Kulanka qada sharafta ah oo ay soo qaban qaabiyeen Maamulka Degmada Deyniile ayaa waxaa ka qeyb galay Guddoomiyaha Baarlamaanka Galmudug, Xildhibaanno, Wasiiro ka tirsan Galmudug iyo qeybaha bulshada ee ku nool Caasimadda.
Kulanka kaddib Wafdiga uu hogaaminayo Guddoomiyaha Baarlamaanka dowlad Goboleedka Galmudug waxa ay kormeereen deegaannada Ceel-Jaale iyo Warta Shirkadda oo ah goobaha loo dalxiistago ee Degmada Deyniile, halkaasi oo ay ku soo arkeen goobo u diyaarsan dalxiiska.
Guddoomiyaha Degmada Deyniile Maxamed Abuukar Jacfar ayaa mas’uuliyiinta ku soo dhaweeyay Degmada, isagoo sheegay in ay ku faraxsanyihiin imaashahooda.
Maxamed Mire Axmed iyo Canab Maxamed Cosoble oo ka mid ah Xildhibaannada Baarlamaanka Galmudug iyo Wasiir ku-xigeenka Wasaaradda Xanaanada Xoolaha Galmudug mudane Xasan Cabdullaahi Cas-caseey ayaa Maamulka Dayniile ku amaanay amniga ka jira degmada.
Guddoomiyaha Baarlamaaka Dowlad Goboleedka Galmudug Dr. Maxamed Nuur Gacal ayaa Maamulka degmada uga mahadceliyay soo dhaweynta loo sameeyay, isaga iyo wafdiga la socday, waxaana uu maamulka ku boggaadiyay sida ay amniga uga shaqeeyeen iyo maashaariic horumarineed ee ka socda Degmada.
