Guddoomiyaha Gobalka Banaadir ahna duqa Muqdisho Cumar Maxamud “Cumar Filish” ayaa ku baxay xalinta banaanbax ka dhacay fagaaraha Daljirka dahsoon oo ay isku yimaadeen dad ka gudoodsan dil uu 2-qof oo shacab ah u geestay Askari katirsan ciidanka Boliiska Soomaaliyed gaar ahaan saldhiga degmada Boondhere.
“Waxaan marka hore idin kaga tacsiyeenaya dhibkii dhacay oo ahaa mid aad u fool xun islamarkaana qalbigeyga xanuujisay waana sababta keentay inaan hortiina imaado, sidoo kale madaxda dowlada wey xanuujisay waxeyna diyaar u yihiin in sida ugu dhaqsiyaha badan sharciga loo horkeeno gacan ku dhiiglihii falkaas geestay”.
Dhankale Guddoomiyaha Gobalka Banaadir Cumar Maxamud (Cumar Filish) ayaa taliska qeybta guud Gobalka Banaadir ee Ciidanka Boliiska kula kulmay qoysaskii marxuumiinta wax uuna u sheegay in sharciga si deg deg ah loo horkeeni doono gacan ku dhiigle Xasan Aadan Xasan oo ah askarigii dilka geestay, sidoo kale duqa magaalada Muqdisho ayaa sheegay dowladda ay garab taagan tahay qoysaska marxuumiinta gardarada lagu dilay.
