Xafiiska Dhiirigelinta Maalgashiga Soomaaliya ee SOMINVEST, oo ka tirsan Wasaaradda Qorsheynta, Maalgashiga iyo Horumarinta Dhaqaalaha, ayaa ku biiray Ururka Hay’adaha Dhiirigelinta Maalgashiga ee Adduunka (WAIPA) oo ay ku bahooben in ka badan 170 hay’adood oo dhiirigeliya maalgashiga oo ku kala yaal 130 dal.
WAIPA ayaa ka cawinta hay’adaha dhiirigelinta sidii aay sare ugu qaadi lahayeen karaankooda ku aadan dhiirigelinta maalgashiga, sidii hay’aduhu isu dhaafsan lahayeen khibradaha dhiirigelinta maalgashiga iyo in sidi Dowlahda looga cawini lahaa hagaajinta iyo casriyeynta guud ahaan jawiga maalgashiga.
Sidoo kale, WAIPA waxa ay sare u qaadeysa xiriirka ka dhexeeya hay’adaha dhiirigelinta maalgashiga dunida isla markaasna u diyaarinaysa doodo iyo cilmi-baaris ku aadan hannaanka dhiirigelinta maalgashiga.
“Waa guul u soo hoyatay Ummadda Soomaaliyeed, gaar ahaan bahda ku howlan dhiirigelinta maalagshiga waddanka Soomaliya. Waxaan, si gaar ah, ugu mahadcelinaya intii gacan ka geysatay gaarista hiigsigan ku biirista hay’addan caalamiga ah sida howl-wadeennada Xafiiska Dhiirigelinta Maalgashiga” ayuu yiri Mohamed Dubo, Agaasimaha Xafiiska Dhiirigelinta Maalgashiga (SOMINVEST).
Xafiiska Dhiirigelinta Maalgashiga Soomalaiya ayaa ku howlan soo jiidashada iyo hanashada maalgashi shisheeye si sare loogu qaado jawiga maalgashi ee dalka, loo dhaqan geliyo Qorshaha Horumarinta Qaranka isla markaana loogu abuuro dhalinyarada Soomaaliyeed fursado shaqo.
