Muqdisho (SNTV);- Tababarkaan oo lagu baranayo sida loo sameeyo Barnaamijyo tayo leh iyo maamulida Barnaamijyada Doodaha ah oo ay ka qaybgalayaan ku dhowaad 20-ka mid ah Howlwadeenada Warbaahinta Qaranka ayaa maanta ka furmay xarunta Wasaaradda Warfaafinta Dhaqanka iyo Dalxiiska ee dowladda Federaalka Soomaaliya.
Tababarkaan oo socon doona Mudo Shan maalmood ah ayaa waxaa bixin doona macalimiin ka socota Hay’adda horumarinta Warbaahinta Caalamka ee dalka Finland ee magaceeda loo soo gaabiyo VIKAS.
Agaasimaha Radio Muqdisho Mudane C/fitaax Daahir Jayte oo ka hadlay furitaankii Tababarkaan ayaa wuxuu sheegay in Tabarkaan ay ka faa’iidaysan doonaan inta uu socdo Suxufiyiin iyo Cameramano ka shaqeeya soo saarista Barnaamijyada Doodaha ah kuwaasi oo la soo xulay.
Mudane C/rixmaan Yuusuf Sheekh Cadaala oo ah Agaasimaha Guud ee Wasaaradda Warfaafinta Dhaqanka iyo Dalxiiska ayaa asna kula dardaarmay ka qaybqaatayaasha Tababarka inay sifiican uga faa’iidaystaan mudada uu socdo Tabarbarkaan, isagoo dhanka kala u rajeeyay Suxufiyiinta inay xirfadooda wax badan ka badalaan marka uu dhamaado Siminaarkaan.
Ugu Danbayntii Wasiir ku xigeenka wasaaradda Warfaafinta Mudane Aadan Isaaq oo si rasmi ah u furay Tababarkaan ayaa u mahadceliyay Hay’adda horumarinta Warbaahinta Caalamka ee dalka Finland ee magaceeda loo soo gaabiyo VIKAS, wuxuuna ku amaanay dadaalka ay ugu jiraan horumarinta Warbaahinta Soomaaliya gaar ahaan Warbaahinta Qaranka.
