Qiimaha lagu kala iibsado khudaarta nuucyadeeda kala duwan ee suuqyada magaalada Jowhar ee xarunta Gobalka Shabeellaha Dhexe ayaa waxaa sare u kac ku yimid ka dib markii uu saameeyay daadadkii ka dhashay fatahaadda webiga shabeelle uu ka geystay deegaanno hoostaga degmooyinka Mahadaay iyo Jowhar.
Xilligan oo kale waxa Beeraha jowhar kasoo go’i jiray dalagyo kala duwan oo ay kamid yihiin khudaarta balse roobkii gu’ga iyo fatahaadda webiga oo is biirsaday ayaa sababay in ay baaba’aan dalagyadii u beernaa beeraleydu.
Gobalka Shabeellaha dhexe ayaa ka mid ah goballada leh beeraha oo ah waxsoosaarka labaad ee dalkeena waana kheyraadka uu alle ku manaystay dalka, haseyeeshee waxaa caqabado kal duwan ay soo wajaheen wax soosaarka beeraha sida fatahaadda iyo amniga darada oo inta badan ka hor istaagtay beeralayda Soomaaliyeed meel kasta oo ay ka joogaan dalka.
Webiyada Shabeelle iyo Jubba oo mara Soomaaliya ayaa xilli isku mid ah fatahaadda uga geysta goballada uu maro iyadoo ay saameyntu waxyeeladeedu inta badan ay soo gaarto dadka beeralayda ah oo dalagyadii ay beerteen ay baabi’iyaan fatahaadda.
