Jowhar (SNTV);- Shirka Golaha WWasiirada Maamulka Hirshabelle oo uu shir gudoominayay Madaxweynaha Maamulka Hirshabelle Mudane Maxamed Cabdi Waare, ayaa maanta oo ay taariikhdu tahay, (20/10/2018) lagu gorfeeyey arrimo badan oo la xiriira dhinaca amniga, dhaqaalaha,wax soo saarka, Dib u dhiska iyo horumarinta arrimaha bulshada, iyo hirgelinta mashriicda Horumarineed ee hadda diyaarka ah.
Goluhu waxa uu warbixin ka dhageystay Wasiirka Wasaaradda Hirshabeelle oo ku dheeraaday dhinaca amniga oo la isla gartay in la dar dargaliyo dhismaha ciidmada Hirshabelle oo la qorsheeyay dabayaaqada bishan in Hirshabelle loo tababaro Ciidamo Booliis ah oo ay Hirshabelle yeelato, sidoo kale iyana la taageero dadka isku xilqaamay la dagaalanka argagaxisada, kuwaasi oo ilaa 2000-ciidan ahaan loo qarameyn doono sida uu sheegay Wasiirka amniga Gudaha Maamulka Hirshabelle Mudane C/qaadir jeelle.
Iyadoo laga duulayo qorshaha Horumarinta iyo Dib u Dhiska Hirshabelle waxa uu goluhu isla qaatay in lasoo horumariyo adeegyada aas-aasiga ah ee arrimaha bulshada, sida Caafimaadka, Biyaha, Waxbarashada, Kalluumaysiga, Xannaanada Xoolaha, Horumarinta Beeraha, iyo dhismaha Waddooyinka.
Sidoo Golaha Wasiirada Maamulka Hirshabeelle wuxuu soo dhoweeyay mideynta Canshuurta Hirshabelle oo ay Wasaaradda Maaliyadda Hirgalisay,waxaana nidaamkaasi lagu ammaanay Wasaaaradda Maaliyadda Hirshabeelle oo ay ku dooneyso horumarinta Dhaqaalaha.
Ugu danbayn Golaha Wasiirada waxa la horgeeyay Hindise sharciyeedka Wasaaradda Ganacsiga Hirshabelle, iyadoo loo qeybiyay Wasiirada Hindise sharciyeedkaasi shirarka soo socdana looga doodi doono.
