Guddoomiyaha Hay’adda Maareynta Musiibooyinka (SoDMA) Mudane Maxamuud Macallin Cabdulle, oo hoggaaminaya wafdiga Dowladda Federaalka Soomaaliya, ayaa ku sugnaa dalka Kuwait ee martigeliyay meertadii 6-aad ee Shirka Madal-goboleedka Carabta ee Yareynta Khataraha Musiibooyinka.
Kulanka uu la qaatay Madaxa Ciidanka Dabdamiska Guud ee Kuwait, Major General Talal Mohammed Al-Roumi, ayaa diiradda lagu saaray xoojinta iskaashiga labada dal ee dhinacyada tababarka, qalabaynta, iyo horumarinta adeegyada dabdamiska iyo gurmadka degdegga ah, iyo isdhaafsiga aqoonta ku saabsan maareynta musiibooyinka.
Shirkan, oo ay martigelisay Dowladda Kuwait iyadoo kaashaneysa Xafiiska Qaramada Midoobay ee Yareynta Khatarta Musiibooyinka (UNDRR) iyo Ururka Jaamacadda Carabta, ayaa ka qayb galay in ka badan 600 oo ka socday dowladaha, ururrada bulshada rayidka ah, jaamacadaha, iyo hay’adaha caalamiga ah.
Guddoomiyaha SoDMA ayaa uga mahadceliyay Dowladda Kuwait martigelinta shirkaan iyo taageerada ay siiso shacabka Soomaaliyeed.
