Wasiirka Wasaaradda Arrimaha Gudaha, Federaalka iyo Dib-u-heshiisiinta, Mudane Cali Yuusuf Cali (Cali Xoosh), oo uu wehliyo Wasiiru-dowlaha Wasaaradda Arrimaha Gudaha, Mudane Sadaad Maxamed Nuur Aliyow. ayaa Maanta booqasho ku yimid Xarunta Qaran ee Gurmadka Degdegga ah, waxaana Xarunta ku qaabilay Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle.
Kulanka waxaa diiradda lagu saaray xaaladda diyaar-garowga dalka, qorshayaasha ka jawaabista khataraha musiibooyinka iyo saadaasha Super El Niño iyo saameynta ka dhalan karta.
Wasiirka ayaa sidoo kale kormeeray howlaha ka socda Xarunta iyo heerka diyaar-garowga Hay’adda SoDMA ee la xiriira saameynta laga filayo Super El Niño, isagoo ku boorriyey dhammaan Hay’adaha iyo dhinacyada ku howlan arrimaha musiibooyinka inay SoDMA uga dambeeyaan hoggaaminta iyo isku-duwidda howlaha musiibooyinka, si loo xoojiyo wada-shaqeynta loogana fogaado isbarbar-yaac.
Guddoomiyaha Hay’adda SoDMA, Mudane Maxamuud Macallin Cabdulle, ayaa Wasiirka uga warbixiyey dadaallada Hay’addu waddo ee lagu xoojinayo diyaar-garowga iyo ka hortagga khataraha soo socda.
Ugu dambeyn, Wasiir Cali Xoosh waxuu shacabka Soomaaliyeed ugu baaqay taxaddar iyo feejignaan, isagoo sheegay in la filayo daadad iyo fatahaado ka dhasha Super El Niño, isla markaana ku baaqay in la garab istaago dadka nugul.
