Safaaradda Soomaaliye ee Koonfur Afrika ayaa dalka dib ugu soo celisay muwaadiniin ay tiradooda gaarayso 49 qof oo isugu jira dhallinyaro, Hooyooyin iyo carruur, kuwaas oo ku xanibnaa dalkaasi kaddib markii Dowladda Koonfur Afrika saartay bandow, ayadoo wali ay xiranyihiin xuduudaha dalkaasi.
Muwaadiniintan oo doonayay inay dalkooda dib ugu laabtaan ayaa ku xayirnaa dalkaas tan iyo intii uu billowday cudurka COVID-19, waxayna Dowladda Koonfur Afrika gebi ahaanba joojisay bisha March ee sanadkan safarrada lagu aadi jiray Adduunka,marka laga reebo muwaadiniinta dalkooda dib ugu laabanaya.
Dadkan ayaa ka mahadceliyay gurmadka ay Safaaradda Soomaaliya ee Koonfur Afrika ay sameysay, waxaana ay sheegeen in Safaaradda qeyb weyn ka qaadatay dib ugu celinta dalkooda.
Dalka Koonfur Afrika waxa uu ka mid yahay dalalka sida ba’an u saameeyay cudurka COVID-19, waxaana wali saarran xiyaarad inkastoo todobaadkii hore la qafiifiyay iyadoo ay xiranyihiin xuduudaha dalkaasi.
