Ciidamada Danab oo khaarajiyay Horjoogihii Jubbada hoose u qaabilsanaa kooxda Al-shabaab.

0
19

Ciidanka xoogga dalka gaar ahaan kumaandooska Danab ayaa howlgal ay ka fuliyeen deegaanno hoostaga gobolka Jubbada hoose waxey ku dileen Horjoogeyaal iyo maleeshiyaad ka tirsan argagaxisada Al-shabaab.

Taliyaha guutada 16-aad ee Kumaandooska Danab Gaashaanle Ismaciil Cabdi Maalik Maalin oo la hadlay Idaacadda Ciidamada qalabka Sida ayaa sheegay in Kumaandooska Soomaliya ay Howlgal ka fuliyeen degaannada Dhisheeg-waamo,Maroodi-gubow iyo Dhaay unbow oo qiyaasti 75-km u jirta magaalada Kismaayo.

Taliyaha waxa uu sheegay in ciidamada Danab ay Howlgalka ku dileen labo Horjooge oo kala ah Xirow oo Nabadiidka Al-shabaab u qaabilsanaa degaanka Dhisheeg waamo, iyo Cabdi Maxamed Bashiir oo argagaxisada Al-shabaab u qaabilsanaa gobolka Jubbada Hoose.

Taliyaha guutada 16-aad ee Kumaandooska Danab  ayaa xusay in ay dhaawac u geysteen 11 Maleyshiyaad ah oo ka tirsan Nabadiidka, isagoo intaa raaciyay in sidoo kale Ciidamada Kumaandooska Danab ay burburiyey Saldhigyada Al-shabaab ay degaannadaasi ku lahayeen.