Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya, Mudane Sheekh Aadan Maxamed Nuur (Madoobe), ayaa shir guddoomiyay kulanka toddobaadlaha ah ee Guddiga Joogtada, kaasoo ka dhacay xarunta guddoonka iyo guddiyada ee Villa Hargeysa. Kulanka waxaa goob joog ahaa Guddoomiye ku-xigeenka koowaad ee Golaha Shacabka, Marwo Sacdiya Yaasiin Xaaji Samatar.
Guddoomiyaha ayaa furitaanka kulanka ka jeediyay warbixin ku saabsan howlaha Golaha Shacabka, gaar ahaan meelmarinta shuruucda kaabeysa dowladnimada dalka, isagoo xusay muhiimadda ay leedahay dhaqangelinta shuruucda horseedaysa doorasho qof iyo cod ah. Wuxuu sidoo kale bogaadiyay dadaalka Guddiga Madaxabannaan ee Doorashooyinka Qaranka iyo Soohdimaha ee ku aaddan diiwaangelinta dadweynaha.
Intaas kadib, xubnaha Guddiga Joogtada ah ayaa ka dooday ajendayaasha mudnaanta u leh kalfadhiga toddobaadkan, iyagoo si gaar ah ajendeyn ugu sameeyay qorshayaasha Golaha ee toddobaadka soo socda.
Ugu dambeyn, Guddoomiyaha Golaha Shacabka, Mudane Sheekh Aadan Maxamed Nuur (Madoobe), ayaa kulanka soo xiray isagoo bogaadiyay howsha ay hayaan guddiyada Golaha, gaar ahaan korjoogteynta wasaaradaha iyo hay’adaha dowladda ee ay u xilsaaran yihiin.
