Muqdisho (SNTV):- Ra’iisul wasaare Xassan Cali Khayre ayaa guddoomiyay shirka toddobaadlaha ah ee Qorshaha Cafinta Deymaha kaasi oo ka dhacay xarunta wasaaradda maaliyadda xukuumadda federaalka ee Soomaaliya.
Wasiirka maaliyadda ayaa Ra’iisul wasaaraha uga warbixiyay guulaha laga gaaray shuruudaha dayn cafinta ee dawladda lagu xiray iyo shaqooyinka qabyada ah ee dhammeeystirka u baahan si loo dar-dar geliyo qorshaha cafinta daymaha Soomaaliya.
Shirka Toddobaadlaha ah ee geeddi socodka dayn Cafinta Soomaaliya oo ay kasoo qayb galaan dhammaan dhinacyada ay khuseyso geeddi socodkaasi ayaa looga hadlaa qodobada ka fulay heshiiskii Hay’adda lacagta adduunka ee loo soo gaabiyo (IMF) iyo Dawladda Soomaaliya ay wada gaareen iyo dar-dar gelinta qorshayaasha fududaynaya in Soomaaliya daynta laga cafiyo.
Dowladda Federaalka ayaa dadaal xooggan gelisay sidii Soomaaliya looga cafin lahaa deymaha lagu leeyahay, waxayna Hay’adaha dhanka maaliyadda ka taageera Soomaaliya ay ku ammaaneen daah-furnaanta iyo kobaca dhaqaalaha dalka uu sameeyay sanadihii ugu danbeeyay.
