha, qaabaynta hadal-qoraallada fadhiyada Guddiga iyo xoojinta hannaanka isla-xisaabtanka iyo gudashada waajibaadka hay’adaha dowladda. Waxaa sidoo kale goobjoog ahaa Guddoomiye Ku-xigeenka Labaad ee Aqalka Sare, Mudane Cabdullaahi Cali Xirsi (Timacadde).
Guddoomiyeyaasha Guddiyada Aqalka Sare ayaa soo jeediyay aragtiyo la xiriira habraacyada korjoogteynta iyo isla-xisaabtanka, iyo sidii loo xoojin lahaa kaalinta Guddiyada ee gudashada waajibaadkooda dastuuriga ah.
Guddoomiye Cabdi Xaashi Cabdullaahi ayaa adkeeyay muhiimadda ay leedahay in la dhaqan-geliyo talooyinka wax-ku-oolka ah ee ay soo jeediyeen xubnaha Guddigu, lana dardargeliyo howlaha korjoogteynta iyo isla-xisaabtanka. Sidoo kale, wuxuu carrabka ku adkeeyay ilaalinta waqtiga shaqada iyo soo-xaadirista xubnaha Golaha, si waajibaadka loo igmaday si hufan oo masuuliyad leh loo guto.
