Wasiirka Caddaaladda iyo Arrimaha Dastuurka Xukuumadda Federaalka Soomaaliya, Mudane Xasan Macallin, ayaa maanta qaabilay safiirka Dowladda Liibiya u fadhiya Soomaaliya Mudane Nasri Maxamad Sanuusi. Kulanka, ayaa looga hadlay xoojinta xiriirka labada dal iyo iskaashiga dhinacyada cadaaladda iyo garsoorka.
Labada mas’uul, ayaa ka wadahadlay xaaladda maxaabiista Soomaaliyeed ee siyaabaha kala duwan ugu jira xabsiyada Liibiya iyo muwaadiniinta u gacangalay maafiyada ka ganacsata dadka. Sidoo kale waxa ay labada masuul ka wadahadleen sida loo hirgelin karo heshiis iskaashi garsoor oo dhex mara labada dal.
Safiirka ayaa soo dhaweeyay dedaalka Xukuumadda Federaalka Soomaaliya ugu jirto xoojinta xiriirka labada dal, adkeeyayna in ay diyaar u yihiin ka hawlgalka arrimanta muwaadiniinta Soomaaliyeed ee dalka Liibiya siyaabaha kala duwan ugu dhibaataysan.
Labada Masuul ayaa isla gartay in si wadajir ah laba dowladood uga wadashaqeeyaan sidii muwaadiniinta Soomaaliyeed dalkooda ugu soo noqon lahaayeen iyada oo loo marayo wadiiqooyinka dublamaasiyadda.
