Agaasimaha Guud ee Wasaaradda Caafimaadka iyo Daryeelka Bulshada Galmudug, Dr. Abdiwali Mohamed Ahmed, ayaa wafdi heer sare ah ku soo dhoweeyay Isbitaalka Guud ee magaalada Galkacyo, oo ay maamusho Wasaaradda Caafimaadka iyo Daryeelka Bulshada Galmudug.
Wafdigaan oo ka socday Dowladda Federaalka Soomaaliya, Dowladda Jarmalka, iyo hay’adaha UNICEF iyo WFP, ayaa u kuurgalay adeegyada caafimaad ee isbitaalka, iyagoo si gaar ah diiradda u saaray xoojinta adeegyada nafaqada, daryeelka hooyada iyo carruurta, iyo tayeynta guud ee adeeg bixinta caafimaadka.
Wafdiga ayaa booqday qeybaha kala duwan ee isbitaalka, oo ay ka mid yihiin silsiladda qaboojinta tallaalka, qeybta tallaalka, bukaan-socodka, farmashiyaha, sheybaarka, iyo qeybta bukaan jiifka, iyagoo qiimeyn ku sameeyay tayada adeegyada la bixiyo, xaaladda bukaanada, iyo waxqabadka xirfadlayaasha caafimaadka ee ka howlgala xarunta.
ugu dambeyn Agaasime Abdiwali ayaa warbixin guud ka siiyay adeegyada uu bixiyo isbitaalka, mashaariicda horumarineed ee ka socda, iyo baahiyaha mudnaanta leh ee u baahan in wax laga qabto si loo xoojiyo adeegyada caafimaadka ee bulshada.
