TACSI: Wasiirka Wasaaradda Warfaafinta, Dhaqanka iyo Dalxiiska Soomaaliya, Mudane Daa’uud Aweys Jaamac, Wasiir Ku-xigeenka Wasaaradda Warfaafinta, Cabdiraxmaan Yuusuf Cumar Al-Cadaala, Agaasimaha Guud ee Wasaaradda, Cabdullaahi Xayir Ducaale, agaasimeyaasha waaxyaha iyo hawlwadeennada Wasaaradda Warfaafinta, Dhaqanka iyo Dalxiiska waxay tacsi tiiraanyo leh u dirayaan Allah ha u naxariistee Marxuumad Khadiija Maxamuud Yuusuf (Khadiija Qalanjo), oo ka mid ahayd fanaaniinta Hoballada Qaranka ee Waaberi, kuna geeriyootay maanta magaalada Hargeysa.
Marxuumad Khadiija Qalanjo waxay si gaar ah ugu suntaneyd horumarinta fanka, suugaanta iyo dhaqanka Soomaaliyeed. Waxa ay sidoo kale ka mid ahayd fanaaniintii ugu horreeyey ee heesahooda dhaqanka lagu soo xulay Telefishinka Qaranka Soomaaliyeed markii la furay bishii Oktoobar 1983.
Tacsi tiiraanyo leh ayaanu u diraynaa qoyskeeda, carruurteeda, bahda fanka iyo guud ahaan shacabka Soomaaliyeed ee ay ka geeriyootay.
Waxaan Allah uga baryeynaa in uu Jannatul Firdowsa ka waraabiyo, samir iyo iimaanna innaga wada siiyo.
INNAA LILLAAHI WA INNAA ILEYHI RAAJICUUN.
