Wasiirka Wasaaradda Caddaaladda iyo Arrimaha Dastuurka Xukuumadda Jamhuuriyadda Federaalka Soomaaliya Mudane Xasan Macallin Maxamuud, ayaa maanta xarunta wasaaradda ku qaabilay mudane Zafer Sazgin, maareeyaha Bagiga Ziraat faraca Soomaaliya.
Wasiir Xasan Macallin, ayaa si diiran u soo dhaweeyay mudane Zafer, isaga oo bogaadiyay dadaalka bangiga ee ku aaddan shaqada ay ka wadaan Soomaaliya.
Intii uu kulanku socday, waxaa laga wadahadlay baahida sharci iyo xeer ee ganacsiga iyo maalgelinta caalamiga ahi u baahan yihiin si ay uga shaqeeyaan dalka, iyo sidii ganacsiga Soomaaliya loogu furi lahaa suuqa adduunka.
Ugu dambeyn Wasiirka ayaa u ballanqaaday in bangiyada iyo maalgashadayaasha caalamiga ah ay heli doonaan xayndaab sharci oo dhiirigeliya, si ay si nabadgelyo leh ugu shaqeeyaan ugana faa’iidaystaan fursadaha ganacsi ee ka jira Soomaaliya.
