Warshiiq (SNTV) Mashaariicdaan Horumarineed ee laga Hirgelinayo Degmada Warshiiq ee Gobolka Shabeelaha Dhexe ayaa waxaa ka mid ah Ceel Biyood leh biyo macaan, kaasi oo ay dhagax dhigeen maamulka degmada Warshiiq iyo mas,uuliyiin ka tirsan dowlad goboleedka Hirshabeele, iyadoo uu taaganyahay riigii ceelka qodayay iyo mashruuc degmada Warshiiq looga sameynayo leerarka cadceeda ku shaqeeyo oo laga hirealiyay degmada Warshiiq ee gobolka Shabeelaha Dhexe.
Degmada Warshiiq oo ka tirsan Gobolka Shabeelaha Dhexe ayaa waxaa horay ugu jirtay biyo xumi iyadoo aysan laheyn ceel biyood wanaagsan, waxaana ku yaala ceel biyood leh biyo dhanaan ah oo bulshada ku nool degmada Warshiiq ay ka haysatay dhibaatooyin dhinaca helitaanka biyo nadiif ah, iyagoo sidoo kale culeys ku qabay helitaanka koronto joogta ah.
Gudoomiyaha Degmada Warshiiq ee Gobolka Shabeelaha Dhexe Axmed xuseen Axmed (Shiidka) ayaa ka warbixiyay mashaariicda horumarineed ee laga hergalinayo degmada Warshiiq, waxaana uu tilmaamay in hadii ay soo gaba gaboobaan ay fursad fiican u tahay shacabka degmada.
Xildhibaan Maxamuud Xuseen Mooge oo ka mid ah xildhibaanada Baarlamaanka dowlad goboleedka Hirshabeele ayaa ka hadlay muhiimada mashaariicdan lagu hormarinayo degmada, wuxuuna ku booriyay bulshada ku nool degmada Warshiiq in ay ka shaqeeyaan horumarka degamda.
Michael Kenya kisa oo ka socday Hay’adda Ceelka qodaysay oo lagu magacaabo Somali Stability Fun ayaa ka hadlay faa,iidada ceelkan uu u leeyahay bulshada ku nool degmada Warshiiq.
Wasiirka wasaaradda Biyaha Tamarta iyo Macdanta ee dowlad goboleedka Hirshabeele Axmed Muuse Xuseen ayaa sheegay in wasaaradda Biyaha Tamarta iyo Macdanta ee dowlad goboleedka Hirshabeele ay ka shaqeyn doonto horumarka gobolka Shbeelaha Dhexe.
