Wasiirka Beeraha Xukuumadda Federaalka Soomaaliya, Mudane Maxamed Cabdi Xayir Maareeye, ayaa magaalada Kampala uga qayb galay shir looga hadlayay istaraatiijiyada Beeraha dalalka Midowga Afrika. Shirkan ayaa qeyb ka ah shir-madaxeedka Midowga Afrika oo dhawaan ka dhici doona Kampala, waxaana diiradda lagu saaray istaraatiijiyada dhinaca amniga cunnada ee tobanka sano ee soo socda (2026 – 2035).
Shirka ayaa waxaa Wasiirka iyo wafdigiisa ku wehliyay Safiirka Jamhuuriyadda Federaalka Soomaaliya ee Uganda, Amb. Fardowsa Maxamed Qanyare, iyo madax kale.Wasiirrada Beeraha ee dalalka Afrika ayaa shirka ka soo jeediyay talo ah in loo qoondeeyo Beeraha iyo tacbashadooda 10% miisaaniyadda dal walba si kor loogu qaado wax soo saarka.
Talooyinka shirkan ka soo baxa ayaa lagu wadaa in loo gudbiyo madaxweynayaasha dalalka Afrika oo toddobaadka soo socda shir ku yeelan doona Kampala.
