Muqdisho (SNTV)- Waxaa magaaladda Istanbul ee dalka Turkiga ka furmay maanta shirka Bandhiga Shirkadaha Ganacsiga Qalabka Dhismaha ee Turkiga iyo Carabta oo ay soo qabanqaabisay Jimciyada Isku xirka Ganaacsatada Turkida iyo Carabta ee loo soo gaabiyo TURAP.
Waxaa ka qeyb galay 200 Shirkadood oo Turki ah, Dhanka Soomaaliya, waxaa uga qeyb galey wafdi uu hogaminayo Wasiirka Howlaha Guud, Dib u dhiska iyo Guriyeynta ee Xukuumadda Federalka Soomaaliya Mudane Cabdifataax Maxamed Ibraahim Geesey oo ka koobnaa Ganacsato iyo Engineero Soomaaliyeed, Gudoomiyaha Rugta Ganacsiga ee Tukiga iyo Shirkadaha daneeya Maalgashiga iyo Ganacsato Carbeed.
Shirka ayaa waxaa si wadajir ah u furay Wasiirka Howlaha Guud, Dib u dhiska iyo Guryeynta ee Soomaaliya, Mudane Cabdifataax Maxamed Ibraahim Geesey iyo Madaxa Iskaashiga Maalgashiga Turki iyo Carab, Mudane Cadhar subuxi.
Wasiir Cabdifataax Geesey oo kahadlay furitaankii shirka ayaa sheegay ahmiyada ay u leedahay Soomaaliya qalabkan dhismaha, maadaama aanan dib u dhis lagu sameyn ilaa iyo burburkii Dowladii dhexe oo hada dib looga soo kabaneyo qalabkana uu wax wayn ka bedeli doono muhiimna uu u yahay Soomaaliya.
Shirka ayaa socon doona muddo sadex maalmood ah oo ay Ganacsatadu ku soo bandhigi doonaan qalabka dhismaha qeybihiisa kala duwan.
