Wasiirka arrimaha debedda ee Israa’iil ayaa sheegay inuu rajaynayo in la dhamaystiro xidhiidhka diblomaasiyadeed ee u dhexeeya Sudan iyo Israa’iil, dhammaadka sannadkan, xilli uu ka soo laabtay socdaal diblomaasiyadeed oo uu ku tegey dalka Sudan.
Eli Cohen oo la hadlay warbaahinta, ka dib safariisa halka maalin qaatay ee uu ku tegey Khartoum, ayaa sheegay inuu kulamo heersare ah la qaatay hoggaamiyayaasha milateriga, oo uu ka mid yahay hoggaamiyaha Sudan Abdel-fattah Burhan oo dalkaas soo xukumayey tan iyo markii uu afgembigu dhacay sannadkii 2021.
“Heshiiska ayaa la filayaa in la saxiixo sanadkan, wuxuuna noqonayaa kii afaraad” ee noociisa ah, ayuu yidhi wasiirka arrimaha debedda ee Israa’iil, isaga oo tixraacaya heshiisyadii lagu hagaajinayey xidhiidhka u dhexeeya Israa’iil iyo dalalka Imaaraadka Carabta, Bahrain, Sudan iyo Morocco, kaas oo uu door ka qaatay Maraykanku.
Ku dhawaaqistan ayaa ka caawin karta ra’iisul wasaaraha Israa’iil Benjamin Netanyahu in uu dareenka ka jeediyo rabshadihii dhowaan ka dhex dhacay Falastiiniyiinta iyo maamulkiisa, iyo weliba cadhada xooggan ee ka dhalatay qorshihiisa ku aaddan isbedelka dhinaca garsoorka.
AP
