Qaar ka mid ah madaxda hay’adaha ugu sareeya ee garsoorka dalka ayaa ka qeybgalay kulan lagu soo bandhigayay adeeg dhanka kombiyuutarka ah, kaas oo loogu talagalay maareynta shaqooyinka la xiriira gal-dacwadeedyada.
Bandhigga qalabkan casriga ah oo ku shaqeynaya hab dijitaal ah, waxaa ka qeybgalay Guddoomiyaha Maxkamadda Sare, Xeer Ilaaliyaha Guud ee Qaranka, Guddoomiyaha Maxkamadda Racfaanka, Xoghayaha Wasaaradda Caddaaladda, Taliye ku xigeenka Ciidanka Booliiska, iyo Taliyaha Hoggaanka Baarista Dambiyada.
Kulanka waxaa hadallo ka jeediyay Guddoomiyaha Maxkamadda Sare, Baashi Yuusuf, iyo qaar ka mid ah madaxda laamaha caddaaladda, kuwaas oo sharaxay ahmiyadda adeeggan iyo sida uu uga qeyb qaadan karo baarista iyo la socodka dambiyada.
Mashruucan waxaa maalgelinaya Dowladda Mareykanka inta uu socdo, iyadoo hannaankan dijitaalka ah loo qorsheeyay in uu fududeeyo isku xirka howlaha maalinlaha ah ee bahda caddaaladda.
