Odayaasha dhaqanka iyo bulshada reer Dhuusamareeb ayaa deeq xoolo nool ah oo ay ugu talagaleen ciidamada qalabka ee ka qayb galay howlgalkii dhowaan ka dhacay Dhuusamareeb ku wareejiyay Duqa Dhuusamareeb macalin Cabdiraxmaan Geedaqoroow oo isla goobta ku gudoonsiiiyey Saraakiisha talisyada kala duwan ee ciidamada.
Xoolahan oo ka kooban dhowr iyo toban neef oo geel ah ayaa qayb ka ah sida odayaashu sheegeen dhiirigalinta Ciidamada Qalabka sida ee Soomaaliyeed iyo kuwa amisom ee kawada qayb galay howlgalkii dhacey 13-kii bishan oo looga hortagay duulaan maleeshiyaad isi soo abaabuley ku doonayeen in ay ku carqaladeeyaan amniga Caasimada.
Dhiirigalintan ayay waxgaradka reer Dhuusamareeb ku micneeyeen in ay tahay abaal marin ka timid bulshada reer Dhuusamareeb oo ay Ciidamada kaga mahad celinayaan howlgalkan, isla markaana ay dhiirigalinayaan firfircoonida ka muuqata howsha ay har iyo habeenba u taagan yihiin ee sugida amaanka.
Gudoomiyaha Dhuusamareeb Macalin Cabdiraxmaan Geedaqoroow ayaa deeqdan si rasmi ah u gudoonsiiyey saraakiisha Ciidamada
Col. Bashiir Ciise Taliyaha guutada 15-aad ee Qaybta 21-aad iyo G/sare qaliif Cabdulahi Maalin Taliyaha Qaybta guud ee Booliiska Galmudug ayaa wakiilnimada dhamaan ciidanka qalabka sida ku gudoomey deeqdan xoolaha ah.
