Ciidanka Xoogga Dalka Soomaaliyeed iyo geesiyaasha xaq u dirirka ah ee dadka deegaanka ayaa saakay cadowga Khawaarijta ku jebiyey dagaallo ka dhacay deegaano ka tirsan gobolka Shabeellada Dhexe. Dagaallada ayaa ka dhacay deegaannada Ceel Cali Axmed iyo Cali Fooldheere, waxaana howlgalka uu ahaa mid qorshaysan oo si guul leh u fuliyey ciidanka.
Dagaalkii ugu culus ee ka dhacay deegaanka Ceel Cali Axmed ayaa sababay khasaare lixaad leh oo ay soo gaartay Khawaarijta. Saraakiisha ciidanka xoogga dalka ee howlgalka hoggaamineysa ayaa xaqiijiyay in cadowga ay heleen khasaare dhimasho iyo dhaawac ah, iyadoo sidoo kale ay soo baxayaan warbixinno sheegaya in xoogagga Khawaarijta ay ka tageen goobaha ay ku sugnaayeen kadib weerarka culus ee ay la kulmeen.
Meydadka Khawaarijta ayaa daadsan yihiin deegaanka Ceel Cali Axmed, waxaana dadka deegaanka ay ka warbixiyeen in horjoogayaal iyo malleeshiyaad badan ay ku dhinteen dagaalka. Tallaabooyinka ciidanka xoogga dalka iyo geesiyaasha xaq u dirirka ah ayaa ah kuwo guul weyn ka tarjumaya, taas oo ka dhigan in taageero xooggan oo dhinaca ammaanka ah laga heli doono deegaannada kale ee ku yaal gobolka.
