Madaxweynaha Dowladda Hirshabeelle, Mudane Cali Cabdullaahi Xuseen (Cali Guudlaawe), ayaa munaasabad casho sharaf iyo sagootin ah ku maamuusay bahda warbaahinta, Hobollada Qaranka Waaberi iyo marti sharaf kale oo magaalada Jowhar u yimid ka qeybgalka xarig-jarka mashaariic kala duwan
Agaasimaha Warfaafinta Madaxtooyada Hirshabeelle, Maxamed Shuuriye Nuur, ayaa Madaxweynaha hortiisa ku ammaanay saxafiyiinta iyo fanaaniinta doorka ay ka qaateen munaasabadihii lagu soo bandhigay horumarka ka socda Hirshabeelle.
Agaasimaha Wakaaladda Wararka Qaranka Soomaaliyeed (SONNA), Ismaaciil Mukhtaar Oronjo, oo goobta ka hadlay, ayaa sheegay in warbaahinta dowladda iyo tan madaxa-bannaan ay bulshada gaarsiiyeen muuqaallo muujinaya horumarka ka jira Jowhar.
“Warbaahinta Qaranka iyo tan madaxa-bannaan ee Jowhar timid waxay bulshada u gudbiyeen sawir dhab ah oo ka tarjumaya horumarka ka socda Hirshabeelle,” ayuu yiri Agaasime Oronjo.
Agaasimaha Bariga iyo Bartamaha Afrika ee Telefishinka Universal Cabdullaahi Xersi Kulmiye ayaa dhankiisa tilmaamay shaqo boogaadin mudan inuu madaxweynaha ka qabtay Hirshabeelle.
Sidoo kale, Maareeyaha Golaha Murtida iyo Madadaallada Qaranka Soomaaliyeed, Abwaan Cusmaan Cabdullaahi Guurre, ayaa waxqabadka Hirshabeelle ku tilmaamay mid muuqda oo si cad loo dareemi karo.
Madaxweyne Cali Guudlaawe oo hadal kooban ka jeediyay munaasabadda ayaa sheegay in bahda warbaahinta ay door weyn ku leeyihiin gaarsiinta fariinta iyo horumarka Hirshabeelle.
Ugu dambeyn, Madaxweynaha Hirshabeelle ayaa uga mahadceliyay dhammaan martidii ka qeyb gashay munaasabadda taageerada iyo garab istaagga ay u muujiyeen Hirshabeelle.
